౩. ఉప్పలదాయికాథేరీఅపదానం

౫౭. ‘‘నగరే అరుణవతియా, అరుణో నామ ఖత్తియో;

తస్స రఞ్ఞో అహుం భరియా, ఏకజ్ఝం చారయామహం.

౫౮. ‘‘రహోగతా నిసీదిత్వా, ఏవం చిన్తేసహం తదా;

‘కుసలం మే కతం నత్థి, ఆదాయ గమియం మమ.

౫౯. ‘‘‘మహాభితాపం కటుకం, ఘోరరూపం సుదారుణం;

నిరయం నూన గచ్ఛామి, ఏత్థ మే నత్థి సంసయో’.

౬౦. ‘‘ఏవాహం చిన్తయిత్వాన, పహంసేత్వాన మానసం;

రాజానం ఉపగన్త్వాన, ఇదం వచనమబ్రవిం.

౬౧. ‘‘‘ఇత్థీ నామ మయం దేవ, పురిసానిత్తరా అహు [పురిసానుగతా సదా (సీ.), పురిసా న భవామ నో (స్యా.), పురిసానం భరా మయం (పీ.)];

ఏకం మే సమణం దేహి, భోజయిస్సామి ఖత్తియ’.

౬౨. ‘‘అదాసి మే తదా రాజా, సమణం భావితిన్ద్రియం;

తస్స పత్తం గహేత్వాన, పరమన్నేన పూరయిం.

౬౩. ‘‘పూరేత్వా పరమం అన్నం, సహ సుగన్ధలేపనం;

మహాచేలేన ఛాదిత్వా, అదాసిం తుట్ఠమానసా.

౬౪. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౬౫. ‘‘సహస్సదేవరాజూనం, మహేసిత్తమకారయిం;

సహస్సచక్కవత్తీనం, మహేసిత్తమకారయిం.

౬౬. ‘‘పదేసరజ్జం విపులం, గణనాతో అసఙ్ఖియం;

నానావిధం బహుం అఞ్ఞం, తస్స కమ్మఫలం తతో.

౬౭. ‘‘ఉప్పలస్సేవ మే వణ్ణో, అభిరూపా సుదస్సనా;

ఇత్థిసబ్బఙ్గసమ్పన్నా, అభిజాతా జుతిన్ధరా.

౬౮. ‘‘పచ్ఛిమే భవే సమ్పత్తే, అజాయిం సాకియే కులే;

నారీసహస్సపామోక్ఖా, సుద్ధోదనసుతస్సహం.

౬౯. ‘‘నిబ్బిన్దిత్వా అగారేహం, పబ్బజిం అనగారియం;

సత్తమీరత్తిసమ్పత్తా [సత్తమింరత్తిమపత్తా (సీ. స్యా. పీ.)], చతుసచ్చమపాపుణిం.

౭౦. ‘‘చీవరం పిణ్డపాతఞ్చ, పచ్చయం సయనాసనం;

పరిమేతుం న సక్కోమి, పిణ్డపాతస్సిదం ఫలం.

౭౧. ‘‘యం మయ్హం పూరితం కమ్మం, కుసలం సరసే ముని;

తుయ్హత్థాయ మహావీర, పరిచత్తం బహుం మయా.

౭౨. ‘‘ఏకత్తింసే ఇతో కప్పే, యం దానమదదిం తదా;

దుగ్గతిం నాభిజానామి, పిణ్డపాతస్సిదం ఫలం.

౭౩. ‘‘ద్వే గతియో పజానామి, దేవత్తం అథ మానుసం;

అఞ్ఞం గతిం న జానామి, పిణ్డపాతస్సిదం ఫలం.

౭౪. ‘‘ఉచ్చే కులే పజాయామి, మహాసాలే [తయో సాల (క.)] మహద్ధనే;

అఞ్ఞే కులే న జాయామి, పిణ్డపాతస్సిదం ఫలం.

౭౫. ‘‘భవాభవే సంసరిత్వా, సుక్కమూలేన చోదితా;

అమనాపం న పస్సామి, సోమనస్సకతం ఫలం.

౭౬. ‘‘ఇద్ధీసు చ వసీ హోమి, దిబ్బాయ సోతధాతుయా;

చేతోపరియఞాణస్స, వసీ హోమి మహామునే.

౭౭. ‘‘పుబ్బేనివాసం జానామి, దిబ్బచక్ఖు విసోధితం;

సబ్బాసవపరిక్ఖీణా, నత్థి దాని పునబ్భవో.

౭౮. ‘‘అత్థధమ్మనిరుత్తీసు, పటిభానే తథేవ చ;

ఞాణం మమ మహావీర, ఉప్పన్నం తవ సన్తికే.

౭౯. ‘‘కిలేసా ఝాపితా మయ్హం…పే… విహరామి అనాసవా.

౮౦. ‘‘స్వాగతం వత మే ఆసి…పే… కతం బుద్ధస్స సాసనం.

౮౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఉప్పలదాయికా భిక్ఖునీ భగవతో సమ్ముఖా ఇమా గాథాయో అభాసిత్థాతి.

ఉప్పలదాయికాథేరియాపదానం తతియం.