౬. ఛట్ఠవగ్గో

౫౧. ‘‘వస్సతి దేవో యథా సుగీతం, ఛన్నా మే కుటికా సుఖా నివాతా;

చిత్తం సుసమాహితఞ్చ మయ్హం, అథ చే పత్థయసి పవస్స దేవా’’తి.

… గోధికో థేరో….

౫౨. ‘‘వస్సతి దేవో యథా సుగీతం, ఛన్నా మే కుటికా సుఖా నివాతా;

చిత్తం సుసమాహితఞ్చ కాయే, అథ చే పత్థయసి పవస్స దేవా’’తి.

… సుబాహుత్థేరో….

౫౩. ‘‘వస్సతి దేవో యథా సుగీతం, ఛన్నా మే కుటికా సుఖా నివాతా;

తస్సం విహరామి అప్పమత్తో, అథ చే పత్థయసి పవస్స దేవా’’తి.

… వల్లియో థేరో….

౫౪. ‘‘వస్సతి దేవో యథా సుగీతం, ఛన్నా మే కుటికా సుఖా నివాతా;

తస్సం విహరామి అదుతియో, అథ చే పత్థయసి పవస్స దేవా’’తి.

… ఉత్తియో థేరో….

౫౫. ‘‘ఆసన్దిం కుటికం కత్వా, ఓగయ్హ అఞ్జనం వనం;

తిస్సో విజ్జా అనుప్పత్తా, కతం బుద్ధస్స సాసన’’న్తి.

… అఞ్జనవనియో థేరో….

౫౬. ‘‘కో కుటికాయం భిక్ఖు కుటికాయం, వీతరాగో సుసమాహితచిత్తో;

ఏవం జానాహి ఆవుసో, అమోఘా తే కుటికా కతా’’తి.

… కుటివిహారిత్థేరో….

౫౭. ‘‘అయమాహు పురాణియా కుటి, అఞ్ఞం పత్థయసే నవం కుటిం;

ఆసం కుటియా విరాజయ, దుక్ఖా భిక్ఖు పున నవా కుటీ’’తి.

… దుతియకుటివిహారిత్థేరో….

౫౮. ‘‘రమణీయా మే కుటికా, సద్ధాదేయ్యా మనోరమా;

న మే అత్థో కుమారీహి, యేసం అత్థో తహిం గచ్ఛథ నారియో’’తి.

… రమణీయకుటికో థేరో….

౫౯. ‘‘సద్ధాయాహం పబ్బజితో, అరఞ్ఞే మే కుటికా కతా;

అప్పమత్తో చ ఆతాపీ, సమ్పజానో పతిస్సతో’’తి [పటిస్సతోతి (క.)].

… కోసలవిహారిత్థేరో….

౬౦. ‘‘తే మే ఇజ్ఝింసు సఙ్కప్పా, యదత్థో పావిసిం కుటిం;

విజ్జావిముత్తిం పచ్చేసం, మానానుసయముజ్జహ’’న్తి.

… సీవలిత్థేరో….

వగ్గో ఛట్ఠో నిట్ఠితో.

తస్సుద్దానం –

గోధికో చ సుబాహు చ, వల్లియో ఉత్తియో ఇసి;

అఞ్జనవనియో థేరో, దువే కుటివిహారినో;

రమణీయకుటికో చ, కోసలవ్హయసీవలీతి.