౧౦. పేసలాథేరీఅపదానం

౨౨౦. ‘‘ఇమమ్హి భద్దకే కప్పే, బ్రహ్మబన్ధు మహాయసో;

కస్సపో నామ గోత్తేన, ఉప్పజ్జి వదతం వరో.

౨౨౧. ‘‘సావత్థియం పురే వరే, ఉపాసకకులే అహం;

పసూతా తం [నం (స్యా.)] జినవరం, దిస్వా సుత్వా చ దేసనం.

౨౨౨. ‘‘తం వీరం సరణం గన్త్వా, సీలాని చ సమాదియిం;

కదాచి సో మహావీరో, మహాజనసమాగమే.

౨౨౩. ‘‘అత్తనో అభిసమ్బోధిం, పకాసేసి నరాసభో;

అననుస్సుతధమ్మేసు, పుబ్బే దుక్ఖాదికేసు చ.

౨౨౪. ‘‘చక్ఖు ఞాణఞ్చ పఞ్ఞా చ, విజ్జాలోకో చ ఆసి మే;

తం సుత్వా ఉగ్గహేత్వాన, పరిపుచ్ఛిఞ్చ భిక్ఖవో.

౨౨౫. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౨౨౬. ‘‘పచ్ఛిమే చ భవే దాని, జాతా సేట్ఠిమహాకులే;

ఉపేచ్చ బుద్ధం సద్ధమ్మం, సుత్వా సచ్చూపసంహితం.

౨౨౭. ‘‘పబ్బజిత్వాచిరేనేవ, సచ్చత్థాని [సబ్బత్థాని (స్యా. క.)] విచిన్తయం;

ఖేపేత్వా ఆసవే సబ్బే, అరహత్తమపాపుణిం.

౨౨౮. ‘‘ఇద్ధీసు చ వసీ హోమి, దిబ్బాయ సోతధాతుయా;

చేతోపరియఞాణస్స, వసీ హోమి మహామునే.

౨౨౯. ‘‘పుబ్బేనివాసం జానామి, దిబ్బచక్ఖు విసోధితం;

సబ్బాసవపరిక్ఖీణా, నత్థి దాని పునబ్భవో.

౨౩౦. ‘‘అత్థధమ్మనిరుత్తీసు, పటిభానే తథేవ చ;

ఞాణం మే విమలం సుద్ధం, బుద్ధసేట్ఠస్స వాహసా.

౨౩౧. ‘‘కిలేసా ఝాపితా మయ్హం, భవా సబ్బే సమూహతా;

నాగీవ బన్ధనం ఛేత్వా, విహరామి అనాసవా.

౨౩౨. ‘‘స్వాగతం వత మే ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౨౩౩. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం పేసలా [సేలా (స్యా. పీ.)] భిక్ఖునీ ఇమా గాథాయో అభాసిత్థాతి.

పేసలాథేరియాపదానం దసమం.

ఖత్తియావగ్గో చతుత్థో.