౧. యసవతీపముఖఅట్ఠారసభిక్ఖునీసహస్సఅపదానం

౧. ‘‘భవా సబ్బే పరిక్ఖీణా, భవా సన్తి విమోచితా;

సబ్బాసవా చ నో నత్థి, ఆరోచేమ మహామునే.

౨. ‘‘పురిమం కుసలం కమ్మం [పరికమ్మఞ్చ కుసలం (స్యా.)], యం కిఞ్చి సాధుపత్థితం;

పరిభోగమయం దిన్నం, తుయ్హత్థాయ మహామునే.

౩. ‘‘బుద్ధపచ్చేకబుద్ధానం, సావకానఞ్చ పత్థితం [బుద్ధానం సావకానఞ్చ (సీ. క.)];

పరిభోగమయం దిన్నం, తుయ్హత్థాయ మహామునే.

౪. ‘‘ఉచ్చనీచమయం కమ్మం, భిక్ఖూనం సాధుపత్థితం;

ఉచ్చాకులపరికమ్మం, కతమేతం మహామునే [కతమ్హేహి మహామునే (స్యా. పీ.)].

౫. ‘‘తేనేవ సుక్కమూలేన, చోదితా కమ్మసమ్పదా;

మానుసికమతిక్కన్తా, జాయింసు ఖత్తియే కులే.

౬. ‘‘ఉప్పత్తే చ కతే కమ్మే, జాతియా వాపి ఏకతో;

పచ్ఛిమే ఏకతో జాతా, ఖత్తియా కులసమ్భవా.

౭. ‘‘రూపవతీ భోగవతీ, లాభసక్కారపూజితా;

అన్తేపురే మహావీర, దేవానం వియ నన్దనే.

౮. ‘‘నిబ్బిన్దిత్వా అగారమ్హా, పబ్బజిమ్హనగారియం;

కతిపాహం ఉపాదాయ, సబ్బా పత్తామ్హ నిబ్బుతిం.

౯. ‘‘చీవరం పిణ్డపాతఞ్చ, పచ్చయం సయనాసనం;

ఉపనేన్తి బహూ అమ్హే, సదా సక్కతపూజితా.

౧౦. ‘‘కిలేసా ఝాపితా అమ్హం, భవా సబ్బే సమూహతా;

నాగీవ బన్ధనం ఛేత్వా, విహరామ అనాసవా.

౧౧. ‘‘స్వాగతం వత నో ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౧౨. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం యసవతీపముఖాని ఖత్తియకఞ్ఞాభిక్ఖునియో అట్ఠారససహస్సాని భగవతో సమ్ముఖా ఇమా గాథాయో అభాసిత్థాతి.

యసవతీపముఖఅట్ఠారసభిక్ఖునీసహస్సాపదానం పఠమం.