౫. పఞ్చమవగ్గో

౧. కుమారకస్సపత్థేరగాథా

౨౦౧. ‘‘అహో బుద్ధా అహో ధమ్మా, అహో నో సత్థు సమ్పదా;

యత్థ ఏతాదిసం ధమ్మం, సావకో సచ్ఛికాహి’’తి.

౨౦౨. ‘‘అసఙ్ఖేయ్యేసు కప్పేసు, సక్కాయాధిగతా అహూ;

తేసమయం పచ్ఛిమకో, చరిమోయం సముస్సయో;

జాతిమరణసంసారో, నత్థి దాని పునబ్భవో’’తి.

… కుమారకస్సపో థేరో….

౨. ధమ్మపాలత్థేరగాథా

౨౦౩. ‘‘యో హవే దహరో భిక్ఖు, యుఞ్జతి బుద్ధసాసనే;

జాగరో స హి సుత్తేసు [పతిసుత్తేసు (సీ. క.)], అమోఘం తస్స జీవితం.

౨౦౪. ‘‘తస్మా సద్ధఞ్చ సీలఞ్చ, పసాదం ధమ్మదస్సనం;

అనుయుఞ్జేథ మేధావీ, సరం బుద్ధాన సాసన’’న్తి.

… ధమ్మపాలో థేరో….

౩. బ్రహ్మాలిత్థేరగాథా

౨౦౫. ‘‘కస్సిన్ద్రియాని సమథఙ్గతాని, అస్సా యథా సారథినా సుదన్తా;

పహీనమానస్స అనాసవస్స, దేవాపి కస్స [తస్స (బహూసు)] పిహయన్తి తాదినో’’తి.

౨౦౬. [ధ. ప. ౯౪ ధమ్మపదేపి] ‘‘మయ్హిన్ద్రియాని సమథఙ్గతాని, అస్సా యథా సారథినా సుదన్తా;

పహీనమానస్స అనాసవస్స, దేవాపి మయ్హం పిహయన్తి తాదినో’’తి.

… బ్రహ్మాలి థేరో….

౪. మోఘరాజత్థేరగాథా

౨౦౭. ‘‘ఛవిపాపక చిత్తభద్దక, మోఘరాజ సతతం సమాహితో;

హేమన్తికసీతకాలరత్తియో [హేమన్తికకాలరత్తియో (క.)], భిక్ఖు త్వంసి కథం కరిస్ససి’’.

౨౦౮. ‘‘సమ్పన్నసస్సా మగధా, కేవలా ఇతి మే సుతం;

పలాలచ్ఛన్నకో సేయ్యం, యథఞ్ఞే సుఖజీవినో’’తి.

… మోఘరాజా థేరో….

౫. విసాఖపఞ్చాలపుత్తత్థేరగాథా

౨౦౯. ‘‘న ఉక్ఖిపే నో చ పరిక్ఖిపే పరే, ఓక్ఖిపే పారగతం న ఏరయే;

న చత్తవణ్ణం పరిసాసు బ్యాహరే, అనుద్ధతో సమ్మితభాణి సుబ్బతో.

౨౧౦. ‘‘సుసుఖుమనిపుణత్థదస్సినా, మతికుసలేన నివాతవుత్తినా;

సంసేవితవుద్ధసీలినా, నిబ్బానం న హి తేన దుల్లభ’’న్తి.

… విసాఖో పఞ్చాలపుత్తో థేరో ….

౬. చూళకత్థేరగాథా

౨౧౧. ‘‘నదన్తి మోరా సుసిఖా సుపేఖుణా, సునీలగీవా సుముఖా సుగజ్జినో;

సుసద్దలా చాపి మహామహీ అయం, సుబ్యాపితమ్బు సువలాహకం నభం.

౨౧౨. ‘‘సుకల్లరూపో సుమనస్స ఝాయతం [ఝాయితం (స్యా. క.)], సునిక్కమో సాధు సుబుద్ధసాసనే;

సుసుక్కసుక్కం నిపుణం సుదుద్దసం, ఫుసాహి తం ఉత్తమమచ్చుతం పద’’న్తి.

… చూళకో [చూలకో (సీ. అట్ఠ.)] థేరో….

౭. అనూపమత్థేరగాథా

౨౧౩. ‘‘నన్దమానాగతం చిత్తం, సూలమారోపమానకం;

తేన తేనేవ వజసి, యేన సూలం కలిఙ్గరం.

౨౧౪. ‘‘తాహం చిత్తకలిం బ్రూమి, తం బ్రూమి చిత్తదుబ్భకం;

సత్థా తే దుల్లభో లద్ధో, మానత్థే మం నియోజయీ’’తి.

… అనూపమో థేరో….

౮. వజ్జితత్థేరగాథా

౨౧౫. ‘‘సంసరం దీఘమద్ధానం, గతీసు పరివత్తిసం;

అపస్సం అరియసచ్చాని, అన్ధభూతో [అన్ధీభూతో (క.)] పుథుజ్జనో.

౨౧౬. ‘‘తస్స మే అప్పమత్తస్స, సంసారా వినళీకతా;

సబ్బా గతీ సముచ్ఛిన్నా, నత్థి దాని పునబ్భవో’’తి.

… వజ్జితో థేరో….

౯. సన్ధితత్థేరగాథా

౨౧౭. ‘‘అస్సత్థే హరితోభాసే, సంవిరూళ్హమ్హి పాదపే;

ఏకం బుద్ధగతం సఞ్ఞం, అలభిత్థం [అలభిం హం (క.)] పతిస్సతో.

౨౧౮. ‘‘ఏకతింసే ఇతో కప్పే, యం సఞ్ఞమలభిం తదా;

తస్సా సఞ్ఞాయ వాహసా, పత్తో మే ఆసవక్ఖయో’’తి.

… సన్ధితో థేరో….

వగ్గో పఞ్చమో నిట్ఠితో.

తస్సుద్దానం –

కుమారకస్సపో థేరో, ధమ్మపాలో చ బ్రహ్మాలి;

మోఘరాజా విసాఖో చ, చూళకో చ అనూపమో;

వజ్జితో సన్ధితో థేరో, కిలేసరజవాహనోతి.

దుకనిపాతో నిట్ఠితో.