౧౨. ద్వాదసమవగ్గో

౧౧౧. ‘‘దుప్పబ్బజ్జం వే దురధివాసా గేహా, ధమ్మో గమ్భీరో దురధిగమా భోగా;

కిచ్ఛా వుత్తి నో ఇతరీతరేనేవ, యుత్తం చిన్తేతుం సతతమనిచ్చత’’న్తి.

… జేన్తో థేరో….

౧౧౨. ‘‘తేవిజ్జోహం మహాఝాయీ, చేతోసమథకోవిదో;

సదత్థో మే అనుప్పత్తో, కతం బుద్ధస్స సాసన’’న్తి.

… వచ్ఛగోత్తో థేరో….

౧౧౩. ‘‘అచ్ఛోదికా పుథుసిలా,గోనఙ్గులమిగాయుతా;

అమ్బుసేవాలసఞ్ఛన్నా, తే సేలా రమయన్తి మ’’న్తి.

… వనవచ్ఛో థేరో….

౧౧౪. ‘‘కాయదుట్ఠుల్లగరునో, హియ్యమానమ్హి [హీయమానమ్హి (సీ.)] జీవితే;

సరీరసుఖగిద్ధస్స, కుతో సమణసాధుతా’’తి.

… అధిముత్తో థేరో….

౧౧౫. ‘‘ఏసావహియ్యసే పబ్బతేన, బహుకుటజసల్లకికేన [సల్లకితేన (సీ.), సల్లరికేన (స్యా.)];

నేసాదకేన గిరినా, యసస్సినా పరిచ్ఛదేనా’’తి.

… మహానామో థేరో….

౧౧౬. ‘‘ఛఫస్సాయతనే హిత్వా, గుత్తద్వారో సుసంవుతో;

అఘమూలం వమిత్వాన, పత్తో మే ఆసవక్ఖయో’’తి.

… పారాపరియో [పారాసరియో (సీ.), పారంపరియో (క.)] థేరో ….

౧౧౭. ‘‘సువిలిత్తో సువసనో,సబ్బాభరణభూసితో;

తిస్సో విజ్జా అజ్ఝగమిం, కతం బుద్ధస్స సాసన’’న్తి.

… యసో థేరో….

౧౧౮. ‘‘అభిసత్తోవ నిపతతి, వయో రూపం అఞ్ఞమివ తథేవ సన్తం;

తస్సేవ సతో అవిప్పవసతో, అఞ్ఞస్సేవ సరామి అత్తాన’’న్తి.

… కిమిలో [కిమ్బిలో (సీ. స్యా.)] థేరో….

౧౧౯. ‘‘రుక్ఖమూలగహనం పసక్కియ, నిబ్బానం హదయస్మిం ఓపియ;

ఝాయ గోతమ మా చ పమాదో, కిం తే బిళిబిళికా కరిస్సతీ’’తి.

… వజ్జిపుత్తో థేరో….

౧౨౦. ‘‘పఞ్చక్ఖన్ధా పరిఞ్ఞాతా, తిట్ఠన్తి ఛిన్నమూలకా;

దుక్ఖక్ఖయో అనుప్పత్తో,పత్తో మే ఆసవక్ఖయో’’తి.

… ఇసిదత్తో థేరో….

వగ్గో ద్వాదసమో నిట్ఠితో.

తస్సుద్దానం –

జేన్తో చ వచ్ఛగోత్తో చ, వచ్ఛో చ వనసవ్హయో;

అధిముత్తో మహానామో, పారాపరియో యసోపి చ;

కిమిలో వజ్జిపుత్తో చ, ఇసిదత్తో మహాయసోతి.

ఏకకనిపాతో నిట్ఠితో.