౧౧. ఏకాదసమవగ్గో

౧౦౧. ‘‘హిత్వా గిహిత్తం అనవోసితత్తో, ముఖనఙ్గలీ ఓదరికో కుసీతో;

మహావరాహోవ నివాపపుట్ఠో, పునప్పునం గబ్భముపేతి మన్దో’’తి.

… బేలట్ఠానికో థేరో….

౧౦౨. ‘‘మానేన వఞ్చితాసే, సఙ్ఖారేసు సంకిలిస్సమానాసే;

లాభాలాభేన మథితా, సమాధిం నాధిగచ్ఛన్తీ’’తి.

… సేతుచ్ఛో థేరో….

౧౦౩. ‘‘నాహం ఏతేన అత్థికో, సుఖితో ధమ్మరసేన తప్పితో;

పిత్వా [పీత్వాన (సీ. స్యా.)] రసగ్గముత్తమం, న చ కాహామి విసేన సన్థవ’’న్తి.

… బన్ధురో [బన్ధనో (క.)] థేరో….

౧౦౪. ‘‘లహుకో వత మే కాయో, ఫుట్ఠో చ పీతిసుఖేన విపులేన;

తూలమివ ఏరితం మాలుతేన, పిలవతీవ మే కాయో’’తి.

… ఖితకో థేరో….

౧౦౫. ‘‘ఉక్కణ్ఠితోపి న వసే, రమమానోపి పక్కమే;

న త్వేవానత్థసంహితం, వసే వాసం విచక్ఖణో’’తి.

… మలితవమ్భో థేరో….

౧౦౬. ‘‘సతలిఙ్గస్స అత్థస్స, సతలక్ఖణధారినో;

ఏకఙ్గదస్సీ దుమ్మేధో, సతదస్సీ చ పణ్డితో’’తి.

… సుహేమన్తో థేరో….

౧౦౭. ‘‘పబ్బజిం తులయిత్వాన, అగారస్మానగారియం;

తిస్సో విజ్జా అనుప్పత్తా, కతం బుద్ధస్స సాసన’’న్తి.

… ధమ్మసవో థేరో….

౧౦౮. ‘‘స వీసవస్ససతికో, పబ్బజిం అనగారియం;

తిస్సో విజ్జా అనుప్పత్తా, కతం బుద్ధస్స సాసన’’న్తి.

… ధమ్మసవపితు థేరో….

౧౦౯. ‘‘న నూనాయం పరమహితానుకమ్పినో, రహోగతో అనువిగణేతి సాసనం;

తథాహయం విహరతి పాకతిన్ద్రియో, మిగీ యథా తరుణజాతికా వనే’’తి.

… సఙ్ఘరక్ఖితో థేరో….

౧౧౦. ‘‘నగా నగగ్గేసు సుసంవిరూళ్హా, ఉదగ్గమేఘేన నవేన సిత్తా;

వివేకకామస్స అరఞ్ఞసఞ్ఞినో, జనేతి భియ్యో ఉసభస్స కల్యత’’న్తి.

… ఉసభో థేరో….

వగ్గో ఏకాదసమో నిట్ఠితో.

తస్సుద్దానం –

బేలట్ఠానికో సేతుచ్ఛో, బన్ధురో ఖితకో ఇసి;

మలితవమ్భో సుహేమన్తో, ధమ్మసవో ధమ్మసవపితా;

సఙ్ఘరక్ఖితత్థేరో చ, ఉసభో చ మహామునీతి.