౯. ఉప్పలవణ్ణాథేరీఅపదానం

౩౮౪. ‘‘భిక్ఖునీ ఉప్పలవణ్ణా, ఇద్ధియా పారమిం గతా;

వన్దిత్వా సత్థునో పాదే, ఇదం వచనమబ్రవి.

౩౮౫. ‘‘‘నిత్థిణ్ణా జాతిసంసారం [జాతిసంసారా (పీ.)], పత్తాహం అచలం పదం;

సబ్బదుక్ఖం మయా ఖీణం, ఆరోచేమి మహాముని.

౩౮౬. ‘‘‘యావతా పరిసా అత్థి, పసన్నా జినసాసనే;

యస్సా చ మేపరాధోత్థి, ఖమన్తు జినసమ్ముఖా.

౩౮౭. ‘‘‘సంసారే సంసరన్తియా [సంసరన్తా మే (స్యా.)], ఖలితం మే సచే భవే;

ఆరోచేమి మహావీర, అపరాధం ఖమస్సు తం [మే (స్యా.)].

౩౮౮. ‘‘‘ఇద్ధిఞ్చాపి నిదస్సేహి, మమ సాసనకారికే;

చతస్సో పరిసా అజ్జ, కఙ్ఖం ఛిన్దాహి యావతా.

౩౮౯. ‘‘‘ధీతా తుయ్హం మహావీర, పఞ్ఞవన్త జుతిన్ధర;

బహుఞ్చ దుక్కరం కమ్మం, కతం మే అతిదుక్కరం.

౩౯౦. ‘‘‘ఉప్పలస్సేవ మే వణ్ణో, నామేనుప్పలనామికా;

సావికా తే మహావీర, పాదే వన్దామి చక్ఖుమ.

౩౯౧. ‘‘‘రాహులో చ అహఞ్చేవ, నేకజాతిసతే బహూ;

ఏకస్మిం సమ్భవే జాతా, సమానఛన్దమానసా.

౩౯౨. ‘‘‘నిబ్బత్తి ఏకతో హోతి, జాతియాపి చ ఏకతో [జాతీసు బహుసో మమ (సీ.)];

పచ్ఛిమే భవే సమ్పత్తే, ఉభోపి నానాసమ్భవా.

౩౯౩. ‘‘‘పుత్తో చ రాహులో నామ, ధీతా ఉప్పలసవ్హయా;

పస్స వీర మమం ఇద్ధిం, బలం దస్సేమి సత్థునో.

౩౯౪. ‘‘‘మహాసముద్దే చతురో, పక్ఖిపి హత్థపాతియం;

తేలం హత్థగతఞ్చేవ, ఖిడ్డో [వేజ్జో (సీ. పీ.)] కోమారకో యథా.

౩౯౫. ‘‘‘ఉబ్బత్తయిత్వా పథవిం, పక్ఖిపి హత్థపాతియం;

చిత్తం ముఞ్జం యథా నామ, లుఞ్చి కోమారకో యువా.

౩౯౬. ‘‘‘చక్కవాళసమం పాణిం, ఛాదయిత్వాన మత్థకే;

వస్సాపేత్వాన ఫుసితం, నానావణ్ణం పునప్పునం.

౩౯౭. ‘‘‘భూమిం ఉదుక్ఖలం కత్వా, ధఞ్ఞం కత్వాన సక్ఖరం;

సినేరుం ముసలం కత్వా, మద్ది కోమారికా యథా.

౩౯౮. ‘‘‘ధీతాహం బుద్ధసేట్ఠస్స, నామేనుప్పలసవ్హయా;

అభిఞ్ఞాసు వసీభూతా, తవ సాసనకారికా.

౩౯౯. ‘‘‘నానావికుబ్బనం కత్వా, దస్సేత్వా లోకనాయకం;

నామగోత్తఞ్చ సావేత్వా [పకాసేత్వా (స్యా.)], పాదే వన్దామి చక్ఖుమ.

౪౦౦. ‘‘‘ఇద్ధీసు చ వసీ హోమి, దిబ్బాయ సోతధాతుయా;

చేతోపరియఞాణస్స, వసీ హోమి మహామునే.

౪౦౧. ‘‘‘పుబ్బేనివాసం జానామి, దిబ్బచక్ఖు విసోధితం;

సబ్బాసవపరిక్ఖీణా, నత్థి దాని పునబ్భవో.

౪౦౨. ‘‘‘అత్థధమ్మనిరుత్తీసు, పటిభానే తథేవ చ;

ఞాణం మే విమలం [విపులం (స్యా.)] సుద్ధం, సభావేన మహేసినో.

౪౦౩. ‘‘‘పురిమానం జినగ్గానం, సఙ్గమం తే నిదస్సితం [సమ్ముఖా చ పరమ్ముఖా (సీ.)];

అధికారం బహుం మయ్హం, తుయ్హత్థాయ మహాముని.

౪౦౪. ‘‘‘యం మయా పూరితం కమ్మం, కుసలం సర మే ముని;

తవత్థాయ మహావీర, పుఞ్ఞం ఉపచితం మయా.

౪౦౫. ‘‘‘అభబ్బట్ఠానే వజ్జేత్వా, వారయన్తీ [పరివజ్జన్తి (సీ.), పరిపాచేన్తో (స్యా.)] అనాచరం;

తవత్థాయ మహావీర, చత్తం మే జీవితుత్తమం.

౪౦౬. ‘‘‘దసకోటిసహస్సాని, అదాసిం మమ జీవితం;

పరిచ్చత్తా చ మే హోమి, తవత్థాయ మహాముని.

౪౦౭. ‘‘‘తదాతివిమ్హితా సబ్బా, సిరసావ కతఞ్జలీ;

అవోచయ్యే కథం ఆసి, అతులిద్ధిపరక్కమా’.

౪౦౮. ‘‘సతసహస్సితో కప్పే, నాగకఞ్ఞా అహం తదా;

విమలా నామ నామేన, కఞ్ఞానం సాధుసమ్మతా.

౪౦౯. ‘‘మహోరగో మహానాగో, పసన్నో జినసాసనే;

పదుముత్తరం మహాతేజం, నిమన్తేసి ససావకం.

౪౧౦. ‘‘రతనమయం మణ్డపం, పల్లఙ్కం రతనామయం;

రతనం వాలుకాకిణ్ణం, ఉపభోగం రతనామయం.

౪౧౧. ‘‘మగ్గఞ్చ పటియాదేసి, రతనద్ధజభూసితం;

పచ్చుగ్గన్త్వాన సమ్బుద్ధం, వజ్జన్తో తూరియేహి సో.

౪౧౨. ‘‘పరిసాహి చ చతూహి [పరిసాహి చతూహి సో (సీ.), పరిసాహి చతస్సో హి (పీ.)], పరివుతో [సహితో (సీ.), ఫరతే (స్యా.), పరేతో (పీ.)] లోకనాయకో;

మహోరగస్స భవనే, నిసీది పరమాసనే.

౪౧౩. ‘‘అన్నం పానం ఖాదనీయం, భోజనఞ్చ మహారహం;

వరం వరఞ్చ పాదాసి, నాగరాజా మహాయసం.

౪౧౪. ‘‘భుఞ్జిత్వాన సమ్బుద్ధో, పత్తం ధోవిత్వా యోనిసో;

అనుమోదనీయంకాసి, నాగకఞ్ఞా మహిద్ధికా.

౪౧౫. ‘‘సబ్బఞ్ఞుం ఫుల్లితం దిస్వా, నాగకఞ్ఞా మహాయసం;

పసన్నం సత్థునో చిత్తం, సునిబన్ధఞ్చ మానసం.

౪౧౬. ‘‘మమఞ్చ చిత్తమఞ్ఞాయ, జలజుత్తమనామకో;

తస్మిం ఖణే మహావీరో, భిక్ఖునిం దస్సయిద్ధియా.

౪౧౭. ‘‘ఇద్ధీ అనేకా దస్సేసి, భిక్ఖునీ సా విసారదా;

పమోదితా వేదజాతా, సత్థారం ఇదమబ్రవి [ఏతదబ్రవిం (స్యా. పీ.)].

౪౧౮. ‘‘‘అద్దసాహం ఇమం ఇద్ధిం, సుమనం ఇతరాయపి;

కథం అహోసి సా వీర, ఇద్ధియా సువిసారదా’.

౪౧౯. ‘‘‘ఓరసా ముఖతో జాతా, ధీతా మమ మహిద్ధికా;

మమానుసాసనికరా, ఇద్ధియా సువిసారదా’.

౪౨౦. ‘‘బుద్ధస్స వచనం సుత్వా, ఏవం పత్థేసహం తదా [తుట్ఠా ఏవం అవోచహం (స్యా.), ఏవమహోసహం తదా (క.)];

అహమ్పి తాదిసా హోమి, ఇద్ధియా సువిసారదా.

౪౨౧. ‘‘పమోదితాహం సుమనా, పత్థే ఉత్తమమానసా [పత్తఉత్తమమానసా (సీ. స్యా. పీ.)];

అనాగతమ్హి అద్ధానే, ఈదిసా హోమి నాయక.

౪౨౨. ‘‘మణిమయమ్హి పల్లఙ్కే, మణ్డపమ్హి పభస్సరే;

అన్నపానేన తప్పేత్వా, ససఙ్ఘం లోకనాయకం.

౪౨౩. ‘‘నాగానం పవరం పుప్ఫం, అరుణం నామ ఉప్పలం;

వణ్ణం మే ఈదిసం హోతు, పూజేసిం లోకనాయకం.

౪౨౪. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౪౨౫. ‘‘తతో చుతాహం మనుజే, ఉపపన్నా సయమ్భునో;

ఉప్పలేహి పటిచ్ఛన్నం, పిణ్డపాతమదాసహం.

౪౨౬. ‘‘ఏకనవుతితో కప్పే, విపస్సీ నామ నాయకో;

ఉప్పజ్జి చారుదస్సనో, సబ్బధమ్మేసు చక్ఖుమా.

౪౨౭. ‘‘సేట్ఠిధీతా తదా హుత్వా, బారాణసిపురుత్తమే;

నిమన్తేత్వాన సమ్బుద్ధం, ససఙ్ఘం లోకనాయకం.

౪౨౮. ‘‘మహాదానం దదిత్వాన, ఉప్పలేహి వినాయకం;

పూజయిత్వా చేతసావ [చ తేహేవ (స్యా. పీ.)], వణ్ణసోభం అపత్థయిం.

౪౨౯. ‘‘ఇమమ్హి భద్దకే కప్పే, బ్రహ్మబన్ధు మహాయసో;

కస్సపో నామ గోత్తేన, ఉప్పజ్జి వదతం వరో.

౪౩౦. ‘‘ఉపట్ఠాకో మహేసిస్స, తదా ఆసి నరిస్సరో;

కాసిరాజా కికీ నామ, బారాణసిపురుత్తమే.

౪౩౧. ‘‘తస్సాసిం దుతియా ధీతా, సమణగుత్తసవ్హయా;

ధమ్మం సుత్వా జినగ్గస్స, పబ్బజ్జం సమరోచయిం.

౪౩౨. ‘‘అనుజాని న నో తాతో, అగారేవ తదా మయం;

వీసవస్ససహస్సాని, విచరిమ్హ అతన్దితా.

౪౩౩. ‘‘కోమారిబ్రహ్మచరియం, రాజకఞ్ఞా సుఖేధితా;

బుద్ధోపట్ఠాననిరతా, ముదితా సత్తధీతరో.

౪౩౪. ‘‘సమణీ సమణగుత్తా చ, భిక్ఖునీ భిక్ఖుదాయికా [భిక్ఖుదాసికా (సీ. స్యా.)];

ధమ్మా చేవ సుధమ్మా చ, సత్తమీ సఙ్ఘదాయికా [సంఘదాసికా (సీ. స్యా.)].

౪౩౫. ‘‘అహం ఖేమా చ సప్పఞ్ఞా, పటాచారా చ కుణ్డలా;

కిసాగోతమీ ధమ్మదిన్నా, విసాఖా హోతి సత్తమీ.

౪౩౬. ‘‘తేహి కమ్మేహి సుకతేహి, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౪౩౭. ‘‘తతో చుతా మనుస్సేసు, ఉపపన్నా మహాకులే;

పీతం మట్ఠం వరం దుస్సం, అదం అరహతో అహం.

౪౩౮. ‘‘తతో చుతారిట్ఠపురే, జాతా విప్పకులే అహం;

ధీతా తిరిటివచ్ఛస్స, ఉమ్మాదన్తీ మనోహరా.

౪౩౯. ‘‘తతో చుతా జనపదే, కులే అఞ్ఞతరే అహం;

పసూతా నాతిఫీతమ్హి, సాలిం గోపేమహం తదా.

౪౪౦. ‘‘దిస్వా పచ్చేకసమ్బుద్ధం, పఞ్చలాజాసతానిహం;

దత్వా పదుమచ్ఛన్నాని, పఞ్చ పుత్తసతానిహం.

౪౪౧. ‘‘పత్థయిం తేపి పత్థేసుం, మధుం దత్వా సయమ్భునో;

తతో చుతా అరఞ్ఞేహం, అజాయిం పదుమోదరే.

౪౪౨. ‘‘కాసిరఞ్ఞో మహేసీహం, హుత్వా సక్కతపూజితా;

అజనిం రాజపుత్తానం, అనూనం సతపఞ్చకం.

౪౪౩. ‘‘యదా తే యోబ్బనప్పత్తా, కీళన్తా జలకీళితం;

దిస్వా ఓపత్తపదుమం, ఆసుం పచ్చేకనాయకా.

౪౪౪. ‘‘సాహం తేహి వినాభూతా, సుతవీరేహి సోకినీ [సుతవరేహి సోకినీ (సీ. స్యా.)];

చుతా ఇసిగిలిపస్సే, గామకమ్హి అజాయిహం.

౪౪౫. ‘‘యదా బుద్ధా సుతమతీ, సుతానం భత్తునోపి చ [కసతం తదా (సీ.), అత్తనోపి చ (స్యా.)];

యాగుం ఆదాయ గచ్ఛన్తీ, అట్ఠ పచ్చేకనాయకే.

౪౪౬. ‘‘భిక్ఖాయ గామం గచ్ఛన్తే, దిస్వా పుత్తే అనుస్సరిం;

ఖీరధారా వినిగ్గచ్ఛి, తదా మే పుత్తపేమసా.

౪౪౭. ‘‘తతో తేసం అదం యాగుం, పసన్నా సేహి పాణిభి;

తతో చుతాహం తిదసం, నన్దనం ఉపపజ్జహం.

౪౪౮. ‘‘అనుభోత్వా సుఖం దుక్ఖం, సంసరిత్వా భవాభవే;

తవత్థాయ మహావీర, పరిచ్చత్తఞ్చ జీవితం.

౪౪౯. ‘‘ఏవం బహువిధం దుక్ఖం, సమ్పత్తీ చ బహుబ్బిధా;

పచ్ఛిమే భవే సమ్పత్తే, జాతా సావత్థియం పురే.

౪౫౦. ‘‘మహాధనసేట్ఠికులే, సుఖితే సజ్జితే తథా;

నానారతనపజ్జోతే, సబ్బకామసమిద్ధినే.

౪౫౧. ‘‘సక్కతా పూజితా చేవ, మానితాపచితా తథా;

రూపసీరిమనుప్పత్తా [రూపసోభగ్గసమ్పన్నా (సీ.)], కులేసు అతిసక్కతా [అభిసమ్మతా (సీ.)].

౪౫౨. ‘‘అతీవ పత్థితా చాసిం, రూపభోగసిరీహి చ;

పత్థితా సేట్ఠిపుత్తేహి, అనేకేహి సతేహిపి.

౪౫౩. ‘‘అగారం పజహిత్వాన, పబ్బజిం అనగారియం;

అడ్ఢమాసే అసమ్పత్తే, చతుసచ్చమపాపుణిం.

౪౫౪. ‘‘ఇద్ధియా అభినిమ్మిత్వా, చతురస్సం రథం అహం;

బుద్ధస్స పాదే వన్దిస్సం, లోకనాథస్స తాదినో.

౪౫౫. ‘‘‘సుపుప్ఫితగ్గం ఉపగమ్మ పాదపం [భిక్ఖునీ (సీ. పీ. క.) థేరీగా. ౨౩౦], ఏకా తువం తిట్ఠసి సాలమూలే;

న చాపి తే దుతియో అత్థి కోచి [న చత్థి తే దుతియా వణ్ణధాతు (సీ. పీ. క.)], బాలే న త్వం భాయసి ధుత్తకానం’.

౪౫౬. ‘‘‘సతం సహస్సానిపి ధుత్తకానం [సహస్సానమ్పి ధుత్తకానం (పీ.) థేరీగా. ౨౩౧], సమాగతా ఏదిసకా భవేయ్యుం;

లోమం న ఇఞ్జే న సమ్పవేధే, కిం మే తువం మార కరిస్ససేకో [న మార భాయామి తవేకికాపి (సీ. క.) … తమేకికాసిం (పీ.)].

౪౫౭. ‘‘‘ఏసా అన్తరధాయామి, కుచ్ఛిం వా పవిసామి తే;

భముకన్తరికాయమ్పి, తిట్ఠన్తిం మం న దక్ఖసి.

౪౫౮. ‘‘‘చిత్తస్మిం వసీభూతామ్హి, ఇద్ధిపాదా సుభావితా;