౫. నన్దుత్తరాథేరీగాథా

౮౭. ‘‘అగ్గిం చన్దఞ్చ సూరియఞ్చ, దేవతా చ నమస్సిహం;

నదీతిత్థాని గన్త్వాన, ఉదకం ఓరుహామిహం.

౮౮. ‘‘బహూవతసమాదానా, అడ్ఢం సీసస్స ఓలిఖిం;

ఛమాయ సేయ్యం కప్పేమి, రత్తిం భత్తం న భుఞ్జహం.

౮౯. ‘‘విభూసామణ్డనరతా, న్హాపనుచ్ఛాదనేహి చ;

ఉపకాసిం ఇమం కాయం, కామరాగేన అట్టితా.

౯౦. ‘‘తతో సద్ధం లభిత్వాన, పబ్బజిం అనగారియం;

దిస్వా కాయం యథాభూతం, కామరాగో సమూహతో.

౯౧. ‘‘సబ్బే భవా సముచ్ఛిన్నా, ఇచ్ఛా చ పత్థనాపి చ;

సబ్బయోగవిసంయుత్తా, సన్తిం పాపుణి చేతసో’’తి.

… నన్దుత్తరా థేరీ….