౧౪. సబ్బకామిత్థేరగాథా

౪౫౩. ‘‘ద్విపాదకోయం అసుచి, దుగ్గన్ధో పరిహీరతి [పరిహరతి (క.)];

నానాకుణపపరిపూరో, విస్సవన్తో తతో తతో.

౪౫౪. ‘‘మిగం నిలీనం కూటేన, బళిసేనేవ అమ్బుజం;

వానరం వియ లేపేన, బాధయన్తి పుథుజ్జనం.

౪౫౫. ‘‘రూపా సద్దా రసా గన్ధా, ఫోట్ఠబ్బా చ మనోరమా;

పఞ్చ కామగుణా ఏతే, ఇత్థిరూపస్మి దిస్సరే.

౪౫౬. ‘‘యే ఏతా ఉపసేవన్తి, రత్తచిత్తా పుథుజ్జనా;

వడ్ఢేన్తి కటసిం ఘోరం, ఆచినన్తి పునబ్భవం.

౪౫౭. ‘‘యో చేతా పరివజ్జేతి, సప్పస్సేవ పదా సిరో;

సోమం విసత్తికం లోకే, సతో సమతివత్తతి.

౪౫౮. ‘‘కామేస్వాదీనవం దిస్వా, నేక్ఖమ్మం దట్ఠు ఖేమతో;

నిస్సటో సబ్బకామేహి, పత్తో మే ఆసవక్ఖయో’’తి.

… సబ్బకామిత్థేరో….

ఛక్కనిపాతో నిట్ఠితో.