౫. పఞ్చమవగ్గో

౪౧. ‘‘వివరమనుపతన్తి విజ్జుతా, వేభారస్స చ పణ్డవస్స చ;

నగవివరగతో చ ఝాయతి, పుత్తో అప్పటిమస్స తాదినో’’తి.

… సిరివడ్ఢో థేరో….

౪౨. ‘‘చాలే ఉపచాలే సీసూపచాలే ( ) [(చాలా ఉపచాలా, సీసూపచాలా) (క.)] పతిస్సతా [పటిస్సతికా (స్యా. క.)] ను ఖో విహరథ;

ఆగతో వో వాలం వియ వేధీ’’తి.

… ఖదిరవనియో థేరో….

౪౩. ‘‘సుముత్తికో సుముత్తికో సాహు, సుముత్తికోమ్హి తీహి ఖుజ్జకేహి;

అసితాసు మయా నఙ్గలాసు, మయా ఖుద్దకుద్దాలాసు మయా.

యదిపి ఇధమేవ ఇధమేవ, అథ వాపి అలమేవ అలమేవ;

ఝాయ సుమఙ్గల ఝాయ సుమఙ్గల, అప్పమత్తో విహర సుమఙ్గలా’’తి.

… సుమఙ్గలో థేరో….

౪౪. [సం. ని. ౧.౨౩౯] ‘‘మతం వా అమ్మ రోదన్తి, యో వా జీవం న దిస్సతి;

జీవన్తం మం అమ్మ పస్సన్తీ, కస్మా మం అమ్మ రోదసీ’’తి.

… సానుత్థేరో….

౪౫. ‘‘యథాపి భద్దో ఆజఞ్ఞో, ఖలిత్వా పతితిట్ఠతి;

ఏవం దస్సనసమ్పన్నం, సమ్మాసమ్బుద్ధసావక’’న్తి.

… రమణీయవిహారిత్థేరో….

౪౬. ‘‘సద్ధాయాహం పబ్బజితో, అగారస్మానగారియం;

సతి పఞ్ఞా చ మే వుడ్ఢా, చిత్తఞ్చ సుసమాహితం;

కామం కరస్సు రూపాని, నేవ మం బ్యాధయిస్ససీ’’తి [బాధయిస్ససీతి (సీ.), బ్యాథయిస్ససీతి (?)].

… సమిద్ధిత్థేరో….

౪౭. ‘‘నమో తే బుద్ధ వీరత్థు, విప్పముత్తోసి సబ్బధి;

తుయ్హాపదానే విహరం, విహరామి అనాసవో’’తి.

… ఉజ్జయో థేరో….

౪౮. ‘‘యతో అహం పబ్బజితో, అగారస్మానగారియం;

నాభిజానామి సఙ్కప్పం, అనరియం దోససంహిత’’న్తి.

… సఞ్జయో థేరో….

౪౯. ‘‘చిహచిహాభినదితే [విహవిహాభినదితే (సీ. స్యా.)], సిప్పికాభిరుతేహి చ;

న మే తం ఫన్దతి చిత్తం, ఏకత్తనిరతం హి మే’’తి.

… రామణేయ్యకో థేరో….

౫౦. ‘‘ధరణీ చ సిఞ్చతి వాతి, మాలుతో విజ్జుతా చరతి నభే;

ఉపసమన్తి వితక్కా, చిత్తం సుసమాహితం మమా’’తి.

… విమలో థేరో….

వగ్గో పఞ్చమో నిట్ఠితో.

తస్సుద్దానం –

సిరీవడ్ఢో రేవతో థేరో, సుమఙ్గలో సానుసవ్హయో;

రమణీయవిహారీ చ, సమిద్ధిఉజ్జయసఞ్జయా;

రామణేయ్యో చ సో థేరో, విమలో చ రణఞ్జహోతి.