౪. చతుత్థవగ్గో

౧. మిగసిరత్థేరగాథా

౧౮౧. ‘‘యతో అహం పబ్బజితో, సమ్మాసమ్బుద్ధసాసనే;

విముచ్చమానో ఉగ్గచ్ఛిం, కామధాతుం ఉపచ్చగం.

౧౮౨. ‘‘బ్రహ్మునో పేక్ఖమానస్స, తతో చిత్తం విముచ్చి మే;

అకుప్పా మే విముత్తీతి, సబ్బసంయోజనక్ఖయా’’తి.

… మిగసిరో థేరో….

౨. సివకత్థేరగాథా

౧౮౩. ‘‘అనిచ్చాని గహకాని, తత్థ తత్థ పునప్పునం;

గహకారం [గహకారకం (సీ. పీ.)] గవేసన్తో, దుక్ఖా జాతి పునప్పునం.

౧౮౪. ‘‘గహకారక దిట్ఠోసి, పున గేహం న కాహసి;

సబ్బా తే ఫాసుకా భగ్గా, థూణికా [థూణిరా (పీ. క.), ధుణిరా (స్యా.)] చ విదాలితా [పదాలితా (సీ. స్యా.)];

విమరియాదికతం చిత్తం, ఇధేవ విధమిస్సతీ’’తి.

… సివకో [సీవకో (సీ.)] థేరో….

౩. ఉపవాణత్థేరగాథా

౧౮౫. ‘‘అరహం సుగతో లోకే, వాతేహాబాధితో [… బాధితో (క.)] ముని;

సచే ఉణ్హోదకం అత్థి, మునినో దేహి బ్రాహ్మణ.

౧౮౬. ‘‘పూజితో పూజనేయ్యానం [పూజనీయానం (సీ.)], సక్కరేయ్యాన సక్కతో;

అపచితోపచేయ్యానం [అపచనీయానం (సీ.), అపచినేయ్యానం (స్యా.)], తస్స ఇచ్ఛామి హాతవే’’తి.

… ఉపవాణో థేరో….

౪. ఇసిదిన్నత్థేరగాథా

౧౮౭. ‘‘దిట్ఠా మయా ధమ్మధరా ఉపాసకా, కామా అనిచ్చా ఇతి భాసమానా;

సారత్తరత్తా మణికుణ్డలేసు, పుత్తేసు దారేసు చ తే అపేక్ఖా.

౧౮౮. ‘‘అద్ధా న జానన్తి యతోధ ధమ్మం, కామా అనిచ్చా ఇతి చాపి ఆహు;

రాగఞ్చ తేసం న బలత్థి ఛేత్తుం, తస్మా సితా పుత్తదారం ధనఞ్చా’’తి.

… ఇసిదిన్నో థేరో….

౫. సమ్బులకచ్చానత్థేరగాథా

౧౮౯. ‘‘దేవో చ వస్సతి దేవో చ గళగళాయతి,

ఏకకో చాహం భేరవే బిలే విహరామి;

తస్స మయ్హం ఏకకస్స భేరవే బిలే విహరతో,

నత్థి భయం వా ఛమ్భితత్తం వా లోమహంసో వా.

౧౯౦. ‘‘ధమ్మతా మమసా యస్స మే, ఏకకస్స భేరవే బిలే;

విహరతో నత్థి భయం వా, ఛమ్భితత్తం వా లోమహంసో వా’’తి.

… సమ్బులకచ్చానో [సమ్బహులకచ్చానో (క.)] థేరో….

౬. నితకత్థేరగాథా

౧౯౧. [ఉదా. ౩౪ ఉదానేపి] ‘‘కస్స సేలూపమం చిత్తం, ఠితం నానుపకమ్పతి;

విరత్తం రజనీయేసు, కుప్పనీయే న కుప్పతి;

యస్సేవం భావితం చిత్తం, కుతో తం దుక్ఖమేస్సతి.

౧౯౨. ‘‘మమ సేలూపమం చిత్తం, ఠితం నానుపకమ్పతి;

విరత్తం రజనీయేసు, కుప్పనీయే న కుప్పతి;

మమేవం భావితం చిత్తం, కుతో మం దుక్ఖమేస్సతీ’’తి.

… నితకో [ఖితకో (సీ. స్యా.)] థేరో….

౭. సోణపోటిరియత్థేరగాథా

౧౯౩. ‘‘న తావ సుపితుం హోతి, రత్తి నక్ఖత్తమాలినీ;

పటిజగ్గితుమేవేసా, రత్తి హోతి విజానతా.

౧౯౪. ‘‘హత్థిక్ఖన్ధావపతితం, కుఞ్జరో చే అనుక్కమే;

సఙ్గామే మే మతం సేయ్యో, యఞ్చే జీవే పరాజితో’’తి.

… సోణో పోటిరియో [సేలిస్సరియో (సీ.), పోట్టిరియపుత్తో (స్యా.)] థేరో ….

౮. నిసభత్థేరగాథా

౧౯౫. ‘‘పఞ్చ కామగుణే హిత్వా, పియరూపే మనోరమే;

సద్ధాయ ఘరా నిక్ఖమ్మ, దుక్ఖస్సన్తకరో భవే.

౧౯౬. ‘‘నాభినన్దామి మరణం, నాభినన్దామి జీవితం;

కాలఞ్చ పటికఙ్ఖామి, సమ్పజానో పతిస్సతో’’తి.

… నిసభో థేరో….

౯. ఉసభత్థేరగాథా

౧౯౭. ‘‘అమ్బపల్లవసఙ్కాసం, అంసే కత్వాన చీవరం;

నిసిన్నో హత్థిగీవాయం, గామం పిణ్డాయ పావిసిం.

౧౯౮. ‘‘హత్థిక్ఖన్ధతో ఓరుయ్హ, సంవేగం అలభిం తదా;

సోహం దిత్తో తదా సన్తో, పత్తో మే ఆసవక్ఖయో’’తి.

… ఉసభో థేరో….

౧౦. కప్పటకురత్థేరగాథా

౧౯౯. ‘‘అయమితి కప్పటో కప్పటకురో, అచ్ఛాయ అతిభరితాయ [అతిభరియాయ (సీ. క.), అచ్చం భరాయ (స్యా.)];

అమతఘటికాయం ధమ్మకటమత్తో [ధమ్మకటపత్తో (స్యా. క. అట్ఠ.), ధమ్మకటమగ్గో (సీ. అట్ఠ.)], కతపదం ఝానాని ఓచేతుం.

౨౦౦. ‘‘మా ఖో త్వం కప్పట పచాలేసి, మా త్వం ఉపకణ్ణమ్హి తాళేస్సం;

న హి [న వా (క.)] త్వం కప్పట మత్తమఞ్ఞాసి, సఙ్ఘమజ్ఝమ్హి పచలాయమానోతి.

… కప్పటకురో థేరో….

వగ్గో చతుత్థో నిట్ఠితో.

తస్సుద్దానం –

మిగసిరో సివకో చ, ఉపవానో చ పణ్డితో;

ఇసిదిన్నో చ కచ్చానో, నితకో చ మహావసీ;

పోటిరియపుత్తో నిసభో, ఉసభో కప్పటకురోతి.