౧౦. పారాపరియత్థేరగాథా

౯౨౦. సమణస్స అహు చిన్తా, పుప్ఫితమ్హి మహావనే;

ఏకగ్గస్స నిసిన్నస్స, పవివిత్తస్స ఝాయినో.

౯౨౧. ‘‘అఞ్ఞథా లోకనాథమ్హి, తిట్ఠన్తే పురిసుత్తమే;

ఇరియం ఆసి భిక్ఖూనం, అఞ్ఞథా దాని దిస్సతి.

౯౨౨. ‘‘సీతవాతపరిత్తానం, హిరికోపీనఛాదనం;

మత్తట్ఠియం అభుఞ్జింసు, సన్తుట్ఠా ఇతరీతరే.

౯౨౩. ‘‘పణీతం యది వా లూఖం, అప్పం వా యది వా బహుం;

యాపనత్థం అభుఞ్జింసు, అగిద్ధా నాధిముచ్ఛితా.

౯౨౪. ‘‘జీవితానం పరిక్ఖారే, భేసజ్జే అథ పచ్చయే;

న బాళ్హం ఉస్సుకా ఆసుం, యథా తే ఆసవక్ఖయే.

౯౨౫. ‘‘అరఞ్ఞే రుక్ఖమూలేసు, కన్దరాసు గుహాసు చ;

వివేకమనుబ్రూహన్తా, విహంసు తప్పరాయనా.

౯౨౬. ‘‘నీచా నివిట్ఠా సుభరా, ముదూ అత్థద్ధమానసా;

అబ్యాసేకా అముఖరా, అత్థచిన్తా వసానుగా.

౯౨౭. ‘‘తతో పాసాదికం ఆసి, గతం భుత్తం నిసేవితం;

సినిద్ధా తేలధారావ, అహోసి ఇరియాపథో.

౯౨౮. ‘‘సబ్బాసవపరిక్ఖీణా, మహాఝాయీ మహాహితా;

నిబ్బుతా దాని తే థేరా, పరిత్తా దాని తాదిసా.

౯౨౯. ‘‘కుసలానఞ్చ ధమ్మానం, పఞ్ఞాయ చ పరిక్ఖయా;

సబ్బాకారవరూపేతం, లుజ్జతే జినసాసనం.

౯౩౦. ‘‘పాపకానఞ్చ ధమ్మానం, కిలేసానఞ్చ యో ఉతు;

ఉపట్ఠితా వివేకాయ, యే చ సద్ధమ్మసేసకా.

౯౩౧. ‘‘తే కిలేసా పవడ్ఢన్తా, ఆవిసన్తి బహుం జనం;

కీళన్తి మఞ్ఞే బాలేహి, ఉమ్మత్తేహివ రక్ఖసా.

౯౩౨. ‘‘కిలేసేహాభిభూతా తే, తేన తేన విధావితా;

నరా కిలేసవత్థూసు, ససఙ్గామేవ ఘోసితే.

౯౩౩. ‘‘పరిచ్చజిత్వా సద్ధమ్మం, అఞ్ఞమఞ్ఞేహి భణ్డరే;

దిట్ఠిగతాని అన్వేన్తా, ఇదం సేయ్యోతి మఞ్ఞరే.

౯౩౪. ‘‘ధనఞ్చ పుత్తం భరియఞ్చ, ఛడ్డయిత్వాన నిగ్గతా;

కటచ్ఛుభిక్ఖహేతూపి, అకిచ్ఛాని నిసేవరే.

౯౩౫. ‘‘ఉదరావదేహకం భుత్వా, సయన్తుత్తానసేయ్యకా;

కథం వత్తేన్తి [కథా వడ్ఢేన్తి (సీ. క.)] పటిబుద్ధా, యా కథా సత్థుగరహితా.

౯౩౬. ‘‘సబ్బకారుకసిప్పాని, చిత్తిం కత్వాన [చిత్తీకత్వాన (సీ.), చిత్తం కత్వాన (స్యా.)] సిక్ఖరే;

అవూపసన్తా అజ్ఝత్తం, సామఞ్ఞత్థోతి అచ్ఛతి [తిరిఞ్చతి (?)].

౯౩౭. ‘‘మత్తికం తేలచుణ్ణఞ్చ, ఉదకాసనభోజనం;

గిహీనం ఉపనామేన్తి, ఆకఙ్ఖన్తా బహుత్తరం.

౯౩౮. ‘‘దన్తపోనం కపిత్థఞ్చ, పుప్ఫం ఖాదనియాని చ;

పిణ్డపాతే చ సమ్పన్నే, అమ్బే ఆమలకాని చ.

౯౩౯. ‘‘భేసజ్జేసు యథా వేజ్జా, కిచ్చాకిచ్చే యథా గిహీ;

గణికావ విభూసాయం, ఇస్సరే ఖత్తియా యథా.

౯౪౦. ‘‘నేకతికా వఞ్చనికా, కూటసక్ఖీ అపాటుకా;

బహూహి పరికప్పేహి, ఆమిసం పరిభుఞ్జరే.

౯౪౧. ‘‘లేసకప్పే పరియాయే, పరికప్పేనుధావితా;

జీవికత్థా ఉపాయేన, సఙ్కడ్ఢన్తి బహుం ధనం.

౯౪౨. ‘‘ఉపట్ఠాపేన్తి పరిసం, కమ్మతో నో చ ధమ్మతో;

ధమ్మం పరేసం దేసేన్తి, లాభతో నో చ అత్థతో.

౯౪౩. ‘‘సఙ్ఘలాభస్స భణ్డన్తి, సఙ్ఘతో పరిబాహిరా;

పరలాభోపజీవన్తా, అహిరీకా న లజ్జరే.

౯౪౪. ‘‘నానుయుత్తా తథా ఏకే, ముణ్డా సఙ్ఘాటిపారుతా;

సమ్భావనంయేవిచ్ఛన్తి, లాభసక్కారముచ్ఛితా.

౯౪౫. ‘‘ఏవం నానప్పయాతమ్హి, న దాని సుకరం తథా;

అఫుసితం వా ఫుసితుం, ఫుసితం వానురక్ఖితుం.

౯౪౬. ‘‘యథా కణ్టకట్ఠానమ్హి, చరేయ్య అనుపాహనో;

సతిం ఉపట్ఠపేత్వాన, ఏవం గామే మునీ చరే.

౯౪౭. ‘‘సరిత్వా పుబ్బకే యోగీ, తేసం వత్తమనుస్సరం;

కిఞ్చాపి పచ్ఛిమో కాలో, ఫుసేయ్య అమతం పదం.

౯౪౮. ‘‘ఇదం వత్వా సాలవనే, సమణో భావితిన్ద్రియో;

బ్రాహ్మణో పరినిబ్బాయీ, ఇసి ఖీణపునబ్భవో’’తి.

… పారాపరియో [పారాసరియో (స్యా.)] థేరో….

వీసతినిపాతో నిట్ఠితో.