౮. ఖేమాథేరీఅపదానం
౨౮౯. ‘‘పదుముత్తరో నామ జినో, సబ్బధమ్మేసు చక్ఖుమా;
ఇతో సతసహస్సమ్హి, కప్పే ఉప్పజ్జి నాయకో.
౨౯౦. ‘‘తదాహం హంసవతియం, జాతా సేట్ఠికులే అహుం [అహు (స్యా.)];
నానారతనపజ్జోతే, మహాసుఖసమప్పితా.
౨౯౧. ‘‘ఉపేత్వా తం మహావీరం, అస్సోసిం ధమ్మదేసనం;
తతో జాతప్పసాదాహం, ఉపేమి సరణం జినం.
౨౯౨. ‘‘మాతరం పితరం చాహం, ఆయాచిత్వా వినాయకం;
నిమన్తయిత్వా సత్తాహం, భోజయిం సహసావకం.
౨౯౩. ‘‘అతిక్కన్తే చ సత్తాహే, మహాపఞ్ఞానముత్తమం;
భిక్ఖునిం ఏతదగ్గమ్హి, ఠపేసి నరసారథి.
౨౯౪. ‘‘తం సుత్వా ముదితా హుత్వా, పునో తస్స మహేసినో;
కారం కత్వాన తం ఠానం, పణిపచ్చ పణీదహిం.
౨౯౫. ‘‘తతో మమ జినో [మం స జినో (స్యా.)] ఆహ, ‘సిజ్ఝతం పణిధీ తవ;
ససఙ్ఘే మే కతం కారం, అప్పమేయ్యఫలం తయా.
౨౯౬. ‘‘‘సతసహస్సితో కప్పే, ఓక్కాకకులసమ్భవో;
గోతమో నామ గోత్తేన, సత్థా లోకే భవిస్సతి.
౨౯౭. ‘‘‘తస్స ధమ్మేసు దాయాదా, ఓరసా ధమ్మనిమ్మితా;
ఏతదగ్గమనుప్పత్తా, ఖేమా నామ భవిస్సతి’.
౨౯౮. ‘‘తేన కమ్మేన సుకతేన, చేతనాపణిధీహి చ;
జహిత్వా మానుసం దేహం, తావతింసూపగా అహం.
౨౯౯. ‘‘తతో చుతా యామమగం, తతోహం తుసితం గతా;
తతో చ నిమ్మానరతిం, వసవత్తిపురం తతో.
౩౦౦. ‘‘యత్థ యత్థూపపజ్జామి, తస్స కమ్మస్స వాహసా;
తత్థ తత్థేవ రాజూనం, మహేసిత్తమకారయిం.
౩౦౧. ‘‘తతో చుతా మనుస్సత్తే, రాజూనం చక్కవత్తినం;
మణ్డలీనఞ్చ రాజూనం, మహేసిత్తమకారయిం.
౩౦౨. ‘‘సమ్పత్తిం అనుభోత్వాన, దేవేసు మనుజేసు చ;
సబ్బత్థ సుఖితా హుత్వా, నేకకప్పేసు సంసరిం.
౩౦౩. ‘‘ఏకనవుతితో కప్పే, విపస్సీ లోకనాయకో;
ఉప్పజ్జి చారుదస్సనో [చారునయనో (సీ. పీ.)], సబ్బధమ్మవిపస్సకో.
౩౦౪. ‘‘తమహం లోకనాయకం, ఉపేత్వా నరసారథిం;
ధమ్మం భణితం సుత్వాన, పబ్బజిం అనగారియం.
౩౦౫. ‘‘దసవస్ససహస్సాని, తస్స వీరస్స సాసనే;
బ్రహ్మచరియం చరిత్వాన, యుత్తయోగా బహుస్సుతా.
౩౦౬. ‘‘పచ్చయాకారకుసలా, చతుసచ్చవిసారదా;
నిపుణా చిత్తకథికా, సత్థుసాసనకారికా.
౩౦౭. ‘‘తతో చుతాహం తుసితం, ఉపపన్నా యసస్సినీ;
అభిభోమి తహిం అఞ్ఞే, బ్రహ్మచారీఫలేనహం.
౩౦౮. ‘‘యత్థ యత్థూపపన్నాహం, మహాభోగా మహద్ధనా;
మేధావినీ సీలవతీ [రూపవతీ (సీ. స్యా. పీ.)], వినీతపరిసాపి చ.
౩౦౯. ‘‘భవామి తేన కమ్మేన, యోగేన జినసాసనే;
సబ్బా సమ్పత్తియో మయ్హం, సులభా మనసో పియా.
౩౧౦. ‘‘యోపి మే భవతే భత్తా, యత్థ యత్థ గతాయపి;
విమానేతి న మం కోచి, పటిపత్తిబలేన మే.
౩౧౧. ‘‘ఇమమ్హి భద్దకే కప్పే, బ్రహ్మబన్ధు మహాయసో;
నామేన కోణాగమనో, ఉప్పజ్జి వదతం వరో.
౩౧౨. ‘‘తదా హి బారాణసియం, సుసమిద్ధకులప్పజా [సుసమిద్ధి… (స్యా.)];
ధనఞ్జానీ సుమేధా చ, అహమ్పి చ తయో జనా.
౩౧౩. ‘‘సఙ్ఘారామమదాసిమ్హ, దానసహాయికా పురే [నేకే సహస్సికే మునే (స్యా.), దానం సహస్సికం మునే (పీ.)];
సఙ్ఘస్స చ విహారమ్పి [ససంఘస్స విహారం హి (స్యా. పీ.)], ఉద్దిస్స కారికా [దాయికా (పీ.)] మయం.
౩౧౪. ‘‘తతో చుతా మయం సబ్బా, తావతింసూపగా అహుం;
యససా అగ్గతం పత్తా, మనుస్సేసు తథేవ చ.
౩౧౫. ‘‘ఇమస్మింయేవ కప్పమ్హి, బ్రహ్మబన్ధు మహాయసో;
కస్సపో నామ గోత్తేన, ఉప్పజ్జి వదతం వరో.
౩౧౬. ‘‘ఉపట్ఠాకో మహేసిస్స, తదా ఆసి నరిస్సరో;
కాసిరాజా కికీ నామ, బారాణసిపురుత్తమే.
౩౧౭. ‘‘తస్సాసిం జేట్ఠికా ధీతా, సమణీ ఇతి విస్సుతా;
ధమ్మం సుత్వా జినగ్గస్స, పబ్బజ్జం సమరోచయిం.
౩౧౮. ‘‘అనుజాని న నో తాతో, అగారేవ తదా మయం;
వీసవస్ససహస్సాని, విచరిమ్హ అతన్దితా.
౩౧౯. ‘‘కోమారిబ్రహ్మచరియం, రాజకఞ్ఞా సుఖేధితా;
బుద్ధోపట్ఠాననిరతా, ముదితా సత్త ధీతరో.
౩౨౦. ‘‘సమణీ సమణగుత్తా చ, భిక్ఖునీ భిక్ఖుదాయికా;
ధమ్మా చేవ సుధమ్మా చ, సత్తమీ సఙ్ఘదాయికా.
౩౨౧. ‘‘అహం ఉప్పలవణ్ణా చ, పటాచారా చ కుణ్డలా;
కిసాగోతమీ ధమ్మదిన్నా, విసాఖా హోతి సత్తమీ.
౩౨౨. ‘‘కదాచి సో నరాదిచ్చో, ధమ్మం దేసేసి అబ్భుతం;
మహానిదానసుత్తన్తం, సుత్వా తం పరియాపుణిం.
౩౨౩. ‘‘తేహి కమ్మేహి సుకతేహి, చేతనాపణిధీహి చ;
జహిత్వా మానుసం దేహం, తావతింసమగచ్ఛహం.
౩౨౪. ‘‘పచ్ఛిమే చ భవే దాని, సాకలాయ పురుత్తమే;
రఞ్ఞో మద్దస్స ధీతామ్హి, మనాపా దయితా పియా.
౩౨౫. ‘‘సహ మే జాతమత్తమ్హి, ఖేమం తమ్హి పురే అహు;
తతో ఖేమాతి నామం మే, గుణతో ఉపపజ్జథ.
౩౨౬. ‘‘యదాహం యోబ్బనం పత్తా, రూపలావఞ్ఞభూసితా [రూపవణ్ణవిభూసితా (స్యా.), రూపవన్తా విభూసితా (పీ.), రూపవిలాసభూసితా (క.)];
తదా అదాసి మం తాతో, బిమ్బిసారస్స రాజినో.
౩౨౭. ‘‘తస్సాహం సుప్పియా ఆసిం, రూపకే లాయనే రతా;
రూపానం దోసవాదీతి, న ఉపేసిం మహాదయం.
౩౨౮. ‘‘బిమ్బిసారో తదా రాజా, మమానుగ్గహబుద్ధియా;
వణ్ణయిత్వా వేళువనం, గాయకే గాపయీ మమం.
౩౨౯. ‘‘రమ్మం వేళువనం యేన, న దిట్ఠం సుగతాలయం;
న తేన నన్దనం దిట్ఠం, ఇతి మఞ్ఞామసే మయం.
౩౩౦. ‘‘యేన వేళువనం దిట్ఠం, నరనన్దననన్దనం;
సుదిట్ఠం నన్దనం తేన, అమరిన్దసునన్దనం.
౩౩౧. ‘‘విహాయ నన్దనం దేవా, ఓతరిత్వా మహీతలం [మహీతలే (స్యా. పీ.)];
రమ్మం వేళువనం దిస్వా, న తప్పన్తి సువిమ్హితా.
౩౩౨. ‘‘రాజపుఞ్ఞేన నిబ్బత్తం, బుద్ధపుఞ్ఞేన భూసితం;
కో వత్తా తస్స నిస్సేసం, వనస్స గుణసఞ్చయం.
౩౩౩. ‘‘తం సుత్వా వనసమిద్ధం, మమ సోతమనోహరం;
దట్ఠుకామా తముయ్యానం, రఞ్ఞో ఆరోచయిం తదా.
౩౩౪. ‘‘మహతా పరివారేన, తదా చ సో [తదా మం సో (స్యా. పీ.)] మహీపతి;
మం పేసేసి [సంపేసేసి (స్యా.), సమ్పాపేసి (పీ.)] తముయ్యానం, దస్సనాయ సముస్సుకం.
౩౩౫. ‘‘గచ్ఛ పస్స మహాభోగే, వనం నేత్తరసాయనం;
యం సదా భాతి సిరియా, సుగతాభానురఞ్జితం.
౩౩౬. ‘‘యదా చ పిణ్డాయ ముని, గిరిబ్బజపురుత్తమం;
పవిట్ఠోహం తదాయేవ, వనం దట్ఠుముపాగమిం.
౩౩౭. ‘‘తదా తం ఫుల్లవిపినం, నానాభమరకూజితం;
కోకిలాగీతసహితం, మయూరగణనచ్చితం.
౩౩౮. ‘‘అప్పసద్దమనాకిణ్ణం, నానాచఙ్కమభూసితం;
కుటిమణ్డపసఙ్కిణ్ణం, యోగీవరవిరాజితం.
౩౩౯. ‘‘విచరన్తీ అమఞ్ఞిస్సం, సఫలం నయనం మమ;
తత్థాపి తరుణం భిక్ఖుం, యుత్తం దిస్వా విచిన్తయిం.
౩౪౦. ‘‘‘ఈదిసే విపినే రమ్మే, ఠితోయం నవయోబ్బనే;
వసన్తమివ కన్తేన, రూపేన చ సమన్వితో.
౩౪౧. ‘‘‘నిసిన్నో రుక్ఖమూలమ్హి, ముణ్డో సఙ్ఘాటిపారుతో;
ఝాయతే వతయం భిక్ఖు, హిత్వా విసయజం రతిం.
౩౪౨. ‘‘‘నను నామ గహట్ఠేన, కామం భుత్వా యథాసుఖం;
పచ్ఛా జిణ్ణేన ధమ్మోయం, చరితబ్బో సుభద్దకో’.
౩౪౩. ‘‘సుఞ్ఞకన్తి విదిత్వాన, గన్ధగేహం జినాలయం;
ఉపేత్వా జినమద్దక్ఖం, ఉదయన్తంవ భాకరం.
౩౪౪. ‘‘ఏకకం సుఖమాసీనం, బీజమానం వరిత్థియా;
దిస్వానేవం విచిన్తేసిం, నాయం లూఖో నరాసభో.
౩౪౫. ‘‘సా కఞ్ఞా కనకాభాసా, పదుమాననలోచనా;
బిమ్బోట్ఠీ కున్దదసనా, మనోనేత్తరసాయనా.
౩౪౬. ‘‘హేమదోలాభసవనా [హేమదోలా సువదీనా (స్యా.)], కలికాకారసుత్థనీ [కలసాకారసుత్తనీ (సీ. పీ.), కమలాకారసుత్తనీ (స్యా.)];
వేదిమజ్ఝావ సుస్సోణీ [కనుమజ్ఝావ సుస్సోణీ (సీ.), వేదిమజ్ఝా వరసోణీ (స్యా. పీ.)], రమ్భోరు చారుభూసనా.
౩౪౭. ‘‘రత్తంసకుపసంబ్యానా, నీలమట్ఠనివాసనా;
అతప్పనేయ్యరూపేన, హాసభావసమన్వితా [హావభావసమన్వితా (సీ.), సబ్బాభరణమణ్డితా (స్యా.)].
౩౪౮. ‘‘దిస్వా తమేవం చిన్తేసిం, అహోయమభిరూపినీ;
న మయానేన నేత్తేన, దిట్ఠపుబ్బా కుదాచనం.
౩౪౯. ‘‘తతో జరాభిభూతా సా, వివణ్ణా వికతాననా;
భిన్నదన్తా సేతసిరా, సలాలా వదనాసుచి.
౩౫౦. ‘‘సఙ్ఖిత్తకణ్ణా సేతక్ఖీ, లమ్బాసుభపయోధరా;
వలివితతసబ్బఙ్గీ, సిరావితతదేహినీ.
౩౫౧. ‘‘నతఙ్గా దణ్డదుతియా, ఉప్ఫాసులికతా [ఉప్పణ్డుపణ్డుకా (సీ. స్యా.)] కిసా;
పవేధమానా పతితా, నిస్ససన్తీ ముహుం ముహుం.
౩౫౨. ‘‘తతో మే ఆసి సంవేగో, అబ్భుతో లోమహంసనో;
ధిరత్థు రూపం అసుచిం, రమన్తే యత్థ బాలిసా.
౩౫౩. ‘‘తదా మహాకారుణికో, దిస్వా సంవిగ్గమానసం;
ఉదగ్గచిత్తో సుగతో, ఇమా గాథా అభాసథ.
౩౫౪. ‘‘‘ఆతురం అసుచిం పూతిం, పస్స ఖేమే సముస్సయం;
ఉగ్ఘరన్తం పగ్ఘరన్తం, బాలానం అభినన్దితం.
౩౫౫. ‘‘‘అసుభాయ చిత్తం భావేహి, ఏకగ్గం సుసమాహితం;
సతి కాయగతా త్యత్థు, నిబ్బిదా బహులా భవ.
౩౫౬. ‘‘‘యథా ఇదం తథా ఏతం, యథా ఏతం తథా ఇదం;
అజ్ఝత్తఞ్చ బహిద్ధా చ, కాయే ఛన్దం విరాజయ.
౩౫౭. ‘‘‘అనిమిత్తఞ్చ భావేహి, మానానుసయముజ్జహ;
తతో మానాభిసమయా, ఉపసన్తా చరిస్ససి.
౩౫౮. ‘‘‘యే రాగరత్తానుపతన్తి సోతం, సయం కతం మక్కటకోవ జాలం;
ఏతమ్పి ఛేత్వాన పరిబ్బజన్తి, న పేక్ఖినో [అనపేక్ఖినో (సీ. స్యా. పీ.)] కామసుఖం పహాయ’.
౩౫౯. ‘‘తతో కల్లితచిత్తం [కల్లికచిత్తం (స్యా.), కలికచిత్తం (పీ.)] మం, ఞత్వాన నరసారథి;
మహానిదానం దేసేసి, సుత్తన్తం వినయాయ మే.
౩౬౦. ‘‘సుత్వా సుత్తన్తసేట్ఠం తం, పుబ్బసఞ్ఞమనుస్సరిం;
తత్థ ఠితావహం సన్తీ, ధమ్మచక్ఖుం విసోధయిం.
౩౬౧. ‘‘నిపతిత్వా మహేసిస్స, పాదమూలమ్హి తావదే;
అచ్చయం దేసనత్థాయ, ఇదం వచనమబ్రవిం.
౩౬౨. ‘‘‘నమో తే సబ్బదస్సావీ, నమో తే కరుణాకర;
నమో తే తిణ్ణసంసార, నమో తే అమతం దద.
౩౬౩. ‘‘‘దిట్ఠిగహనపక్ఖన్దా [… పక్ఖన్తా (సీ. స్యా.)], కామరాగవిమోహితా;