౩. ఆనన్దత్థేరగాథా

౧౦౧౭. ‘‘పిసుణేన చ కోధనేన చ, మచ్ఛరినా చ విభూతనన్దినా;

సఖితం న కరేయ్య పణ్డితో, పాపో కాపురిసేన సఙ్గమో.

౧౦౧౮. ‘‘సద్ధేన చ పేసలేన చ, పఞ్ఞవతా బహుస్సుతేన చ;

సఖితం కరేయ్య పణ్డితో, భద్దో సప్పురిసేన సఙ్గమో.

౧౦౧౯. ‘‘పస్స చిత్తకతం బిమ్బం…పే… యస్స నత్థి ధువం ఠితి.

౧౦౨౦. ‘‘పస్స చిత్తకతం బిమ్బం…పే… వత్థేహి సోభతి.

౧౦౨౧. ‘‘అలత్తకకతా …పే… నో చ పారగవేసినో.

౧౦౨౨. ‘‘అట్ఠపదకతా…పే… నో చ పారగవేసినో.

౧౦౨౩. ‘‘అఞ్జనీవ నవా…పే… నో చ పారగవేసినో.

౧౦౨౪. ‘‘బహుస్సుతో చిత్తకథీ, బుద్ధస్స పరిచారకో;

పన్నభారో విసఞ్ఞుత్తో, సేయ్యం కప్పేతి గోతమో.

౧౦౨౫. ‘‘ఖీణాసవో విసఞ్ఞుత్తో, సఙ్గాతీతో సునిబ్బుతో;

ధారేతి అన్తిమం దేహం, జాతిమరణపారగూ.

౧౦౨౬. ‘‘యస్మిం పతిట్ఠితా ధమ్మా, బుద్ధస్సాదిచ్చబన్ధునో;

నిబ్బానగమనే మగ్గే, సోయం తిట్ఠతి గోతమో.

౧౦౨౭. ‘‘ద్వాసీతి బుద్ధతో గణ్హిం, ద్వే సహస్సాని భిక్ఖుతో;

చతురాసీతిసహస్సాని, యే మే ధమ్మా పవత్తినో.

౧౦౨౮. ‘‘అప్పస్సుతాయం పురిసో, బలిబద్దోవ జీరతి;

మంసాని తస్స వడ్ఢన్తి, పఞ్ఞా తస్స న వడ్ఢతి.

౧౦౨౯. ‘‘బహుస్సుతో అప్పస్సుతం, యో సుతేనాతిమఞ్ఞతి;

అన్ధో పదీపధారోవ, తథేవ పటిభాతి మం.

౧౦౩౦. ‘‘బహుస్సుతం ఉపాసేయ్య, సుతఞ్చ న వినాసయే;

తం మూలం బ్రహ్మచరియస్స, తస్మా ధమ్మధరో సియా.

౧౦౩౧. ‘‘పుబ్బాపరఞ్ఞూ అత్థఞ్ఞూ, నిరుత్తిపదకోవిదో;

సుగ్గహీతఞ్చ గణ్హాతి, అత్థఞ్చోపపరిక్ఖతి.

౧౦౩౨. ‘‘ఖన్త్యా ఛన్దికతో [ఖన్తియా ఛన్దితో (?)] హోతి, ఉస్సహిత్వా తులేతి తం;

సమయే సో పదహతి, అజ్ఝత్తం సుసమాహితో.

౧౦౩౩. ‘‘బహుస్సుతం ధమ్మధరం, సప్పఞ్ఞం బుద్ధసావకం;

ధమ్మవిఞ్ఞాణమాకఙ్ఖం, తం భజేథ తథావిధం.

౧౦౩౪. ‘‘బహుస్సుతో ధమ్మధరో, కోసారక్ఖో మహేసినో;

చక్ఖు సబ్బస్స లోకస్స, పూజనీయో బహుస్సుతో.

౧౦౩౫. ‘‘ధమ్మారామో ధమ్మరతో, ధమ్మం అనువిచిన్తయం;

ధమ్మం అనుస్సరం భిక్ఖు, సద్ధమ్మా న పరిహాయతి.

౧౦౩౬. ‘‘కాయమచ్ఛేరగరునో [గరుకో (సీ.)], హియ్యమానే [హియ్యమానో (సీ.)] అనుట్ఠహే;

సరీరసుఖగిద్ధస్స, కుతో సమణఫాసుతా.

౧౦౩౭. ‘‘న పక్ఖన్తి దిసా సబ్బా, ధమ్మా న పటిభన్తి మం;

గతే కల్యాణమిత్తమ్హి, అన్ధకారంవ ఖాయతి.

౧౦౩౮. ‘‘అబ్భతీతసహాయస్స, అతీతగతసత్థునో;

నత్థి ఏతాదిసం మిత్తం, యథా కాయగతా సతి.

౧౦౩౯. ‘‘యే పురాణా అతీతా తే, నవేహి న సమేతి మే;

స్వజ్జ ఏకోవ ఝాయామి, వస్సుపేతోవ పక్ఖిమా.

౧౦౪౦. ‘‘దస్సనాయ అభిక్కన్తే, నానావేరజ్జకే బహూ;

మా వారయిత్థ సోతారో, పస్సన్తు సమయో మమం.

౧౦౪౧. ‘‘దస్సనాయ అభిక్కన్తే, నానావేరజ్జకే పుథు;

కరోతి సత్థా ఓకాసం, న నివారేతి చక్ఖుమా.

౧౦౪౨. ‘‘పణ్ణవీసతివస్సాని, సేఖభూతస్స మే సతో;

న కామసఞ్ఞా ఉప్పజ్జి, పస్స ధమ్మసుధమ్మతం.

౧౦౪౩. ‘‘పణ్ణవీసతివస్సాని, సేఖభూతస్స మే సతో;

న దోససఞ్ఞా ఉప్పజ్జి, పస్స ధమ్మసుధమ్మతం.

౧౦౪౪. ‘‘పణ్ణవీసతివస్సాని, భగవన్తం ఉపట్ఠహిం;

మేత్తేన కాయకమ్మేన, ఛాయావ అనపాయినీ [అనుపాయినీ (స్యా. క.)].

౧౦౪౫. ‘‘పణ్ణవీసతివస్సాని, భగవన్తం ఉపట్ఠహిం;

మేత్తేన వచీకమ్మేన, ఛాయావ అనపాయినీ.

౧౦౪౬. ‘‘పణ్ణవీసతివస్సాని, భగవన్తం ఉపట్ఠహిం;

మేత్తేన మనోకమ్మేన, ఛాయావ అనపాయినీ.

౧౦౪౭. ‘‘బుద్ధస్స చఙ్కమన్తస్స, పిట్ఠితో అనుచఙ్కమిం;

ధమ్మే దేసియమానమ్హి, ఞాణం మే ఉదపజ్జథ.

౧౦౪౮. ‘‘అహం సకరణీయోమ్హి, సేఖో అప్పత్తమానసో;

సత్థు చ పరినిబ్బానం, యో అమ్హం అనుకమ్పకో.

౧౦౪౯. ‘‘తదాసి యం భింసనకం, తదాసి లోమహంసనం;

సబ్బాకారవరూపేతే, సమ్బుద్ధే పరినిబ్బుతే.

౧౦౫౦. ‘‘బహుస్సుతో ధమ్మధరో, కోసారక్ఖో మహేసినో;

చక్ఖు సబ్బస్స లోకస్స, ఆనన్దో పరినిబ్బుతో.

౧౦౫౧. ‘‘బహుస్సుతో ధమ్మధరో, కోసారక్ఖో మహేసినో;

చక్ఖు సబ్బస్స లోకస్స, అన్ధకారే తమోనుదో.

౧౦౫౨. ‘‘గతిమన్తో సతిమన్తో, ధితిమన్తో చ యో ఇసి;

సద్ధమ్మధారకో థేరో, ఆనన్దో రతనాకరో.

౧౦౫౩. ‘‘పరిచిణ్ణో మయా సత్థా, కతం బుద్ధస్స సాసనం;

ఓహితో గరుకో భారో, నత్థి దాని పునబ్భవో’’తి.

… ఆనన్దో థేరో….

తింసనిపాతో నిట్ఠితో.