౪. సిఙ్గాలమాతుథేరీఅపదానం

౮౨. ‘‘పదుముత్తరో నామ జినో, సబ్బధమ్మాన పారగూ;

ఇతో సతసహస్సమ్హి, కప్పే ఉప్పజ్జి నాయకో.

౮౩. ‘‘తదాహం హంసవతియం, జాతామచ్చకులే అహుం;

నానారతనపజ్జోతే, ఇద్ధే ఫీతే మహద్ధనే.

౮౪. ‘‘పితునా సహ గన్త్వాన, మహాజనపురక్ఖతా;

ధమ్మం బుద్ధస్స సుత్వాన, పబ్బజిం అనగారియం.

౮౫. ‘‘పబ్బజిత్వాన కాయేన, పాపకమ్మం వివజ్జయిం;

వచీదుచ్చరితం హిత్వా, ఆజీవం పరిసోధయిం.

౮౬. ‘‘బుద్ధే పసన్నా ధమ్మే చ, సఙ్ఘే చ తిబ్బగారవా;

సద్ధమ్మస్సవనే యుత్తా, బుద్ధదస్సనలాలసా [బుద్ధదస్సనసాలయా (స్యా.)].

౮౭. ‘‘అగ్గం సద్ధాధిముత్తానం, అస్సోసిం భిక్ఖునిం తదా;

తం ఠానం పత్థయిత్వాన, తిస్సో సిక్ఖా అపూరయిం.

౮౮. ‘‘తతో మం సుగతో ఆహ, కరుణానుగతాసయో;

‘యస్స సద్ధా తథాగతే, అచలా సుప్పతిట్ఠితా;

సీలఞ్చ యస్స కల్యాణం, అరియకన్తం పసంసితం.

౮౯. ‘‘‘సఙ్ఘే పసాదో యస్సత్థి, ఉజుభూతఞ్చ దస్సనం;

అదలిద్దోతి తం ఆహు, అమోఘం తస్స జీవితం.

౯౦. ‘‘‘తస్మా సద్ధఞ్చ సీలఞ్చ, పసాదం ధమ్మదస్సనం;

అనుయుఞ్జేథ మేధావీ, సరం బుద్ధాన [బుద్ధానుసాసనం (సీ.), బుద్ధానం సాసనం (స్యా.)] సాసనం’.

౯౧. ‘‘తం సుత్వాహం పముదితా, అపుచ్ఛిం పణిధిం మమ;

తదా అనోమో అమితో, బ్యాకరిత్థ వినాయకో;

‘బుద్ధే పసన్నా కల్యాణీ, లచ్ఛసే తం సుపత్థితం.

౯౨. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౯౩. ‘‘‘తస్స ధమ్మేసు దాయాదా, ఓరసా ధమ్మనిమ్మితా;

సిఙ్గాలకస్స [సిగాలకస్స (సీ. పీ.)] మాతాతి, హేస్సతి సత్థు సావికా’.

౯౪. ‘‘తం సుత్వా ముదితా హుత్వా, యావజీవం తదా జినం;

మేత్తచిత్తా పరిచరిం, పటిపత్తీహి నాయకం.

౯౫. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౯౬. ‘‘పచ్ఛిమే చ భవే దాని, గిరిబ్బజపురుత్తమే;

జాతా సేట్ఠికులే ఫీతే, మహారతనసఞ్చయే.

౯౭. ‘‘పుత్తో సిఙ్గాలకో నామ, మమాసి విపథే రతో;

దిట్ఠిగహనపక్ఖన్దో, దిసాపూజనతప్పరో.

౯౮. ‘‘నానాదిసా నమస్సన్తం [నమస్సతి (స్యా.)], పిణ్డాయ నగరం వజం;

తం దిస్వా ఓవదీ బుద్ధో, మగ్గే ఠత్వా వినాయకో.

౯౯. ‘‘తస్స దేసయతో ధమ్మం, పనాదో విమ్హయో అహు;

ద్వేకోటినరనారీనం, ధమ్మాభిసమయో అహు.

౧౦౦. ‘‘తదాహం పరిసం గన్త్వా, సుత్వా సుగతభాసితం;

సోతాపత్తిఫలం పత్తా, పబ్బజిం అనగారియం.

౧౦౧. ‘‘న చిరేనేవ కాలేన, బుద్ధదస్సనలాలసా;

అనుస్సతిం తం భావేత్వా, అరహత్తమపాపుణిం.

౧౦౨. ‘‘దస్సనత్థాయ బుద్ధస్స, సబ్బదా చ వజామహం;

అతిత్తాయేవ పస్సామి, రూపం నయననన్దనం.

౧౦౩. ‘‘సబ్బపారమిసమ్భూతం, లక్ఖీనిలయనం వరం;

రూపం సబ్బసుభాకిణ్ణం, అతిత్తా విహరామహం.

౧౦౪. ‘‘జినో తస్మిం గుణే తుట్ఠో, ఏతదగ్గే ఠపేసి మం;

సిఙ్గాలకస్స యా మాతా, అగ్గా సద్ధాధిముత్తికా [సంఘవిముత్తికా (పీ.), మమాధిముత్తికా (క.)].

౧౦౫. ‘‘ఇద్ధీసు చ వసీ హోమి, దిబ్బాయ సోతధాతుయా;

చేతోపరియఞాణస్స, వసీ హోమి మహాముని.

౧౦౬. ‘‘పుబ్బేనివాసం జానామి, దిబ్బచక్ఖు విసోధితం;

సబ్బాసవపరిక్ఖీణా, నత్థి దాని పునబ్భవో.

౧౦౭. ‘‘అత్థధమ్మనిరుత్తీసు, పటిభానే తథేవ చ;

ఞాణం మమ మహావీర, ఉప్పన్నం తవ సన్తికే.

౧౦౮. ‘‘కిలేసా ఝాపితా మయ్హం…పే… విహరామి అనాసవా.

౧౦౯. ‘‘స్వాగతం వత మే ఆసి…పే… కతం బుద్ధస్స సాసనం.

౧౧౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం సిఙ్గాలమాతా భిక్ఖునీ ఇమా గాథాయో అభాసిత్థాతి.

సిఙ్గాలమాతుథేరియాపదానం చతుత్థం.