౯. నవమవగ్గో

౮౧. ‘‘యం మయా పకతం పాపం, పుబ్బే అఞ్ఞాసు జాతిసు;

ఇధేవ తం వేదనీయం, వత్థు అఞ్ఞం న విజ్జతీ’’తి.

… సమితిగుత్తో థేరో….

౮౨. ‘‘యేన యేన సుభిక్ఖాని, సివాని అభయాని చ;

తేన పుత్తక గచ్ఛస్సు, మా సోకాపహతో భవా’’తి.

… కస్సపో థేరో….

౮౩. ‘‘సీహప్పమత్తో విహర, రత్తిన్దివమతన్దితో;

భావేహి కుసలం ధమ్మం, జహ సీఘం సముస్సయ’’న్తి.

… సీహో థేరో….

౮౪. ‘‘సబ్బరత్తిం సుపిత్వాన, దివా సఙ్గణికే రతో;

కుదాస్సు నామ దుమ్మేధో, దుక్ఖస్సన్తం కరిస్సతీ’’తి.

… నీతో థేరో….

౮౫. ‘‘చిత్తనిమిత్తస్స కోవిదో, పవివేకరసం విజానియ;

ఝాయం నిపకో పతిస్సతో, అధిగచ్ఛేయ్య సుఖం నిరామిస’’న్తి.

… సునాగో థేరో….

౮౬. ‘‘ఇతో బహిద్ధా పుథు అఞ్ఞవాదినం, మగ్గో న నిబ్బానగమో యథా అయం;

ఇతిస్సు సఙ్ఘం భగవానుసాసతి, సత్థా సయం పాణితలేవ దస్సయ’’న్తి.

… నాగితో థేరో….

౮౭. ‘‘ఖన్ధా దిట్ఠా యథాభూతం, భవా సబ్బే పదాలితా;

విక్ఖీణో జాతిసంసారో, నత్థి దాని పునబ్భవో’’తి.

… పవిట్ఠో థేరో….

౮౮. ‘‘అసక్ఖిం వత అత్తానం, ఉద్ధాతుం ఉదకా థలం;

వుయ్హమానో మహోఘేవ, సచ్చాని పటివిజ్ఝహ’’న్తి.

… అజ్జునో థేరో….

౮౯. ‘‘ఉత్తిణ్ణా పఙ్కపలిపా, పాతాలా పరివజ్జితా;

ముత్తో ఓఘా చ గన్థా చ, సబ్బే మానా విసంహతా’’తి.

… దేవసభో థేరో….

౯౦. ‘‘పఞ్చక్ఖన్ధా పరిఞ్ఞాతా, తిట్ఠన్తి ఛిన్నమూలకా;

విక్ఖీణో జాతిసంసారో, నత్థి దాని పునబ్భవో’’తి.

… సామిదత్తో థేరో….

వగ్గో నవమో నిట్ఠితో.

తస్సుద్దానం –

థేరో సమితిగుత్తో చ, కస్సపో సీహసవ్హయో;

నీతో సునాగో నాగితో, పవిట్ఠో అజ్జునో ఇసి;

దేవసభో చ యో థేరో, సామిదత్తో మహబ్బలోతి.