౧౦. దసమవగ్గో

౧. పరిపుణ్ణకత్థేరగాథా

౯౧. ‘‘న తథా మతం సతరసం, సుధన్నం యం మయజ్జ పరిభుత్తం;

అపరిమితదస్సినా గోతమేన, బుద్ధేన దేసితో ధమ్మో’’తి.

… పరిపుణ్ణకో థేరో….

౨. విజయత్థేరగాథా

౯౨. ‘‘యస్సాసవా పరిక్ఖీణా, ఆహారే చ అనిస్సితో;

సుఞ్ఞతా అనిమిత్తో చ, విమోక్ఖో యస్స గోచరో;

ఆకాసేవ సకున్తానం, పదం తస్స దురన్నయ’’న్తి.

… విజయో థేరో….

౩. ఏరకత్థేరగాథా

౯౩. ‘‘దుక్ఖా కామా ఏరక, న సుఖా కామా ఏరక;

యో కామే కామయతి, దుక్ఖం సో కామయతి ఏరక;

యో కామే న కామయతి, దుక్ఖం సో న కామయతి ఏరకా’’తి.

… ఏరకో థేరో….

౪. మేత్తజిత్థేరగాథా

౯౪. ‘‘నమో హి తస్స భగవతో, సక్యపుత్తస్స సిరీమతో;

తేనాయం అగ్గప్పత్తేన, అగ్గధమ్మో [అగ్గో ధమ్మో (సీ.)] సుదేసితో’’తి.

… మేత్తజి థేరో….

౫. చక్ఖుపాలత్థేరగాథా

౯౫. ‘‘అన్ధోహం హతనేత్తోస్మి, కన్తారద్ధానపక్ఖన్దో [పక్ఖన్నో (సీ.), పక్కన్తో (స్యా. సీ. అట్ఠ.)];

సయమానోపి గచ్ఛిస్సం, న సహాయేన పాపేనా’’తి.

… చక్ఖుపాలో థేరో….

౬. ఖణ్డసుమనత్థేరగాథా

౯౬. ‘‘ఏకపుప్ఫం చజిత్వాన, అసీతి [అసీతిం (సీ.)] వస్సకోటియో;

సగ్గేసు పరిచారేత్వా, సేసకేనమ్హి నిబ్బుతో’’తి.

… ఖణ్డసుమనో థేరో….

౭. తిస్సత్థేరగాథా

౯౭. ‘‘హిత్వా సతపలం కంసం, సోవణ్ణం సతరాజికం;

అగ్గహిం మత్తికాపత్తం, ఇదం దుతియాభిసేచన’’న్తి.

… తిస్సో థేరో….

౮. అభయత్థేరగాథా

౯౮. ‘‘రూపం దిస్వా సతి ముట్ఠా, పియం నిమిత్తం మనసికరోతో;

సారత్తచిత్తో వేదేతి, తఞ్చ అజ్ఝోస తిట్ఠతి;

తస్స వడ్ఢన్తి ఆసవా, భవమూలోపగామినో’’తి [భవమూలా భవగామినోతి (సీ. క.)].

… అభయో థేరో….

౯. ఉత్తియత్థేరగాథా

౯౯. ‘‘సద్దం సుత్వా సతి ముట్ఠా, పియం నిమిత్తం మనసికరోతో;

సారత్తచిత్తో వేదేతి, తఞ్చ అజ్ఝోస తిట్ఠతి;

తస్స వడ్ఢన్తి ఆసవా, సంసారం ఉపగామినో’’తి.

… ఉత్తియో థేరో….

౧౦. (దుతియ)-దేవసభత్థేరగాథా

౧౦౦. ‘‘సమ్మప్పధానసమ్పన్నో, సతిపట్ఠానగోచరో;

విముత్తికుసుమసఞ్ఛన్నో, పరినిబ్బిస్సత్యనాసవో’’తి.

… దేవసభో థేరో….

వగ్గో దసమో నిట్ఠితో.

తస్సుద్దానం –

పరిపుణ్ణకో చ విజయో, ఏరకో మేత్తజీ ముని;

చక్ఖుపాలో ఖణ్డసుమనో, తిస్సో చ అభయో తథా;

ఉత్తియో చ మహాపఞ్ఞో, థేరో దేవసభోపి చాతి.