౮. అట్ఠమవగ్గో

౭౧. ‘‘సుసుఖుమనిపుణత్థదస్సినా, మతికుసలేన నివాతవుత్తినా;

సంసేవితవుద్ధసీలినా [సంసేవితబుద్ధసీలినా (క.)], నిబ్బానం న హి తేన దుల్లభ’’న్తి.

… వచ్ఛపాలో థేరో….

౭౨. ‘‘యథా కళీరో సుసు వడ్ఢితగ్గో, దున్నిక్ఖమో హోతి పసాఖజాతో;

ఏవం అహం భరియాయానితాయ, అనుమఞ్ఞం మం పబ్బజితోమ్హి దానీ’’తి.

… ఆతుమో థేరో….

౭౩. ‘‘జిణ్ణఞ్చ దిస్వా దుఖితఞ్చ బ్యాధితం, మతఞ్చ దిస్వా గతమాయుసఙ్ఖయం;

తతో అహం నిక్ఖమితూన పబ్బజిం, పహాయ కామాని మనోరమానీ’’తి.

… మాణవో థేరో….

౭౪. ‘‘కామచ్ఛన్దో చ బ్యాపాదో, థినమిద్ధఞ్చ [థీనమిద్ధఞ్చ (సీ. స్యా.)] భిక్ఖునో;

ఉద్ధచ్చం విచికిచ్ఛా చ, సబ్బసోవ న విజ్జతీ’’తి.

… సుయామనో థేరో….

౭౫. ‘‘సాధు సువిహితాన దస్సనం, కఙ్ఖా ఛిజ్జతి బుద్ధి వడ్ఢతి;

బాలమ్పి కరోన్తి పణ్డితం, తస్మా సాధు సతం సమాగమో’’తి.

… సుసారదో థేరో….

౭౬. ‘‘ఉప్పతన్తేసు నిపతే, నిపతన్తేసు ఉప్పతే;

వసే అవసమానేసు, రమమానేసు నో రమే’’తి.

… పియఞ్జహో థేరో….

౭౭. ‘‘ఇదం పురే చిత్తమచారి చారికం, యేనిచ్ఛకం యత్థకామం యథాసుఖం;

తదజ్జహం నిగ్గహేస్సామి యోనిసో, హత్థిప్పభిన్నం వియ అఙ్కుసగ్గహో’’తి.

… హత్థారోహపుత్తో థేరో….

౭౮. ‘‘అనేకజాతిసంసారం, సన్ధావిస్సం అనిబ్బిసం;

తస్స మే దుక్ఖజాతస్స, దుక్ఖక్ఖన్ధో అపరద్ధో’’తి.

… మేణ్డసిరో థేరో….

౭౯. ‘‘సబ్బో రాగో పహీనో మే, సబ్బో దోసో సమూహతో;

సబ్బో మే విగతో మోహో, సీతిభూతోస్మి నిబ్బుతో’’తి.

… రక్ఖితో థేరో….

౮౦. ‘‘యం మయా పకతం కమ్మం, అప్పం వా యది వా బహుం;

సబ్బమేతం పరిక్ఖీణం, నత్థి దాని పునబ్భవో’’తి.

… ఉగ్గో థేరో….

వగ్గో అట్ఠమో నిట్ఠితో.

తస్సుద్దానం –

వచ్ఛపాలో చ యో థేరో, ఆతుమో మాణవో ఇసి;

సుయామనో సుసారదో, థేరో యో చ పియఞ్జహో;

ఆరోహపుత్తో మేణ్డసిరో, రక్ఖితో ఉగ్గసవ్హయోతి.