౯. జటిలసుత్తం

౯. ఏవం మే సుతం – ఏకం సమయం భగవా గయాయం విహరతి గయాసీసే. తేన ఖో పన సమయేన సమ్బహులా జటిలా సీతాసు హేమన్తికాసు రత్తీసు అన్తరట్ఠకే హిమపాతసమయే గయాయం ఉమ్ముజ్జన్తిపి నిముజ్జన్తిపి, ఉమ్ముజ్జనిముజ్జమ్పి కరోన్తి ఓసిఞ్చన్తిపి, అగ్గిమ్పి జుహన్తి – ‘‘ఇమినా సుద్ధీ’’తి.

అద్దసా ఖో భగవా తే సమ్బహులే జటిలే సీతాసు హేమన్తికాసు రత్తీసు అన్తరట్ఠకే హిమపాతసమయే గయాయం ఉమ్ముజ్జన్తేపి నిముజ్జన్తేపి ఉమ్ముజ్జనిముజ్జమ్పి కరోన్తే [ఉమ్ముజ్జనిముజ్జం కరోన్తేపి (సీ. పీ. క.)] ఓసిఞ్చన్తేపి అగ్గిమ్పి జుహన్తే – ‘‘ఇమినా సుద్ధీ’’తి.

అథ ఖో భగవా ఏతమత్థం విదిత్వా తాయం వేలాయం ఇమం ఉదానం ఉదానేసి –

‘‘న ఉదకేన సుచీ హోతీ, బహ్వేత్థ న్హాయతీ [నహాయతీ (సీ.)] జనో;

యమ్హి సచ్చఞ్చ ధమ్మో చ, సో సుచీ సో చ బ్రాహ్మణో’’తి. నవమం;