౧౮. చత్తాలీసనిపాతో

౧. మహాకస్సపత్థేరగాథా

౧౦౫౪. ‘‘న గణేన పురక్ఖతో చరే, విమనో హోతి సమాధి దుల్లభో;

నానాజనసఙ్గహో దుఖో, ఇతి దిస్వాన గణం న రోచయే.

౧౦౫౫. ‘‘న కులాని ఉపబ్బజే ముని, విమనో హోతి సమాధి దుల్లభో;

సో ఉస్సుక్కో రసానుగిద్ధో, అత్థం రిఞ్చతి యో సుఖావహో.

౧౦౫౬. ‘‘పఙ్కోతి హి నం అవేదయుం, యాయం వన్దనపూజనా కులేసు;

సుఖుమం సల్ల దురుబ్బహం, సక్కారో కాపురిసేన దుజ్జహో.

౧౦౫౭. ‘‘సేనాసనమ్హా ఓరుయ్హ, నగరం పిణ్డాయ పావిసిం;

భుఞ్జన్తం పురిసం కుట్ఠిం, సక్కచ్చం తం ఉపట్ఠహిం.

౧౦౫౮. ‘‘సో మే [తం (సీ. క.)] పక్కేన హత్థేన, ఆలోపం ఉపనామయి;

ఆలోపం పక్ఖిపన్తస్స, అఙ్గులి చేత్థ [పేత్థ (సీ. క.)] ఛిజ్జథ.

౧౦౫౯. ‘‘కుట్టమూలఞ్చ [కుడ్డమూలఞ్చ (సీ. స్యా.)] నిస్సాయ, ఆలోపం తం అభుఞ్జిసం;

భుఞ్జమానే వా భుత్తే వా, జేగుచ్ఛం మే న విజ్జతి.

౧౦౬౦. ‘‘ఉత్తిట్ఠపిణ్డో ఆహారో, పూతిముత్తఞ్చ ఓసధం;

సేనాసనం రుక్ఖమూలం, పంసుకూలఞ్చ చీవరం;

యస్సేతే అభిసమ్భుత్వా [అభిభుఞ్జతి (?)], స వే చాతుద్దిసో నరో.

౧౦౬౧. ‘‘యత్థ ఏకే విహఞ్ఞన్తి, ఆరుహన్తా సిలుచ్చయం;

తస్స బుద్ధస్స దాయాదో, సమ్పజానో పతిస్సతో;

ఇద్ధిబలేనుపత్థద్ధో, కస్సపో అభిరూహతి.

౧౦౬౨. ‘‘పిణ్డపాతపటిక్కన్తో, సేలమారుయ్హ కస్సపో;

ఝాయతి అనుపాదానో, పహీనభయభేరవో.

౧౦౬౩. ‘‘పిణ్డపాతపటిక్కన్తో, సేలమారుయ్హ కస్సపో;

ఝాయతి అనుపాదానో, డయ్హమానేసు నిబ్బుతో.

౧౦౬౪. ‘‘పిణ్డపాతపటిక్కన్తో, సేలమారుయ్హ కస్సపో;

ఝాయతి అనుపాదానో, కతకిచ్చో అనాసవో.

౧౦౬౫. ‘‘కరేరిమాలావితతా, భూమిభాగా మనోరమా;

కుఞ్జరాభిరుదా రమ్మా, తే సేలా రమయన్తి మం.

౧౦౬౬. ‘‘నీలబ్భవణ్ణా రుచిరా, వారిసీతా సుచిన్ధరా;

ఇన్దగోపకసఞ్ఛన్నా, తే సేలా రమయన్తి మం.

౧౦౬౭. ‘‘నీలబ్భకూటసదిసా, కూటాగారవరూపమా;

వారణాభిరుదా రమ్మా, తే సేలా రమయన్తి మం.

౧౦౬౮. ‘‘అభివుట్ఠా రమ్మతలా, నగా ఇసిభి సేవితా;

అబ్భున్నదితా సిఖీహి, తే సేలా రమయన్తి మం.

౧౦౬౯. ‘‘అలం ఝాయితుకామస్స, పహితత్తస్స మే సతో;

అలం మే అత్థకామస్స [అత్తకామస్స (?)], పహితత్తస్స భిక్ఖునో.

౧౦౭౦. ‘‘అలం మే ఫాసుకామస్స, పహితత్తస్స భిక్ఖునో;

అలం మే యోగకామస్స, పహితత్తస్స తాదినో.

౧౦౭౧. ‘‘ఉమాపుప్ఫేన సమానా, గగనావబ్భఛాదితా;

నానాదిజగణాకిణ్ణా, తే సేలా రమయన్తి మం.

౧౦౭౨. ‘‘అనాకిణ్ణా గహట్ఠేహి, మిగసఙ్ఘనిసేవితా;

నానాదిజగణాకిణ్ణా, తే సేలా రమయన్తి మం.

౧౦౭౩. ‘‘అచ్ఛోదికా పుథుసిలా, గోనఙ్గులమిగాయుతా;

అమ్బుసేవాలసఞ్ఛన్నా, తే సేలా రమయన్తి మం.

౧౦౭౪. ‘‘న పఞ్చఙ్గికేన తురియేన, రతి మే హోతి తాదిసీ;

యథా ఏకగ్గచిత్తస్స, సమ్మా ధమ్మం విపస్సతో.

౧౦౭౫. ‘‘కమ్మం బహుకం న కారయే, పరివజ్జేయ్య జనం న ఉయ్యమే;

ఉస్సుక్కో సో రసానుగిద్ధో, అత్థం రిఞ్చతి యో సుఖావహో.

౧౦౭౬. ‘‘కమ్మం బహుకం న కారయే, పరివజ్జేయ్య అనత్తనేయ్యమేతం;

కిచ్ఛతి కాయో కిలమతి, దుక్ఖితో సో సమథం న విన్దతి.

౧౦౭౭. ‘‘ఓట్ఠప్పహతమత్తేన, అత్తానమ్పి న పస్సతి;

పత్థద్ధగీవో చరతి, అహం సేయ్యోతి మఞ్ఞతి.

౧౦౭౮. ‘‘అసేయ్యో సేయ్యసమానం, బాలో మఞ్ఞతి అత్తానం;

న తం విఞ్ఞూ పసంసన్తి, పత్థద్ధమానసం నరం.

౧౦౭౯. ‘‘యో చ సేయ్యోహమస్మీతి, నాహం సేయ్యోతి వా పన;

హీనో తంసదిసో [తీనోహం సదిసో (స్యా.)] వాతి, విధాసు న వికమ్పతి.

౧౦౮౦. ‘‘పఞ్ఞవన్తం తథా తాదిం, సీలేసు సుసమాహితం;

చేతోసమథమనుత్తం, తఞ్చే విఞ్ఞూ పసంసరే.

౧౦౮౧. ‘‘యస్స సబ్రహ్మచారీసు, గారవో నూపలబ్భతి;

ఆరకా హోతి సద్ధమ్మా, నభతో పుథవీ యథా.

౧౦౮౨. ‘‘యేసఞ్చ హిరి ఓత్తప్పం, సదా సమ్మా ఉపట్ఠితం;

విరూళ్హబ్రహ్మచరియా తే, తేసం ఖీణా పునబ్భవా.

౧౦౮౩. ‘‘ఉద్ధతో చపలో భిక్ఖు, పంసుకూలేన పారుతో;

కపీవ సీహచమ్మేన, న సో తేనుపసోభతి.

౧౦౮౪. ‘‘అనుద్ధతో అచపలో, నిపకో సంవుతిన్ద్రియో;

సోభతి పంసుకూలేన, సీహోవ గిరిగబ్భరే.

౧౦౮౫. ‘‘ఏతే సమ్బహులా దేవా, ఇద్ధిమన్తో యసస్సినో;

దసదేవసహస్సాని, సబ్బే తే బ్రహ్మకాయికా.

౧౦౮౬. ‘‘ధమ్మసేనాపతిం వీరం, మహాఝాయిం సమాహితం;

సారిపుత్తం నమస్సన్తా, తిట్ఠన్తి పఞ్జలీకతా.

౧౦౮౭. ‘‘‘నమో తే పురిసాజఞ్ఞ, నమో తే పురిసుత్తమ;

యస్స తే నాభిజానామ, యమ్పి నిస్సాయ ఝాయతి [ఝాయసి (క. అట్ఠ.)].

౧౦౮౮. ‘‘‘అచ్ఛేరం వత బుద్ధానం, గమ్భీరో గోచరో సకో;

యే మయం నాభిజానామ, వాలవేధిసమాగతా’.

౧౦౮౯. ‘‘తం తథా దేవకాయేహి, పూజితం పూజనారహం;

సారిపుత్తం తదా దిస్వా, కప్పినస్స సితం అహు.

౧౦౯౦. ‘‘యావతా బుద్ధఖేత్తమ్హి, ఠపయిత్వా మహామునిం;

ధుతగుణే విసిట్ఠోహం, సదిసో మే న విజ్జతి.

౧౦౯౧. ‘‘పరిచిణ్ణో మయా సత్థా, కతం బుద్ధస్స సాసనం;

ఓహితో గరుకో భారో, నత్థి దాని పునబ్భవో.

౧౦౯౨. ‘‘న చీవరే న సయనే, భోజనే నుపలిమ్పతి;

గోతమో అనప్పమేయ్యో, ముళాలపుప్ఫం విమలంవ;

అమ్బునా నేక్ఖమ్మనిన్నో, తిభవాభినిస్సటో.

౧౦౯౩. ‘‘సతిపట్ఠానగీవో సో, సద్ధాహత్థో మహాముని;

పఞ్ఞాసీసో మహాఞాణీ, సదా చరతి నిబ్బుతో’’తి.

… మహాకస్సపో థేరో….

చత్తాలీసనిపాతో నిట్ఠితో.