౩. తతియవగ్గో

౧. ఉత్తరత్థేరగాథా

౧౬౧. ‘‘ఖన్ధా మయా పరిఞ్ఞాతా, తణ్హా మే సుసమూహతా;

భావితా మమ బోజ్ఝఙ్గా, పత్తో మే ఆసవక్ఖయో.

౧౬౨. ‘‘సోహం ఖన్ధే పరిఞ్ఞాయ, అబ్బహిత్వాన [అబ్బుహిత్వాన (క.)] జాలినిం;

భావయిత్వాన బోజ్ఝఙ్గే, నిబ్బాయిస్సం అనాసవో’’తి.

… ఉత్తరో థేరో….

౨. భద్దజిత్థేరగాథా

౧౬౩. ‘‘పనాదో నామ సో రాజా, యస్స యూపో సువణ్ణయో;

తిరియం సోళసుబ్బేధో [సోళసపబ్బేధో (సీ. అట్ఠ.), సోళసబ్బాణో (?)], ఉబ్భమాహు [ఉద్ధమాహు (సీ.), ఉచ్చమాహు (స్యా.)] సహస్సధా.

౧౬౪. ‘‘సహస్సకణ్డో సతగేణ్డు, ధజాలు హరితామయో;

అనచ్చుం తత్థ గన్ధబ్బా, ఛసహస్సాని సత్తధా’’తి.

… భద్దజిత్థేరో….

౩. సోభితత్థేరగాథా

౧౬౫. ‘‘సతిమా పఞ్ఞవా భిక్ఖు, ఆరద్ధబలవీరియో;

పఞ్చ కప్పసతానాహం, ఏకరత్తిం అనుస్సరిం.

౧౬౬. ‘‘చత్తారో సతిపట్ఠానే, సత్త అట్ఠ చ భావయం;

పఞ్చ కప్పసతానాహం, ఏకరత్తిం అనుస్సరి’’న్తి.

… సోభితో థేరో….

౪. వల్లియత్థేరగాథా

౧౬౭. ‘‘యం కిచ్చం దళ్హవీరియేన, యం కిచ్చం బోద్ధుమిచ్ఛతా;

కరిస్సం నావరజ్ఝిస్సం [నావరుజ్ఝిస్సం (క. సీ. క.)], పస్స వీరియం పరక్కమ.

౧౬౮. ‘‘త్వఞ్చ మే మగ్గమక్ఖాహి, అఞ్జసం అమతోగధం;

అహం మోనేన మోనిస్సం, గఙ్గాసోతోవ సాగర’’న్తి.

… వల్లియో థేరో….

౫. వీతసోకత్థేరగాథా

౧౬౯. ‘‘కేసే మే ఓలిఖిస్సన్తి, కప్పకో ఉపసఙ్కమి;

తతో ఆదాసమాదాయ, సరీరం పచ్చవేక్ఖిసం.

౧౭౦. ‘‘తుచ్ఛో కాయో అదిస్సిత్థ, అన్ధకారో తమో బ్యగా;

సబ్బే చోళా సముచ్ఛిన్నా, నత్థి దాని పునబ్భవో’’తి.

… వీతసోకో థేరో….

౬. పుణ్ణమాసత్థేరగాథా

౧౭౧. ‘‘పఞ్చ నీవరణే హిత్వా, యోగక్ఖేమస్స పత్తియా;

ధమ్మాదాసం గహేత్వాన, ఞాణదస్సనమత్తనో.

౧౭౨. ‘‘పచ్చవేక్ఖిం ఇమం కాయం, సబ్బం సన్తరబాహిరం;

అజ్ఝత్తఞ్చ బహిద్ధా చ, తుచ్ఛో కాయో అదిస్సథా’’తి.

… పుణ్ణమాసో థేరో….

౭. నన్దకత్థేరగాథా

౧౭౩. ‘‘యథాపి భద్దో ఆజఞ్ఞో, ఖలిత్వా పతితిట్ఠతి;

భియ్యో లద్దాన సంవేగం, అదీనో వహతే ధురం.

౧౭౪. ‘‘ఏవం దస్సనసమ్పన్నం, సమ్మాసమ్బుద్ధసావకం;

ఆజానీయం మం ధారేథ, పుత్తం బుద్ధస్స ఓరస’’న్తి.

… నన్దకో థేరో….

౮. భరతత్థేరగాథా

౧౭౫. ‘‘ఏహి నన్దక గచ్ఛామ, ఉపజ్ఝాయస్స సన్తికం;

సీహనాదం నదిస్సామ, బుద్ధసేట్ఠస్స సమ్ముఖా.

౧౭౬. ‘‘యాయ నో అనుకమ్పాయ, అమ్హే పబ్బాజయీ ముని;

సో నో అత్థో అనుప్పత్తో, సబ్బసంయోజనక్ఖయో’’తి.

… భరతో థేరో….

౯. భారద్వాజత్థేరగాథా

౧౭౭. ‘‘నదన్తి ఏవం సప్పఞ్ఞా, సీహావ గిరిగబ్భరే;

వీరా విజితసఙ్గామా, జేత్వా మారం సవాహనిం [సవాహనం (బహూసు)].

౧౭౮. ‘‘సత్థా చ పరిచిణ్ణో మే, ధమ్మో సఙ్ఘో చ పూజితో;

అహఞ్చ విత్తో సుమనో, పుత్తం దిస్వా అనాసవ’’న్తి.

… భారద్వాజో థేరో….

౧౦. కణ్హదిన్నత్థేరగాథా

౧౭౯. ‘‘ఉపాసితా సప్పురిసా, సుతా ధమ్మా అభిణ్హసో;

సుత్వాన పటిపజ్జిస్సం, అఞ్జసం అమతోగధం.

౧౮౦. ‘‘భవరాగహతస్స మే సతో, భవరాగో పున మే న విజ్జతి;

న చాహు న చ మే భవిస్సతి, న చ మే ఏతరహి విజ్జతీ’’తి.

… కణ్హదిన్నో థేరో….

వగ్గో తతియో నిట్ఠితో.

తస్సుద్దానం –

ఉత్తరో భద్దజిత్థేరో, సోభితో వల్లియో ఇసి;

వీతసోకో చ యో థేరో, పుణ్ణమాసో చ నన్దకో;

భరతో భారద్వాజో చ, కణ్హదిన్నో మహామునీతి.