౩. తికనిపాతో

౧. అఙ్గణికభారద్వాజత్థేరగాథా

౨౧౯. ‘‘అయోని సుద్ధిమన్వేసం, అగ్గిం పరిచరిం వనే;

సుద్ధిమగ్గం అజానన్తో, అకాసిం అమరం తపం [అకాసిం అపరం తపం (స్యా.), అకాసిం అమతం తపం (క.)].

౨౨౦. ‘‘తం సుఖేన సుఖం లద్ధం, పస్స ధమ్మసుధమ్మతం;

తిస్సో విజ్జా అనుప్పత్తా, కతం బుద్ధస్స సాసనం.

౨౨౧. ‘‘బ్రహ్మబన్ధు పురే ఆసిం, ఇదాని ఖోమ్హి బ్రాహ్మణో;

తేవిజ్జో న్హాతకో [నహాతకో (సీ. అట్ఠ.)] చమ్హి, సోత్తియో చమ్హి వేదగూ’’తి.

… అఙ్గణికభారద్వాజో థేరో….

౨. పచ్చయత్థేరగాథా

౨౨౨. ‘‘పఞ్చాహాహం పబ్బజితో, సేఖో అప్పత్తమానసో,

విహారం మే పవిట్ఠస్స, చేతసో పణిధీ అహు.

౨౨౩. ‘‘నాసిస్సం న పివిస్సామి, విహారతో న నిక్ఖమే;

నపి పస్సం నిపాతేస్సం, తణ్హాసల్లే అనూహతే.

౨౨౪. ‘‘తస్స మేవం విహరతో, పస్స వీరియపరక్కమం;

తిస్సో విజ్జా అనుప్పత్తా, కతం బుద్ధస్స సాసన’’న్తి.

… పచ్చయో థేరో….

౩. బాకులత్థేరగాథా

౨౨౫. ‘‘యో పుబ్బే కరణీయాని, పచ్ఛా సో కాతుమిచ్ఛతి;

సుఖా సో ధంసతే ఠానా, పచ్ఛా చ మనుతప్పతి.

౨౨౬. ‘‘యఞ్హి కయిరా తఞ్హి వదే, యం న కయిరా న తం వదే;

అకరోన్తం భాసమానం, పరిజానన్తి పణ్డితా.

౨౨౭. ‘‘సుసుఖం వత నిబ్బానం, సమ్మాసమ్బుద్ధదేసితం;

అసోకం విరజం ఖేమం, యత్థ దుక్ఖం నిరుజ్ఝతీ’’తి.

… బాకులో [బాక్కులో (సీ.)] థేరో….

౪. ధనియత్థేరగాథా

౨౨౮. ‘‘సుఖం చే జీవితుం ఇచ్ఛే, సామఞ్ఞస్మిం అపేక్ఖవా;

సఙ్ఘికం నాతిమఞ్ఞేయ్య, చీవరం పానభోజనం.

౨౨౯. ‘‘సుఖం చే జీవితుం ఇచ్ఛే, సామఞ్ఞస్మిం అపేక్ఖవా;

అహి మూసికసోబ్భంవ, సేవేథ సయనాసనం.

౨౩౦. ‘‘సుఖం చే జీవితుం ఇచ్ఛే, సామఞ్ఞస్మిం అపేక్ఖవా;

ఇతరీతరేన తుస్సేయ్య, ఏకధమ్మఞ్చ భావయే’’తి.

… ధనియో థేరో….

౫. మాతఙ్గపుత్తత్థేరగాథా

౨౩౧. ‘‘అతిసీతం అతిఉణ్హం, అతిసాయమిదం అహు;

ఇతి విస్సట్ఠకమ్మన్తే, ఖణా అచ్చేన్తి మాణవే.

౨౩౨. ‘‘యో చ సీతఞ్చ ఉణ్హఞ్చ, తిణా భియ్యో న మఞ్ఞతి;

కరం పురిసకిచ్చాని, సో సుఖా న విహాయతి.

౨౩౩. ‘‘దబ్బం కుసం పోటకిలం, ఉసీరం ముఞ్జపబ్బజం;

ఉరసా పనుదిస్సామి, వివేకమనుబ్రూహయ’’న్తి.

… మాతఙ్గపుత్తో థేరో….

౬. ఖుజ్జసోభితత్థేరగాథా

౨౩౪. ‘‘యే చిత్తకథీ బహుస్సుతా, సమణా పాటలిపుత్తవాసినో;

తేసఞ్ఞతరోయమాయువా, ద్వారే తిట్ఠతి ఖుజ్జసోభితో.

౨౩౫. ‘‘యే చిత్తకథీ బహుస్సుతా, సమణా పాటలిపుత్తవాసినో;

తేసఞ్ఞతరోయమాయువా, ద్వారే తిట్ఠతి మాలుతేరితో.

౨౩౬. ‘‘సుయుద్ధేన సుయిట్ఠేన, సఙ్గామవిజయేన చ;

బ్రహ్మచరియానుచిణ్ణేన, ఏవాయం సుఖమేధతీ’’తి.

… ఖుజ్జసోభితో థేరో….

౭. వారణత్థేరగాథా

౨౩౭. ‘‘యోధ కోచి మనుస్సేసు, పరపాణాని హింసతి;

అస్మా లోకా పరమ్హా చ, ఉభయా ధంసతే నరో.

౨౩౮. ‘‘యో చ మేత్తేన చిత్తేన, సబ్బపాణానుకమ్పతి;

బహుఞ్హి సో పసవతి, పుఞ్ఞం తాదిసకో నరో.

౨౩౯. ‘‘సుభాసితస్స సిక్ఖేథ, సమణూపాసనస్స చ;

ఏకాసనస్స చ రహో, చిత్తవూపసమస్స చా’’తి.

… వారణో థేరో….

౮. వస్సికత్థేరగాథా

౨౪౦. ‘‘ఏకోపి సద్ధో మేధావీ, అస్సద్ధానీధ ఞాతినం;

ధమ్మట్ఠో సీలసమ్పన్నో, హోతి అత్థాయ బన్ధునం.

౨౪౧. ‘‘నిగ్గయ్హ అనుకమ్పాయ, చోదితా ఞాతయో మయా;

ఞాతిబన్ధవపేమేన, కారం కత్వాన భిక్ఖుసు.

౨౪౨. ‘‘తే అబ్భతీతా కాలఙ్కతా, పత్తా తే తిదివం సుఖం;

భాతరో మయ్హం మాతా చ, మోదన్తి కామకామినో’’తి.

… వస్సికో [పస్సికో (సీ. స్యా. పీ.)] థేరో….

౯. యసోజత్థేరగాథా

౨౪౩. ‘‘కాలపబ్బఙ్గసఙ్కాసో, కిసో ధమనిసన్థతో;

మత్తఞ్ఞూ అన్నపానమ్హి, అదీనమనసో నరో’’.

౨౪౪. ‘‘ఫుట్ఠో డంసేహి మకసేహి, అరఞ్ఞస్మిం బ్రహావనే;

నాగో సఙ్గామసీసేవ, సతో తత్రాధివాసయే.

౨౪౫. ‘‘యథా బ్రహ్మా తథా ఏకో, యథా దేవో తథా దువే;

యథా గామో తథా తయో, కోలాహలం తతుత్తరి’’న్తి.

… యసోజో థేరో….

౧౦. సాటిమత్తియత్థేరగాథా

౨౪౬. ‘‘అహు తుయ్హం పురే సద్ధా, సా తే అజ్జ న విజ్జతి;

యం తుయ్హం తుయ్హమేవేతం, నత్థి దుచ్చరితం మమ.

౨౪౭. ‘‘అనిచ్చా హి చలా సద్దా, ఏవం దిట్ఠా హి సా మయా;

రజ్జన్తిపి విరజ్జన్తి, తత్థ కిం జియ్యతే ముని.

౨౪౮. ‘‘పచ్చతి మునినో భత్తం, థోకం థోకం కులే కులే;

పిణ్డికాయ చరిస్సామి, అత్థి జఙ్ఘబలం [జఙ్ఘాబలం (సీ.)] మమా’’తి.

… సాటిమత్తియో థేరో….

౧౧. ఉపాలిత్థేరగాథా

౨౪౯. ‘‘సద్ధాయ అభినిక్ఖమ్మ, నవపబ్బజితో నవో;

మిత్తే భజేయ్య కల్యాణే, సుద్ధాజీవే అతన్దితే.

౨౫౦. ‘‘సద్ధాయ అభినిక్ఖమ్మ, నవపబ్బజితో నవో;

సఙ్ఘస్మిం విహరం భిక్ఖు, సిక్ఖేథ వినయం బుధో.

౨౫౧. ‘‘సద్ధాయ అభినిక్ఖమ్మ, నవపబ్బజితో నవో;

కప్పాకప్పేసు కుసలో, చరేయ్య అపురక్ఖతో’’తి.

… ఉపాలిత్థేరో….

౧౨. ఉత్తరపాలత్థేరగాథా

౨౫౨. ‘‘పణ్డితం వత మం సన్తం, అలమత్థవిచిన్తకం;

పఞ్చ కామగుణా లోకే, సమ్మోహా పాతయింసు మం.

౨౫౩. ‘‘పక్ఖన్దో మారవిసయే, దళ్హసల్లసమప్పితో;

అసక్ఖిం మచ్చురాజస్స, అహం పాసా పముచ్చితుం.

౨౫౪. ‘‘సబ్బే కామా పహీనా మే, భవా సబ్బే పదాలితా [విదాలితా (సీ. పీ. అట్ఠ.)];

విక్ఖీణో జాతిసంసారో, నత్థి దాని పునబ్భవో’’తి.

… ఉత్తరపాలో థేరో….

౧౩. అభిభూతత్థేరగాథా

౨౫౫. ‘‘సుణాథ ఞాతయో సబ్బే, యావన్తేత్థ సమాగతా;

ధమ్మం వో దేసయిస్సామి, దుక్ఖా జాతి పునప్పునం.

౨౫౬. [సం. ని. ౧.౧౮౫] ‘‘ఆరమ్భథ [ఆరభథ (సీ. స్యా.), ఆరబ్భథ (క.)] నిక్కమథ, యుఞ్జథ బుద్ధసాసనే;

ధునాథ మచ్చునో సేనం, నళాగారంవ కుఞ్జరో.

౨౫౭. ‘‘యో ఇమస్మిం ధమ్మవినయే, అప్పమత్తో విహస్సతి [విహేస్సతి (స్యా. పీ.)];

పహాయ జాతిసంసారం, దుక్ఖస్సన్తం కరిస్సతీ’’తి.

… అభిభూతో థేరో….

౧౪. గోతమత్థేరగాథా

౨౫౮. ‘‘సంసరం హి నిరయం అగచ్ఛిస్సం, పేతలోకమగమం పునప్పునం;

దుక్ఖమమ్హిపి తిరచ్ఛానయోనియం, నేకధా హి వుసితం చిరం మయా.

౨౫౯. ‘‘మానుసోపి చ భవోభిరాధితో, సగ్గకాయమగమం సకిం సకిం;

రూపధాతుసు అరూపధాతుసు, నేవసఞ్ఞిసు అసఞ్ఞిసుట్ఠితం.

౨౬౦. ‘‘సమ్భవా సువిదితా అసారకా, సఙ్ఖతా పచలితా సదేరితా;

తం విదిత్వా మహమత్తసమ్భవం, సన్తిమేవ సతిమా సమజ్ఝగ’’న్తి.

… గోతమో థేరో….

౧౫. హారితత్థేరగాథా

౨౬౧. ‘‘యో పుబ్బే కరణీయాని, పచ్ఛా సో కాతుమిచ్ఛతి;

సుఖా సో ధంసతే ఠానా, పచ్ఛా చ మనుతప్పతి.

౨౬౨. ‘‘యఞ్హి కయిరా తఞ్హి వదే, యం న కయిరా న తం వదే;

అకరోన్తం భాసమానం, పరిజానన్తి పణ్డితా.

౨౬౩. ‘‘సుసుఖం వత నిబ్బానం, సమ్మాసమ్బుద్ధదేసితం;

అసోకం విరజం ఖేమం, యత్థ దుక్ఖం నిరుజ్ఝతీ’’తి.

… హారితో థేరో….

౧౬. విమలత్థేరగాథా

౨౬౪. ‘‘పాపమిత్తే వివజ్జేత్వా, భజేయ్యుత్తమపుగ్గలం;

ఓవాదే చస్స తిట్ఠేయ్య, పత్థేన్తో అచలం సుఖం.

౨౬౫. ‘‘పరిత్తం దారుమారుయ్హ, యథా సీదే మహణ్ణవే;

ఏవం కుసీతమాగమ్మ, సాధుజీవీపి సీదతి;

తస్మా తం పరివజ్జేయ్య, కుసీతం హీనవీరియం.

౨౬౬. ‘‘పవివిత్తేహి అరియేహి, పహితత్తేహి ఝాయిభి;

నిచ్చం ఆరద్ధవీరియేహి, పణ్డితేహి సహావసే’’తి.

… విమలో థేరో….

తికనిపాతో నిట్ఠితో.