౨. చతురాసీతిభిక్ఖునీసహస్సఅపదానం

౧౩. ‘‘చుల్లాసీతిసహస్సాని, బ్రాహ్మఞ్ఞకులసమ్భవా [బ్రాహ్మణకులసమ్భవా (స్యా. క.)];

సుఖుమాలహత్థపాదా, పురే తుయ్హం మహామునే.

౧౪. ‘‘వేస్ససుద్దకులే జాతా, దేవా నాగా చ కిన్నరా;

చాతుద్దీపా బహూ కఞ్ఞా, పురే తుయ్హం మహామునే.

౧౫. ‘‘కాచి పబ్బజితా అత్థి, సబ్బదస్సావినో [సచ్చదస్సావినో (సీ. పీ.)] హూ;

దేవా చ కిన్నరా నాగా, ఫుసిస్సన్తి అనాగతే.

౧౬. ‘‘అనుభోత్వా యసం సబ్బం, పత్వాన సబ్బసమ్పదా;

తుమ్హం [త్వయి (సీ. పీ.)] పసాదం పటిలద్ధా, బుజ్ఝిస్సన్తి అనాగతే.

౧౭. ‘‘అమ్హే బ్రాహ్మణధీతా తు, బ్రాహ్మఞ్ఞకులసమ్భవా;

పేక్ఖతో నో [లక్ఖణా చ (స్యా.)] మహావీర, పాదే వన్దామ చక్ఖుమ.

౧౮. ‘‘ఉపహతా భవా సబ్బే, మూలతణ్హా సమూహతా;

సముచ్ఛిన్నా అనుసయా, పుఞ్ఞసఙ్ఖారదాలితా.

౧౯. ‘‘సమాధిగోచరా సబ్బా, సమాపత్తివసీ కతా;

ఝానేన ధమ్మరతియా, విహరిస్సామ నో సదా.

౨౦. ‘‘భవనేత్తి అవిజ్జా చ, సఙ్ఖారాపి చ ఖేపితా;

సుదుద్దసం పదం గన్త్వా, అనుజానాథ [అనుజానిమ్హ (స్యా. పీ. క.)] నాయక.

౨౧. ‘‘ఉపకారా మమం తుమ్హే, దీఘరత్తం కతావినో;

చతున్నం సంసయం ఛేత్వా, సబ్బా గచ్ఛన్తు నిబ్బుతిం.

౨౨. ‘‘వన్దిత్వా మునినో పాదే, కత్వా ఇద్ధివికుబ్బనం;

కాచి దస్సేన్తి ఆలోకం, అన్ధకారమథాపరా.

౨౩. ‘‘దస్సేన్తి చన్దసూరియే, సాగరఞ్చ సమచ్ఛకం;

సినేరుం పరిభణ్డఞ్చ, దస్సేన్తి పారిఛత్తకం.

౨౪. ‘‘తావతింసఞ్చ భవనం, యామం దస్సేన్తి ఇద్ధియా;

తుసితం నిమ్మితే దేవే, వసవత్తీ మహిస్సరే.

౨౫. ‘‘బ్రహ్మానో కాచి దస్సేన్తి, చఙ్కమఞ్చ మహారహం;

బ్రహ్మవణ్ణఞ్చ మాపేత్వా, ధమ్మం దేసేన్తి సుఞ్ఞతం.

౨౬. ‘‘నానావికుబ్బనం కత్వా, ఇద్ధిం దస్సియ సత్థునో;

దస్సయింసు బలం సబ్బా, పాదే వన్దింసు సత్థునో.

౨౭. ‘‘ఇద్ధీసు చ వసీ హోమ, దిబ్బాయ సోతధాతుయా;

చేతోపరియఞాణస్స, వసీ హోమ మహామునే.

౨౮. ‘‘పుబ్బేనివాసం జానామ, దిబ్బచక్ఖు విసోధితం;

సబ్బాసవపరిక్ఖీణా, నత్థి దాని పునబ్భవో.

౨౯. ‘‘అత్థధమ్మనిరుత్తీసు, పటిభానే తథేవ చ;

ఞాణం అమ్హం మహావీర, ఉప్పన్నం తవ సన్తికే.

౩౦. ‘‘పుబ్బానం లోకనాథానం, సఙ్గమం నో నిదస్సితం;

అధికారం బహుం అమ్హం, తుయ్హత్థాయ మహామునే.

౩౧. ‘‘యం అమ్హేహి కతం కమ్మం, కుసలం సర తం మునే;

తుయ్హత్థాయ మహావీర, పుఞ్ఞానుపచితాని నో.

౩౨. ‘‘సతసహస్సితో కప్పే, పదుముత్తరో మహాముని;

పురం హంసవతీ నామ, సమ్బుద్ధస్స కులాసయం.

౩౩. ‘‘ద్వారేన హంసవతియా, గఙ్గా సన్దతి సబ్బదా;

ఉబ్బళ్హా నదియా భిక్ఖూ, గమనం న లభన్తి తే.

౩౪. ‘‘దివసం ద్వే తయో చేవ, సత్తాహం మాసికం తతో;

చతుమాసమ్పి సమ్పుణ్ణం, గమనం న లభన్తి తే.

౩౫. ‘‘తదా అహు సత్తసారో, జటిలో నామ రట్ఠికో;

ఓరుద్ధే [ఓరతీరే (స్యా.)] భిక్ఖవో దిస్వా, సేతుం గఙ్గాయ కారయి.

౩౬. ‘‘తదా సతసహస్సేహి, సేతుం గఙ్గాయ కారయి;

సఙ్ఘస్స ఓరిమే తీరే, విహారఞ్చ అకారయి.

౩౭. ‘‘ఇత్థియో పురిసా చేవ, ఉచ్చనీచకులాని చ;

తస్స సేతుం విహారఞ్చ [తేసు సేతువిహారేసు (సీ.), తస్స సేతూ విహారే చ (పీ.)], సమభాగం అకంసు తే.

౩౮. ‘‘అమ్హే అఞ్ఞే చ మానుజా, విప్పసన్నేన చేతసా;

తస్స ధమ్మేసు దాయాదా, నగరే జనపదేసు చ.

౩౯. ‘‘ఇత్థీ పుమా కుమారా చ, బహూ చేవ కుమారికా;

సేతునో చ విహారస్స, వాలుకా ఆకిరింసు తే.

౪౦. ‘‘వీథిం సమ్మజ్జనం కత్వా, కదలీపుణ్ణఘటే ధజే;

ధూపం చుణ్ణఞ్చ మాలఞ్చ, కారం కత్వాన సత్థునో.

౪౧. ‘‘సేతువిహారే కారేత్వా, నిమన్తేత్వా వినాయకం;

మహాదానం దదిత్వాన, సమ్బోధిం అభిపత్థయిం.

౪౨. ‘‘పదుముత్తరో మహావీరో, తారకో సబ్బపాణినం;

అనుమోదనీయంకాసి, జటిలస్స మహాముని [కత్వా, వియాకాసి మహాముని (స్యా.)].

౪౩. ‘‘‘సతసహస్సాతిక్కన్తే, కప్పో హేస్సతి భద్దకో;

భవాభవేనుభోత్వాన, పాపుణిస్సతి బోధియం.

౪౪. ‘‘‘కాచి హత్థపరికమ్మం, కతావీ నరనారియో;

అనాగతమ్హి అద్ధానే, సబ్బా హేస్సన్తి సమ్ముఖా’.

౪౫. ‘‘తేన కమ్మవిపాకేన, చేతనాపణిధీహి చ;

ఉప్పన్నా దేవభవనం, తుయ్హం తా పరిచారికా.

౪౬. ‘‘దిబ్బసుఖం అసఙ్ఖియం, మానుసఞ్చ అసఙ్ఖియం;

తుయ్హం తే పరిచారేమ, సంసరిమ్హ భవాభవే.

౪౭. ‘‘సతసహస్సితో కప్పే, సుకతం కమ్మసమ్పదం;

సుఖుమాలీ మనుస్సానం, అథో దేవపురే వరే.

౪౮. ‘‘రూపభోగయసే చేవ, అథో కిత్తిఞ్చ సక్కతం [కిత్తిసుఖం పియం (స్యా.)];

లభామ సతతం సబ్బం, సుకతం కమ్మసమ్పదం.

౪౯. ‘‘పచ్ఛిమే భవే సమ్పత్తే, జాతామ్హ బ్రాహ్మణే కులే;

సుఖుమాలహత్థపాదా, సక్యపుత్తనివేసనే.

౫౦. ‘‘సబ్బకాలమ్పి పథవిం, న పస్సామ న లఙ్కతం;

చిక్ఖల్లభూమిమసుచిం [చిక్ఖల్లం భూమిం గమనం (స్యా.)], న పస్సామ మహామునే.

౫౧. ‘‘అగారం వసన్తే అమ్హే, సక్కారం సబ్బకాలికం;

ఉపనేన్తి సదా సబ్బం, పుబ్బకమ్మఫలేన నో [పుబ్బకమ్మఫలం తతో (సీ. పీ.)].

౫౨. ‘‘అగారం పజహిత్వాన, పబ్బజిత్వానగారియం;

సంసారపథనిత్థిణ్ణా, వీతరాగా భవామసే [నత్థి దాని పునబ్భవో (సీ. స్యా. పీ.)].

౫౩. ‘‘చీవరం పిణ్డపాతఞ్చ, పచ్చయం సయనాసనం;

ఉపనేన్తి సదా అమ్హే, సహస్సాని తతో తతో.

౫౪. ‘‘కిలేసా ఝాపితా అమ్హం…పే… విహరామ అనాసవా.

౫౫. ‘‘స్వాగతం వత నో ఆసి…పే… కతం బుద్ధస్స సాసనం.

౫౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం చతురాసీతిబ్రాహ్మణకఞ్ఞాభిక్ఖునీసహస్సాని భగవతో సమ్ముఖా ఇమా గాథాయో అభాసిత్థాతి.

చతురాసీతిభిక్ఖునీసహస్సాపదానం దుతియం.