౧౩. సిరిమణ్డత్థేరగాథా

౪౪౭. [ఉదా. ౪౫; చూళవ. ౩౮౫; పరి. ౩౩౯] ‘‘ఛన్నమతివస్సతి, వివటం నాతివస్సతి;

తస్మా ఛన్నం వివరేథ, ఏవం తం నాతివస్సతి.

౪౪౮. [సం. ని. ౧.౬౬; నేత్తి. ౧౮] ‘‘మచ్చునాబ్భహతో లోకో, జరాయ పరివారితో;

తణ్హాసల్లేన ఓతిణ్ణో, ఇచ్ఛాధూపాయితో సదా.

౪౪౯. ‘‘మచ్చునాబ్భహతో లోకో, పరిక్ఖిత్తో జరాయ చ;

హఞ్ఞతి నిచ్చమత్తాణో, పత్తదణ్డోవ తక్కరో.

౪౫౦. ‘‘ఆగచ్ఛన్తగ్గిఖన్ధావ, మచ్చు బ్యాధి జరా తయో;

పచ్చుగ్గన్తుం బలం నత్థి, జవో నత్థి పలాయితుం.

౪౫౧. ‘‘అమోఘం దివసం కయిరా, అప్పేన బహుకేన వా;

యం యం విజహతే [విరహతే (సీ. పీ.), వివహతే (స్యా.)] రత్తిం, తదూనం తస్స జీవితం.

౪౫౨. ‘‘చరతో తిట్ఠతో వాపి, ఆసీనసయనస్స వా;

ఉపేతి చరిమా రత్తి, న తే కాలో పమజ్జితు’’న్తి.

… సిరిమణ్డో [సిరిమన్దో (సీ.)] థేరో….