౪. చతుత్థవగ్గో

౩౧. ‘‘ఫుట్ఠో డంసేహి మకసేహి, అరఞ్ఞస్మిం బ్రహావనే;

నాగో సంగామసీసేవ, సతో తత్రాధివాసయే’’తి.

… గహ్వరతీరియో థేరో….

౩౨. ‘‘అజరం జీరమానేన, తప్పమానేన నిబ్బుతిం;

నిమియం [నిమ్మిస్సం (సీ.), నిరామిసం (స్యా.), నిమినేయ్యం (?)] పరమం సన్తిం, యోగక్ఖేమం అనుత్తర’’న్తి.

… సుప్పియో థేరో….

౩౩. ‘‘యథాపి ఏకపుత్తస్మిం, పియస్మిం కుసలీ సియా;

ఏవం సబ్బేసు పాణేసు, సబ్బత్థ కుసలో సియా’’తి.

… సోపాకో థేరో….

౩౪. ‘‘అనాసన్నవరా ఏతా, నిచ్చమేవ విజానతా;

గామా అరఞ్ఞమాగమ్మ, తతో గేహం ఉపావిసి [ఉపావిసిం (సీ.)];

తతో ఉట్ఠాయ పక్కామి, అనామన్తేత్వా [అనామన్తియ (సీ.)] పోసియో’’తి.

… పోసియో థేరో….

౩౫. ‘‘సుఖం సుఖత్థో లభతే తదాచరం, కిత్తిఞ్చ పప్పోతి యసస్స వడ్ఢతి;

యో అరియమట్ఠఙ్గికమఞ్జసం ఉజుం, భావేతి మగ్గం అమతస్స పత్తియా’’తి.

… సామఞ్ఞకానిత్థేరో….

౩౬. ‘‘సాధు సుతం సాధు చరితకం, సాధు సదా అనికేతవిహారో;

అత్థపుచ్ఛనం పదక్ఖిణకమ్మం, ఏతం సామఞ్ఞమకిఞ్చనస్సా’’తి.

… కుమాపుత్తో థేరో….

౩౭. ‘‘నానాజనపదం యన్తి, విచరన్తా అసఞ్ఞతా;

సమాధిఞ్చ విరాధేన్తి, కింసు రట్ఠచరియా కరిస్సతి;

తస్మా వినేయ్య సారమ్భం, ఝాయేయ్య అపురక్ఖతో’’తి.

… కుమాపుత్తత్థేరస్స సహాయకో థేరో….

౩౮. ‘‘యో ఇద్ధియా సరభుం అట్ఠపేసి, సో గవమ్పతి అసితో అనేజో;

తం సబ్బసఙ్గాతిగతం మహామునిం, దేవా నమస్సన్తి భవస్స పారగు’’న్తి.

… గవమ్పతిత్థేరో….

౩౯. [సం. ని. ౧.౨౧, ౯౭]‘‘సత్తియా వియ ఓమట్ఠో, డయ్హమానోవ [డయ్హమానేవ (సబ్బత్థ)] మత్థకే;

కామరాగప్పహానాయ, సతో భిక్ఖు పరిబ్బజే’’తి.

… తిస్సో థేరో….

౪౦. ‘‘సత్తియా వియ ఓమట్ఠో, డయ్హమానోవ మత్థకే;

భవరాగప్పహానాయ, సతో భిక్ఖు పరిబ్బజే’’తి.

… వడ్ఢమానో థేరో….

వగ్గో చతుత్థో నిట్ఠితో.

తస్సుద్దానం –

గహ్వరతీరియో సుప్పియో, సోపాకో చేవ పోసియో;

సామఞ్ఞకాని కుమాపుత్తో, కుమాపుత్తసహాయకో;

గవమ్పతి తిస్సత్థేరో, వడ్ఢమానో మహాయసోతి.