౭. సత్తమవగ్గో

౬౧. ‘‘పస్సతి పస్సో పస్సన్తం, అపస్సన్తఞ్చ పస్సతి;

అపస్సన్తో అపస్సన్తం, పస్సన్తఞ్చ న పస్సతీ’’తి.

… వప్పో థేరో….

౬౨. ‘‘ఏకకా మయం అరఞ్ఞే విహరామ, అపవిద్ధంవ వనస్మిం దారుకం;

తస్స మే బహుకా పిహయన్తి, నేరయికా వియ సగ్గగామిన’’న్తి.

… వజ్జిపుత్తో థేరో….

౬౩. ‘‘చుతా పతన్తి పతితా, గిద్ధా చ పునరాగతా;

కతం కిచ్చం రతం రమ్మం, సుఖేనన్వాగతం సుఖ’’న్తి.

… పక్ఖో థేరో….

౬౪. ‘‘దుమవ్హయాయ ఉప్పన్నో, జాతో పణ్డరకేతునా;

కేతుహా కేతునాయేవ, మహాకేతుం పధంసయీ’’తి.

… విమలకోణ్డఞ్ఞో థేరో….

౬౫. ‘‘ఉక్ఖేపకతవచ్ఛస్స, సఙ్కలితం బహూహి వస్సేహి;

తం భాసతి గహట్ఠానం, సునిసిన్నో ఉళారపామోజ్జో’’తి.

… ఉక్ఖేపకతవచ్ఛో థేరో….

౬౬. ‘‘అనుసాసి మహావీరో, సబ్బధమ్మాన పారగూ;

తస్సాహం ధమ్మం సుత్వాన, విహాసిం సన్తికే సతో;

తిస్సో విజ్జా అనుప్పత్తా, కతం బుద్ధస్స సాసన’’న్తి.

… మేఘియో థేరో….

౬౭. ‘‘కిలేసా ఝాపితా మయ్హం, భవా సబ్బే సమూహతా;

విక్ఖీణో జాతిసంసారో, నత్థి దాని పునబ్భవో’’తి.

… ఏకధమ్మసవనీయో థేరో….

౬౮. [ఉదా. ౩౭; పాచి. ౧౫౩] ‘‘అధిచేతసో అప్పమజ్జతో, మునినో మోనపథేసు సిక్ఖతో;

సోకా న భవన్తి తాదినో, ఉపసన్తస్స సదా సతీమతో’’తి.

… ఏకుదానియో థేరో….

౬౯. ‘‘సుత్వాన ధమ్మం మహతో మహారసం, సబ్బఞ్ఞుతఞ్ఞాణవరేన దేసితం;

మగ్గం పపజ్జిం [పపజ్జం (క.)] అమతస్స పత్తియా, సో యోగక్ఖేమస్స పథస్స కోవిదో’’తి.

… ఛన్నో థేరో….

౭౦. ‘‘సీలమేవ ఇధ అగ్గం, పఞ్ఞవా పన ఉత్తమో;

మనుస్సేసు చ దేవేసు, సీలపఞ్ఞాణతో జయ’’న్తి.

… పుణ్ణో థేరో….

వగ్గో సత్తమో నిట్ఠితో.

తస్సుద్దానం –

వప్పో చ వజ్జిపుత్తో చ, పక్ఖో విమలకోణ్డఞ్ఞో;

ఉక్ఖేపకతవచ్ఛో చ, మేఘియో ఏకధమ్మికో;

ఏకుదానియఛన్నా చ, పుణ్ణత్థేరో మహబ్బలోతి.