౫. సుక్కాథేరీఅపదానం

౧౧౧. ‘‘ఏకనవుతితో కప్పే, విపస్సీ నామ నాయకో;

ఉప్పజ్జి చారుదస్సనో, సబ్బధమ్మవిపస్సకో.

౧౧౨. ‘‘తదాహం బన్ధుమతియం, జాతా అఞ్ఞతరే కులే;

ధమ్మం సుత్వాన మునినో, పబ్బజిం అనగారియం.

౧౧౩. ‘‘బహుస్సుతా ధమ్మధరా, పటిభానవతీ తథా;

విచిత్తకథికా చాపి, జినసాసనకారికా.

౧౧౪. ‘‘తదా ధమ్మకథం కత్వా, హితాయ జనతం బహుం [జనతాయ హితం బహుం (సీ.) … సదా (స్యా.), హితాయ జనసంసరిం (పీ.)];

తతో చుతాహం తుసితం, ఉపపన్నా యసస్సినీ.

౧౧౫. ‘‘ఏకతింసే ఇతో కప్పే, సిఖీ వియ సిఖీ జినో;

తపన్తో యససా లోకే [లోకం (స్యా. పీ.)], ఉప్పజ్జి వదతం వరో.

౧౧౬. ‘‘తదాపి పబ్బజిత్వాన, బుద్ధసాసనకోవిదా;

జోతేత్వా జినవాక్యాని, తతోపి తిదివం గతా.

౧౧౭. ‘‘ఏకతింసేవ కప్పమ్హి, వేస్సభూ నామ నాయకో;

ఉప్పజ్జిత్థ మహాఞాణీ, తదాపి చ తథేవహం.

౧౧౮. ‘‘పబ్బజిత్వా ధమ్మధరా, జోతయిం జినసాసనం;

గన్త్వా మరుపురం రమ్మం, అనుభోసిం మహాసుఖం.

౧౧౯. ‘‘ఇమమ్హి భద్దకే కప్పే, కకుసన్ధో జినుత్తమో;

ఉప్పజ్జి నరసరణో [నరసద్దూలో (సీ. స్యా. పీ.)], తదాపి చ తథేవహం.

౧౨౦. ‘‘పబ్బజిత్వా మునిమతం, జోతయిత్వా యథాయుకం;

తతో చుతాహం తిదివం, అగం సభవనం యథా.

౧౨౧. ‘‘ఇమస్మింయేవ కప్పమ్హి, కోణాగమననాయకో;

ఉప్పజ్జి లోకసరణో, అరణో అమతఙ్గతో [వదతం వరో, సబ్బసత్తానముత్తమో (స్యా.)].

౧౨౨. ‘‘తదాపి పబ్బజిత్వాన, సాసనే తస్స తాదినో;

బహుస్సుతా ధమ్మధరా, జోతయిం జినసాసనం.

౧౨౩. ‘‘ఇమస్మింయేవ కప్పమ్హి, కస్సపో మునిముత్తమో;

ఉప్పజ్జి లోకసరణో, అరణో మరణన్తగూ.

౧౨౪. ‘‘తస్సాపి నరవీరస్స, పబ్బజిత్వాన సాసనే;

పరియాపుటసద్ధమ్మా, పరిపుచ్ఛావిసారదా.

౧౨౫. ‘‘సుసీలా లజ్జినీ చేవ, తీసు సిక్ఖాసు కోవిదా;

బహుం ధమ్మకథం కత్వా, యావజీవం మహామునే.

౧౨౬. ‘‘తేన కమ్మవిపాకేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౧౨౭. ‘‘పచ్ఛిమే చ భవే దాని, గిరిబ్బజపురుత్తమే;

జాతా సేట్ఠికులే ఫీతే, మహారతనసఞ్చయే.

౧౨౮. ‘‘యదా భిక్ఖుసహస్సేన, పరివుతో లోకనాయకో;

ఉపాగమి రాజగహం, సహస్సక్ఖేన వణ్ణితో.

౧౨౯. ‘‘‘దన్తో దన్తేహి సహ పురాణజటిలేహి, విప్పముత్తో విప్పముత్తేహి;

సిఙ్గీనిక్ఖసవణ్ణో, రాజగహం పావిసి భగవా’.

౧౩౦. ‘‘దిస్వా బుద్ధానుభావం తం, సుత్వావ గుణసఞ్చయం;

బుద్ధే చిత్తం పసాదేత్వా, పూజయిం తం యథాబలం.

౧౩౧. ‘‘అపరేన చ కాలేన, ధమ్మదిన్నాయ సన్తికే;

అగారా నిక్ఖమిత్వాన, పబ్బజిం అనగారియం.

౧౩౨. ‘‘కేసేసు ఛిజ్జమానేసు, కిలేసే ఝాపయిం అహం;

ఉగ్గహిం సాసనం సబ్బం, పబ్బజిత్వాచిరేనహం.

౧౩౩. ‘‘తతో ధమ్మమదేసేసిం, మహాజనసమాగమే;

ధమ్మే దేసియమానమ్హి, ధమ్మాభిసమయో అహు.

౧౩౪. ‘‘నేకపాణసహస్సానం, తం విదిత్వాతివిమ్హితో;

అభిప్పసన్నో మే యక్ఖో, భమిత్వాన గిరిబ్బజం.

౧౩౫. ‘‘కిం మే కతా రాజగహే మనుస్సా, మధుం పీతావ అచ్ఛరే;

యే సుక్కం న ఉపాసన్తి, దేసేన్తిం అమతం పదం.

౧౩౬. ‘‘తఞ్చ అప్పటివానీయం, అసేచనకమోజవం;

పివన్తి మఞ్ఞే సప్పఞ్ఞా, వలాహకమివద్ధగూ.

౧౩౭. ‘‘ఇద్ధీసు చ వసీ హోమి, దిబ్బాయ సోతధాతుయా;

చేతోపరియఞాణస్స, వసీ హోమి మహామునే.

౧౩౮. ‘‘పుబ్బేనివాసం జానామి, దిబ్బచక్ఖు విసోధితం;

సబ్బాసవపరిక్ఖీణా, నత్థి దాని పునబ్భవో.

౧౩౯. ‘‘అత్థధమ్మనిరుత్తీసు, పటిభానే తథేవ చ;

ఞాణం మమ మహావీర, ఉప్పన్నం తవ సన్తికే.

౧౪౦. ‘‘కిలేసా ఝాపితా మయ్హం…పే… విహరామి అనాసవా.

౧౪౧. ‘‘స్వాగతం వత మే ఆసి…పే… కతం బుద్ధస్స సాసనం.

౧౪౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం సుక్కా భిక్ఖునీ ఇమా గాథాయో అభాసిత్థాతి.

సుక్కాథేరియాపదానం పఞ్చమం.

పఞ్చమం భాణవారం.