౧౨. చన్దాథేరీగాథా

౧౨౨. ‘‘దుగ్గతాహం పురే ఆసిం, విధవా చ అపుత్తికా;

వినా మిత్తేహి ఞాతీహి, భత్తచోళస్స నాధిగం.

౧౨౩. ‘‘పత్తం దణ్డఞ్చ గణ్హిత్వా, భిక్ఖమానా కులా కులం;

సీతుణ్హేన చ డయ్హన్తీ, సత్త వస్సాని చారిహం.

౧౨౪. ‘‘భిక్ఖునిం పున దిస్వాన, అన్నపానస్స లాభినిం;

ఉపసఙ్కమ్మ అవోచం [అవోచిం (క.)], ‘పబ్బజ్జం అనగారియం’.

౧౨౫. ‘‘సా చ మం అనుకమ్పాయ, పబ్బాజేసి పటాచారా;

తతో మం ఓవదిత్వాన, పరమత్థే నియోజయి.

౧౨౬. ‘‘తస్సాహం వచనం సుత్వా, అకాసిం అనుసాసనిం;

అమోఘో అయ్యాయోవాదో, తేవిజ్జామ్హి అనాసవా’’తి.

… చన్దా థేరీ….

పఞ్చకనిపాతో నిట్ఠితో.