౧. ఏకకనిపాతో

౧. పఠమవగ్గో

౧. సుభూతిత్థేరగాథా

౧. ‘‘ఛన్నా మే కుటికా సుఖా నివాతా, వస్స దేవ యథాసుఖం;

చిత్తం మే సుసమాహితం విముత్తం, ఆతాపీ విహరామి వస్స దేవా’’తి.

ఇత్థం సుదం [ఇత్థం సుమం (క. అట్ఠ.)] ఆయస్మా సుభూతిత్థేరో గాథం అభాసిత్థాతి.

౨. మహాకోట్ఠికత్థేరగాథా

౨. ‘‘ఉపసన్తో ఉపరతో, మన్తభాణీ అనుద్ధతో;

ధునాతి పాపకే ధమ్మే, దుమపత్తంవ మాలుతో’’తి.

ఇత్థం సుదం ఆయస్మా మహాకోట్ఠికో [మహాకోట్ఠితో (సీ. స్యా.)] థేరో గాథం అభాసిత్థాతి.

౩. కఙ్ఖారేవతత్థేరగాథా

౩. ‘‘పఞ్ఞం ఇమం పస్స తథాగతానం, అగ్గి యథా పజ్జలితో నిసీథే;

ఆలోకదా చక్ఖుదదా భవన్తి, యే ఆగతానం వినయన్తి కఙ్ఖ’’న్తి.

ఇత్థం సుదం ఆయస్మా కఙ్ఖారేవతో థేరో గాథం అభాసిత్థాతి.

౪. పుణ్ణత్థేరగాథా

౪. ‘‘సమ్భిరేవ సమాసేథ, పణ్డితేహత్థదస్సిభి;

అత్థం మహన్తం గమ్భీరం, దుద్దసం నిపుణం అణుం;

ధీరా సమధిగచ్ఛన్తి, అప్పమత్తా విచక్ఖణా’’తి.

ఇత్థం సుదం ఆయస్మా పుణ్ణో మన్తాణిపుత్తో [మన్తానిపుత్తో (స్యా. క.)] థేరో గాథం అభాసిత్థాతి.

౫. దబ్బత్థేరగాథా

౫. ‘‘యో దుద్దమియో దమేన దన్తో, దబ్బో సన్తుసితో వితిణ్ణకఙ్ఖో;

విజితావీ అపేతభేరవో హి, దబ్బో సో పరినిబ్బుతో ఠితత్తో’’తి.

ఇత్థం సుదం ఆయస్మా దబ్బో థేరో గాథం అభాసిత్థాతి.

౬. సీతవనియత్థేరగాథా

౬. ‘‘యో సీతవనం ఉపగా భిక్ఖు, ఏకో సన్తుసితో సమాహితత్తో;

విజితావీ అపేతలోమహంసో, రక్ఖం కాయగతాసతిం ధితిమా’’తి.

ఇత్థం సుదం ఆయస్మా సీతవనియో థేరో గాథం అభాసిత్థాతి.

౭. భల్లియత్థేరగాథా

౭. ‘‘యోపానుదీ మచ్చురాజస్స సేనం, నళసేతుంవ సుదుబ్బలం మహోఘో;

విజితావీ అపేతభేరవో హి, దన్తో సో పరినిబ్బుతో ఠితత్తో’’తి.

ఇత్థం సుదం ఆయస్మా భల్లియో థేరో గాథం అభాసిత్థాతి.

౮. వీరత్థేరగాథా

౮. ‘‘యో దుద్దమియో దమేన దన్తో, వీరో సన్తుసితో వితిణ్ణకఙ్ఖో;

విజితావీ అపేతలోమహంసో, వీరో సో పరినిబ్బుతో ఠితత్తో’’తి.

ఇత్థం సుదం ఆయస్మా వీరో థేరో గాథం అభాసిత్థాతి.

౯. పిలిన్దవచ్ఛత్థేరగాథా

౯. ‘‘స్వాగతం న దురాగతం [నాపగతం (సీ. స్యా.)], నయిదం దుమన్తితం మమ;

సంవిభత్తేసు ధమ్మేసు, యం సేట్ఠం తదుపాగమి’’న్తి.

ఇత్థం సుదం ఆయస్మా పిలిన్దవచ్ఛో [పిలిన్దివచ్ఛో (సీ.)] థేరో గాథం అభాసిత్థాతి.

౧౦. పుణ్ణమాసత్థేరగాథా

౧౦. ‘‘విహరి అపేక్ఖం ఇధ వా హురం వా, యో వేదగూ సమితో యతత్తో;

సబ్బేసు ధమ్మేసు అనూపలిత్తో, లోకస్స జఞ్ఞా ఉదయబ్బయఞ్చా’’తి.

ఇత్థం సుదం ఆయస్మా పుణ్ణమాసో థేరో గాథం అభాసిత్థాతి.

వగ్గో పఠమో నిట్ఠితో.

తస్సుద్దానం –

సుభూతి కోట్ఠికో థేరో, కఙ్ఖారేవతసమ్మతో;

మన్తాణిపుత్తో దబ్బో చ, సీతవనియో చ భల్లియో;

వీరో పిలిన్దవచ్ఛో చ, పుణ్ణమాసో తమోనుదోతి.

౨. దుతియవగ్గో

౧. చూళవచ్ఛత్థేరగాథా

౧౧. ‘‘పామోజ్జబహులో భిక్ఖు, ధమ్మే బుద్ధప్పవేదితే;

అధిగచ్ఛే పదం సన్తం, సఙ్ఖారూపసమం సుఖ’’న్తి.

… చూళవచ్ఛో [చూలగవచ్ఛో (సీ.)] థేరో….

౨. మహావచ్ఛత్థేరగాథా

౧౨. ‘‘పఞ్ఞాబలీ సీలవతూపపన్నో, సమాహితో ఝానరతో సతీమా;

యదత్థియం భోజనం భుఞ్జమానో, కఙ్ఖేథ కాలం ఇధ వీతరాగో’’తి.

… మహావచ్ఛో [మహాగవచ్ఛో (సీ.)] థేరో….

౩. వనవచ్ఛత్థేరగాథా

౧౩. ‘‘నీలబ్భవణ్ణా రుచిరా, సీతవారీ సుచిన్ధరా;

ఇన్దగోపకసఞ్ఛన్నా, తే సేలా రమయన్తి మ’’న్తి.

… వనవచ్ఛో థేరో….

౪. సివకసామణేరగాథా

౧౪. ‘‘ఉపజ్ఝాయో మం అవచ, ఇతో గచ్ఛామ సీవక;

గామే మే వసతి కాయో, అరఞ్ఞం మే గతో మనో;

సేమానకోపి గచ్ఛామి, నత్థి సఙ్గో విజానత’’న్తి.

… సివకో సామణేరో….

౫. కుణ్డధానత్థేరగాథా

౧౫. ‘‘పఞ్చ ఛిన్దే పఞ్చ జహే, పఞ్చ చుత్తరి భావయే;

పఞ్చసఙ్గాతిగో భిక్ఖు, ఓఘతిణ్ణోతి వుచ్చతీ’’తి.

… కుణ్డధానో థేరో….

౬. బేలట్ఠసీసత్థేరగాథా

౧౬. ‘‘యథాపి భద్దో ఆజఞ్ఞో, నఙ్గలావత్తనీ సిఖీ;

గచ్ఛతి అప్పకసిరేన, ఏవం రత్తిన్దివా మమ;

గచ్ఛన్తి అప్పకసిరేన, సుఖే లద్ధే నిరామిసే’’తి.

… బేలట్ఠసీసో థేరో….

౭. దాసకత్థేరగాథా

౧౭. ‘‘మిద్ధీ యదా హోతి మహగ్ఘసో చ, నిద్దాయితా సమ్పరివత్తసాయీ;

మహావరాహోవ నివాపపుట్ఠో, పునప్పునం గబ్భముపేతి మన్దో’’తి.

… దాసకో థేరో….

౮. సిఙ్గాలపితుత్థేరగాథా

౧౮. ‘‘అహు బుద్ధస్స దాయాదో, భిక్ఖు భేసకళావనే;

కేవలం అట్ఠిసఞ్ఞాయ, అఫరీ పథవిం [పఠవిం (సీ. స్యా.)] ఇమం;

మఞ్ఞేహం కామరాగం సో, ఖిప్పమేవ పహిస్సతీ’’తి [పహీయభి (సబ్బత్థ పాళియం)].

… సిఙ్గాలపితా [సీగాలపితా (సీ.)] థేరో….

౯. కులత్థేరగాథా

౧౯. [ధ. ప. ౮౦, ౧౪౫ ధమ్మపదేపి] ‘‘ఉదకం హి నయన్తి నేత్తికా, ఉసుకారా నమయన్తి [దమయన్తి (క.)] తేజనం;

దారుం నమయన్తి తచ్ఛకా, అత్తానం దమయన్తి సుబ్బతా’’తి.

… కులో [కుణ్డలో (సీ.), కుళో (స్యా. క.)] థేరో….

౧౦. అజితత్థేరగాథా

౨౦. ‘‘మరణే మే భయం నత్థి, నికన్తి నత్థి జీవితే;

సన్దేహం నిక్ఖిపిస్సామి, సమ్పజానో పటిస్సతో’’తి [పతిస్సతోతి (సీ. స్యా.)].

… అజితో థేరో ….

వగ్గో దుతియో నిట్ఠితో.

తస్సుద్దానం –

చూళవచ్ఛో మహావచ్ఛో, వనవచ్ఛో చ సీవకో;

కుణ్డధానో చ బేలట్ఠి, దాసకో చ తతోపరి;

సిఙ్గాలపితికో థేరో, కులో చ అజితో దసాతి.

౩. తతియవగ్గో

౧. నిగ్రోధత్థేరగాథా

౨౧. ‘‘నాహం భయస్స భాయామి, సత్థా నో అమతస్స కోవిదో;

యత్థ భయం నావతిట్ఠతి, తేన మగ్గేన వజన్తి భిక్ఖవో’’తి.

… నిగ్రోధో థేరో….

౨. చిత్తకత్థేరగాథా

౨౨. ‘‘నీలా సుగీవా సిఖినో, మోరా కారమ్భియం [కారంవియం (సీ.), కారవియం (స్యా.)] అభినదన్తి;

తే సీతవాతకీళితా [సీతవాతకద్దితకలితా (సీ.), సీతవాతకలితా (స్యా.)], సుత్తం ఝాయం [ఝానం (స్యా.), ఝాయిం (?)] నిబోధేన్తీ’’తి.

… చిత్తకో థేరో….

౩. గోసాలత్థేరగాథా

౨౩. ‘‘అహం ఖో వేళుగుమ్బస్మిం, భుత్వాన మధుపాయసం;

పదక్ఖిణం సమ్మసన్తో, ఖన్ధానం ఉదయబ్బయం;

సానుం పటిగమిస్సామి, వివేకమనుబ్రూహయ’’న్తి.

… గోసాలో థేరో….

౪. సుగన్ధత్థేరగాథా

౨౪. ‘‘అనువస్సికో పబ్బజితో, పస్స ధమ్మసుధమ్మతం;

తిస్సో విజ్జా అనుప్పత్తా, కతం బుద్ధస్స సాసన’’న్తి.

… సుగన్ధో థేరో….

౫. నన్దియత్థేరగాథా

౨౫. ‘‘ఓభాసజాతం ఫలగం, చిత్తం యస్స అభిణ్హసో;

తాదిసం భిక్ఖుమాసజ్జ, కణ్హ దుక్ఖం నిగచ్ఛసీ’’తి.

… నన్దియో థేరో….

౬. అభయత్థేరగాథా

౨౬. ‘‘సుత్వా సుభాసితం వాచం, బుద్ధస్సాదిచ్చబన్ధునో;

పచ్చబ్యధిం హి నిపుణం, వాలగ్గం ఉసునా యథా’’తి.

… అభయో థేరో….

౭. లోమసకఙ్గియత్థేరగాథా

౨౭. ‘‘దబ్బం కుసం పోటకిలం, ఉసీరం ముఞ్జపబ్బజం;

ఉరసా పనుదిస్సామి, వివేకమనుబ్రూహయ’’న్తి.

… లోమసకఙ్గియో థేరో….

౮. జమ్బుగామికపుత్తత్థేరగాథా

౨౮. ‘‘కచ్చి నో వత్థపసుతో, కచ్చి నో భూసనారతో;

కచ్చి సీలమయం గన్ధం, కిం త్వం వాయసి [కచ్చి సీలమయం గన్ధం, త్వం వాసి (స్యా.)] నేతరా పజా’’తి.

… జమ్బుగామికపుత్తో థేరో….

౯. హారితత్థేరగాథా

౨౯. ‘‘సమున్నమయమత్తానం, ఉసుకారోవ తేజనం;

చిత్తం ఉజుం కరిత్వాన, అవిజ్జం భిన్ద హారితా’’తి.

… హారితో థేరో….

౧౦. ఉత్తియత్థేరగాథా

౩౦. ‘‘ఆబాధే మే సముప్పన్నే, సతి మే ఉదపజ్జథ;

ఆబాధో మే సముప్పన్నో, కాలో మే నప్పమజ్జితు’’న్తి.

… ఉత్తియో థేరో….

వగ్గో తతియో నిట్ఠితో.

తస్సుద్దానం –

నిగ్రోధో చిత్తకో థేరో, గోసాలథేరో సుగన్ధో;

నన్దియో అభయో థేరో, థేరో లోమసకఙ్గియో;

జమ్బుగామికపుత్తో చ, హారితో ఉత్తియో ఇసీతి.

౪. చతుత్థవగ్గో

౧. గహ్వరతీరియత్థేరగాథా

౩౧. ‘‘ఫుట్ఠో డంసేహి మకసేహి, అరఞ్ఞస్మిం బ్రహావనే;

నాగో సంగామసీసేవ, సతో తత్రాధివాసయే’’తి.

… గహ్వరతీరియో థేరో….

౨. సుప్పియత్థేరగాథా