౬. అభిరూపనన్దాథేరీఅపదానం

౧౪౩. ‘‘ఏకనవుతితో కప్పే, విపస్సీ నామ నాయకో;

ఉప్పజ్జి చారుదస్సనో, సబ్బధమ్మేసు చక్ఖుమా.

౧౪౪. ‘‘తదాహం బన్ధుమతియం, ఇద్ధే ఫీతే మహాకులే;

జాతా సురూపా దయితా, పూజనీయా జనస్స చ.

౧౪౫. ‘‘ఉపగన్త్వా మహావీరం, విపస్సిం లోకనాయకం;

ధమ్మం సుణిత్వా సరణం, ఉపేసిం నరనాయకం.

౧౪౬. ‘‘సీలేసు సంవుతా హుత్వా, నిబ్బుతే చ నరుత్తమే;

ధాతుథూపస్స ఉపరి, సోణ్ణచ్ఛత్తమపూజయిం.

౧౪౭. ‘‘ముత్తచాగా సీలవతీ, యావజీవం తతో చుతా;

జహిత్వా మానుసం దేహం, తావతింసూపగా అహం.

౧౪౮. ‘‘తదా దసహి ఠానేహి, అధిభోత్వాన సేసకే [అధిభోత్వా అసేసతో (స్యా.)];

రూపసద్దేహి గన్ధేహి, రసేహి ఫుసనేహి చ.

౧౪౯. ‘‘ఆయునాపి చ వణ్ణేన, సుఖేన యససాపి చ;

తథేవాధిపతేయ్యేన, అధిగయ్హ విరోచహం.

౧౫౦. ‘‘పచ్ఛిమే చ భవే దాని, జాతాహం కపిలవ్హయే;

ధీతా ఖేమకసక్కస్స, నన్దా నామాతి విస్సుతా.

౧౫౧. ‘‘అభిరూపసమ్పదమ్పి [అభిరుపం ఉపపదం (సీ.), అభిరుపం ఉప్పాదం (పీ.)], అహు మే కన్తిసూచకం;

యదాహం యోబ్బనప్పత్తా, రూపలావఞ్ఞభూసితా.

౧౫౨. ‘‘తదా [తదా మమత్థం (సీ.), ఇధ మమత్తే (స్యా. క.)] మత్థే సక్యానం, వివాదో సుమహా అహు;

పబ్బాజేసి తతో తాతో, మా సక్యా వినస్సింసుతి.

౧౫౩. ‘‘పబ్బజిత్వా తథాగతం, రూపదేస్సిం నరుత్తమం;

సుత్వాన నోపగచ్ఛామి, మమ రూపేన గబ్బితా.

౧౫౪. ‘‘ఓవాదమ్పి న గచ్ఛామి, బుద్ధదస్సనభీరుతా;

తదా జినో ఉపాయేన, ఉపనేత్వా ససన్తికం.

౧౫౫. ‘‘తిస్సిత్థియో [తిస్సో థీయో (సీ. పీ.)] నిదస్సేసి, ఇద్ధియా మగ్గకోవిదో;

అచ్ఛరారూపసదిసం, తరుణిం జరితం [జరికం (స్యా. క.)] మతం.

౧౫౬. ‘‘తాయో దిస్వా సుసంవిగ్గా, విరత్తాసే కళేవరే;

అట్ఠాసిం భవనిబ్బిన్దా, తదా మం ఆహ నాయకో.

౧౫౭. ‘‘‘ఆతురం అసుచిం పూతిం, పస్స నన్దే సముస్సయం;

ఉగ్ఘరన్తం పగ్ఘరన్తం, బాలానం అభినన్దితం.

౧౫౮. ‘‘‘అసుభాయ చిత్తం భావేహి, ఏకగ్గం సుసమాహితం;

యథా ఇదం తథా ఏతం, యథా ఏతం తథా ఇదం.

౧౫౯. ‘‘‘ఏవమేతం అవేక్ఖన్తీ, రత్తిన్దివమతన్దితా;

తతో సకాయ పఞ్ఞాయ, అభినిబ్బిజ్ఝ వచ్ఛసి’.

౧౬౦. ‘‘తస్సా మే అప్పమత్తాయ, విచరన్తియా [విచరన్త్వాధ (సీ.), విచినన్తీధ (స్యా. పీ.)] యోనిసో;

యథాభూతం అయం కాయో, దిట్ఠో సన్తరబాహిరో.

౧౬౧. ‘‘అథ నిబ్బిన్దహం కాయే, అజ్ఝత్తఞ్చ విరజ్జహం;

అప్పమత్తా విసంయుత్తా, ఉపసన్తామ్హి నిబ్బుతా.

౧౬౨. ‘‘ఇద్ధీసు చ వసీ హోమి, దిబ్బాయ సోతధాతుయా;

చేతోపరియఞాణస్స, వసీ హోమి మహామునే.

౧౬౩. ‘‘పుబ్బేనివాసం జానామి, దిబ్బచక్ఖు విసోధితం;

సబ్బాసవపరిక్ఖీణా, నత్థి దాని పునబ్భవో.

౧౬౪. ‘‘అత్థధమ్మనిరుత్తీసు, పటిభానే తథేవ చ;

ఞాణం మమ మహావీర, ఉప్పన్నం తవ సన్తికే.

౧౬౫. ‘‘కిలేసా ఝాపితా మయ్హం…పే… విహరామి అనాసవా.

౧౬౬. ‘‘స్వాగతం వత మే ఆసి…పే… కతం బుద్ధస్స సాసనం.

౧౬౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం అభిరూపనన్దా భిక్ఖునీ ఇమా గాథాయో అభాసిత్థాతి.

అభిరూపనన్దాథేరియాపదానం ఛట్ఠం.