౪. చతుకనిపాతో

౧. నాగసమాలత్థేరగాథా

౨౬౭. ‘‘అలఙ్కతా సువసనా, మాలినీ చన్దనుస్సదా;

మజ్ఝే మహాపథే నారీ, తురియే నచ్చతి నట్టకీ.

౨౬౮. ‘‘పిణ్డికాయ పవిట్ఠోహం, గచ్ఛన్తో నం ఉదిక్ఖిసం;

అలఙ్కతం సువసనం, మచ్చుపాసంవ ఓడ్డితం.

౨౬౯. ‘‘తతో మే మనసీకారో, యోనిసో ఉదపజ్జథ;

ఆదీనవో పాతురహు, నిబ్బిదా సమతిట్ఠథ [సమ్పతిట్ఠథ (క.)].

౨౭౦. ‘‘తతో చిత్తం విముచ్చి మే, పస్స ధమ్మసుధమ్మతం;

తిస్సో విజ్జా అనుప్పత్తా, కతం బుద్ధస్స సాసన’’న్తి.

… నాగసమాలో థేరో….

౨. భగుత్థేరగాథా

౨౭౧. ‘‘అహం మిద్ధేన పకతో, విహారా ఉపనిక్ఖమిం;

చఙ్కమం అభిరుహన్తో, తత్థేవ పపతిం ఛమా.

౨౭౨. ‘‘గత్తాని పరిమజ్జిత్వా, పునపారుయ్హ చఙ్కమం;

చఙ్కమే చఙ్కమిం సోహం, అజ్ఝత్తం సుసమాహితో.

౨౭౩. ‘‘తతో మే మనసీకారో, యోనిసో ఉదపజ్జథ;

ఆదీనవో పాతురహు, నిబ్బిదా సమతిట్ఠథ.

౨౭౪. ‘‘తతో చిత్తం విముచ్చి మే, పస్స ధమ్మసుధమ్మతం;

తిస్సో విజ్జా అనుప్పత్తా, కతం బుద్ధస్స సాసన’’న్తి.

… భగుత్థేరో….

౩. సభియత్థేరగాథా

౨౭౫. [ధ. ప. ౬ ధమ్మపదేపి] ‘‘పరే చ న విజానన్తి, మయమేత్థ యమామసే;

యే చ తత్థ విజానన్తి, తతో సమ్మన్తి మేధగా.

౨౭౬. ‘‘యదా చ అవిజానన్తా, ఇరియన్త్యమరా వియ;

విజానన్తి చ యే ధమ్మం, ఆతురేసు అనాతురా.

౨౭౭. ‘‘యం కిఞ్చి సిథిలం కమ్మం, సంకిలిట్ఠఞ్చ యం వతం;

సఙ్కస్సరం బ్రహ్మచరియం, న తం హోతి మహప్ఫలం.

౨౭౮. ‘‘యస్స సబ్రహ్మచారీసు, గారవో నూపలబ్భతి;

ఆరకా హోతి సద్ధమ్మా, నభం పుథవియా యథా’’తి.

… సభియో థేరో….

౪. నన్దకత్థేరగాథా

౨౭౯. ‘‘ధిరత్థు పూరే దుగ్గన్ధే, మారపక్ఖే అవస్సుతే;

నవసోతాని తే కాయే, యాని సన్దన్తి సబ్బదా.

౨౮౦. ‘‘మా పురాణం అమఞ్ఞిత్థో, మాసాదేసి తథాగతే;

సగ్గేపి తే న రజ్జన్తి, కిమఙ్గం పన [కిమఙ్గ పన (సీ.)] మానుసే.

౨౮౧. ‘‘యే చ ఖో బాలా దుమ్మేధా, దుమ్మన్తీ మోహపారుతా;

తాదిసా తత్థ రజ్జన్తి, మారఖిత్తమ్హి బన్ధనే.

౨౮౨. ‘‘యేసం రాగో చ దోసో చ, అవిజ్జా చ విరాజితా;

తాదీ తత్థ న రజ్జన్తి, ఛిన్నసుత్తా అబన్ధనా’’తి.

… నన్దకో థేరో….

౫. జమ్బుకత్థేరగాథా

౨౮౩. ‘‘పఞ్చపఞ్ఞాసవస్సాని, రజోజల్లమధారయిం;

భుఞ్జన్తో మాసికం భత్తం, కేసమస్సుం అలోచయిం.

౨౮౪. ‘‘ఏకపాదేన అట్ఠాసిం, ఆసనం పరివజ్జయిం;

సుక్ఖగూథాని చ ఖాదిం, ఉద్దేసఞ్చ న సాదియిం.

౨౮౫. ‘‘ఏతాదిసం కరిత్వాన, బహుం దుగ్గతిగామినం;

వుయ్హమానో మహోఘేన, బుద్ధం సరణమాగమం.

౨౮౬. ‘‘సరణగమనం పస్స, పస్స ధమ్మసుధమ్మతం;

తిస్సో విజ్జా అనుప్పత్తా, కతం బుద్ధస్స సాసన’’న్తి.

… జమ్బుకో థేరో….

౬. సేనకత్థేరగాథా

౨౮౭. ‘‘స్వాగతం వత మే ఆసి, గయాయం గయఫగ్గుయా;

యం అద్దసాసిం సమ్బుద్ధం, దేసేన్తం ధమ్మముత్తమం.

౨౮౮. ‘‘మహప్పభం గణాచరియం, అగ్గపత్తం వినాయకం;

సదేవకస్స లోకస్స, జినం అతులదస్సనం.

౨౮౯. ‘‘మహానాగం మహావీరం, మహాజుతిమనాసవం;

సబ్బాసవపరిక్ఖీణం, సత్థారమకుతోభయం.

౨౯౦. ‘‘చిరసంకిలిట్ఠం వత మం, దిట్ఠిసన్దానబన్ధితం [సన్ధితం (సీ. స్యా.), సన్దితం (పీ. సీ. అట్ఠ.)];

విమోచయి సో భగవా, సబ్బగన్థేహి సేనక’’న్తి.

… సేనకో థేరో….

౭. సమ్భూతత్థేరగాథా

౨౯౧. ‘‘యో దన్ధకాలే తరతి, తరణీయే చ దన్ధయే;

అయోని [అయోనిసో (స్యా.)] సంవిధానేన, బాలో దుక్ఖం నిగచ్ఛతి.

౨౯౨. ‘‘తస్సత్థా పరిహాయన్తి, కాళపక్ఖేవ చన్దిమా;

ఆయసక్యఞ్చ [ఆయసస్యఞ్చ (సీ.)] పప్పోతి, మిత్తేహి చ విరుజ్ఝతి.

౨౯౩. ‘‘యో దన్ధకాలే దన్ధేతి, తరణీయే చ తారయే;

యోనిసో సంవిధానేన, సుఖం పప్పోతి పణ్డితో.

౨౯౪. ‘‘తస్సత్థా పరిపూరేన్తి, సుక్కపక్ఖేవ చన్దిమా;

యసో కిత్తిఞ్చ పప్పోతి, మిత్తేహి న విరుజ్ఝతీ’’తి.

… సమ్భూతో థేరో….

౮. రాహులత్థేరగాథా

౨౯౫. ‘‘ఉభయేనేవ సమ్పన్నో, రాహులభద్దోతి మం విదూ;

యఞ్చమ్హి పుత్తో బుద్ధస్స, యఞ్చ ధమ్మేసు చక్ఖుమా.

౨౯౬. ‘‘యఞ్చ మే ఆసవా ఖీణా, యఞ్చ నత్థి పునబ్భవో;

అరహా దక్ఖిణేయ్యోమ్హి, తేవిజ్జో అమతద్దసో.

౨౯౭. ‘‘కామన్ధా జాలపచ్ఛన్నా, తణ్హాఛాదనఛాదితా;

పమత్తబన్ధునా బద్ధా, మచ్ఛావ కుమినాముఖే.

౨౯౮. ‘‘తం కామం అహముజ్ఝిత్వా, ఛేత్వా మారస్స బన్ధనం;

సమూలం తణ్హమబ్బుయ్హ, సీతిభూతోస్మి నిబ్బుతో’’తి.

… రాహులో థేరో….

౯. చన్దనత్థేరగాథా

౨౯౯. ‘‘జాతరూపేన సఞ్ఛన్నా [పచ్ఛన్నా (సీ.)], దాసీగణపురక్ఖతా;

అఙ్కేన పుత్తమాదాయ, భరియా మం ఉపాగమి.

౩౦౦. ‘‘తఞ్చ దిస్వాన ఆయన్తిం, సకపుత్తస్స మాతరం;

అలఙ్కతం సువసనం, మచ్చుపాసంవ ఓడ్డితం.

౩౦౧. ‘‘తతో మే మనసీకారో, యోనిసో ఉదపజ్జథ;

ఆదీనవో పాతురహు, నిబ్బిదా సమతిట్ఠథ.

౩౦౨. ‘‘తతో చిత్తం విముచ్చి మే, పస్స ధమ్మసుధమ్మతం;

తిస్సో విజ్జా అనుప్పత్తా, కతం బుద్ధస్స సాసన’’న్తి.

… చన్దనో థేరో….

౧౦. ధమ్మికత్థేరగాథా

౩౦౩. [జా. ౧.౧౦.౧౦౨ జాతకేపి] ‘‘ధమ్మో హవే రక్ఖతి ధమ్మచారిం, ధమ్మో సుచిణ్ణో సుఖమావహతి;

ఏసానిసంసో ధమ్మే సుచిణ్ణే, న దుగ్గతిం గచ్ఛతి ధమ్మచారీ.

౩౦౪. [జా. ౧.౧౫.౩౮౫] ‘‘నహి ధమ్మో అధమ్మో చ, ఉభో సమవిపాకినో;

అధమ్మో నిరయం నేతి, ధమ్మో పాపేతి సుగ్గతిం.

౩౦౫. ‘‘తస్మా హి ధమ్మేసు కరేయ్య ఛన్దం, ఇతి మోదమానో సుగతేన తాదినా;

ధమ్మే ఠితా సుగతవరస్స సావకా, నీయన్తి ధీరా సరణవరగ్గగామినో.

౩౦౬. ‘‘విప్ఫోటితో గణ్డమూలో, తణ్హాజాలో సమూహతో;

సో ఖీణసంసారో న చత్థి కిఞ్చనం,

చన్దో యథా దోసినా పుణ్ణమాసియ’’న్తి.

… ధమ్మికో థేరో….

౧౧. సప్పకత్థేరగాథా

౩౦౭. ‘‘యదా బలాకా సుచిపణ్డరచ్ఛదా, కాళస్స మేఘస్స భయేన తజ్జితా;

పలేహితి ఆలయమాలయేసినీ, తదా నదీ అజకరణీ రమేతి మం.

౩౦౮. ‘‘యదా బలాకా సువిసుద్ధపణ్డరా, కాళస్స మేఘస్స భయేన తజ్జితా;

పరియేసతి లేణమలేణదస్సినీ, తదా నదీ అజకరణీ రమేతి మం.

౩౦౯. ‘‘కం ను తత్థ న రమేన్తి, జమ్బుయో ఉభతో తహిం;

సోభేన్తి ఆపగాకూలం, మమ లేణస్స [మహాలేణస్స (స్యా. క.)] పచ్ఛతో.

౩౧౦. ‘‘తా మతమదసఙ్ఘసుప్పహీనా,

భేకా మన్దవతీ పనాదయన్తి;

‘నాజ్జ గిరినదీహి విప్పవాససమయో,

ఖేమా అజకరణీ సివా సురమ్మా’’’తి.

… సప్పకో థేరో….

౧౨. ముదితత్థేరగాథా

౩౧౧. ‘‘పబ్బజిం జీవికత్థోహం, లద్ధాన ఉపసమ్పదం;

తతో సద్ధం పటిలభిం, దళ్హవీరియో పరక్కమిం.

౩౧౨. ‘‘కామం భిజ్జతుయం కాయో, మంసపేసీ విసీయరుం [విసియన్తు (క.)];

ఉభో జణ్ణుకసన్ధీహి, జఙ్ఘాయో పపతన్తు మే.

౩౧౩. ‘‘నాసిస్సం న పివిస్సామి, విహారా చ న నిక్ఖమే;

నపి పస్సం నిపాతేస్సం, తణ్హాసల్లే అనూహతే.

౩౧౪. ‘‘తస్స మేవం విహరతో, పస్స వీరియపరక్కమం;

తిస్సో విజ్జా అనుప్పత్తా, కతం బుద్ధస్స సాసన’’న్తి.

… ముదితో థేరో….

చతుక్కనిపాతో నిట్ఠితో.