౧. భద్దాకాపిలానీథేరీగాథా

౬౩. ‘‘పుత్తో బుద్ధస్స దాయాదో, కస్సపో సుసమాహితో;

పుబ్బేనివాసం యోవేది, సగ్గాపాయఞ్చ పస్సతి.

౬౪. ‘‘అథో జాతిక్ఖయం పత్తో, అభిఞ్ఞావోసితో ముని;

ఏతాహి తీహి విజ్జాహి, తేవిజ్జో హోతి బ్రాహ్మణో.

౬౫. ‘‘తథేవ భద్దా కాపిలానీ, తేవిజ్జా మచ్చుహాయినీ;

ధారేతి అన్తిమం దేహం, జేత్వా మారం సవాహనం.

౬౬. ‘‘దిస్వా ఆదీనవం లోకే, ఉభో పబ్బజితా మయం;

త్యమ్హ ఖీణాసవా దన్తా, సీతిభూతమ్హ నిబ్బుతా’’తి.

… భద్దా కాపిలానీ థేరీ….

చతుక్కనిపాతో నిట్ఠితో.