౩. తతియవగ్గో

౨౧. ‘‘నాహం భయస్స భాయామి, సత్థా నో అమతస్స కోవిదో;

యత్థ భయం నావతిట్ఠతి, తేన మగ్గేన వజన్తి భిక్ఖవో’’తి.

… నిగ్రోధో థేరో….

౨౨. ‘‘నీలా సుగీవా సిఖినో, మోరా కారమ్భియం [కారంవియం (సీ.), కారవియం (స్యా.)] అభినదన్తి;

తే సీతవాతకీళితా [సీతవాతకద్దితకలితా (సీ.), సీతవాతకలితా (స్యా.)], సుత్తం ఝాయం [ఝానం (స్యా.), ఝాయిం (?)] నిబోధేన్తీ’’తి.

… చిత్తకో థేరో….

౨౩. ‘‘అహం ఖో వేళుగుమ్బస్మిం, భుత్వాన మధుపాయసం;

పదక్ఖిణం సమ్మసన్తో, ఖన్ధానం ఉదయబ్బయం;

సానుం పటిగమిస్సామి, వివేకమనుబ్రూహయ’’న్తి.

… గోసాలో థేరో….

౨౪. ‘‘అనువస్సికో పబ్బజితో, పస్స ధమ్మసుధమ్మతం;

తిస్సో విజ్జా అనుప్పత్తా, కతం బుద్ధస్స సాసన’’న్తి.

… సుగన్ధో థేరో….

౨౫. ‘‘ఓభాసజాతం ఫలగం, చిత్తం యస్స అభిణ్హసో;

తాదిసం భిక్ఖుమాసజ్జ, కణ్హ దుక్ఖం నిగచ్ఛసీ’’తి.

… నన్దియో థేరో….

౨౬. ‘‘సుత్వా సుభాసితం వాచం, బుద్ధస్సాదిచ్చబన్ధునో;

పచ్చబ్యధిం హి నిపుణం, వాలగ్గం ఉసునా యథా’’తి.

… అభయో థేరో….

౨౭. ‘‘దబ్బం కుసం పోటకిలం, ఉసీరం ముఞ్జపబ్బజం;

ఉరసా పనుదిస్సామి, వివేకమనుబ్రూహయ’’న్తి.

… లోమసకఙ్గియో థేరో….

౨౮. ‘‘కచ్చి నో వత్థపసుతో, కచ్చి నో భూసనారతో;

కచ్చి సీలమయం గన్ధం, కిం త్వం వాయసి [కచ్చి సీలమయం గన్ధం, త్వం వాసి (స్యా.)] నేతరా పజా’’తి.

… జమ్బుగామికపుత్తో థేరో….

౨౯. ‘‘సమున్నమయమత్తానం, ఉసుకారోవ తేజనం;

చిత్తం ఉజుం కరిత్వాన, అవిజ్జం భిన్ద హారితా’’తి.

… హారితో థేరో….

౩౦. ‘‘ఆబాధే మే సముప్పన్నే, సతి మే ఉదపజ్జథ;

ఆబాధో మే సముప్పన్నో, కాలో మే నప్పమజ్జితు’’న్తి.

… ఉత్తియో థేరో….

వగ్గో తతియో నిట్ఠితో.

తస్సుద్దానం –

నిగ్రోధో చిత్తకో థేరో, గోసాలథేరో సుగన్ధో;

నన్దియో అభయో థేరో, థేరో లోమసకఙ్గియో;

జమ్బుగామికపుత్తో చ, హారితో ఉత్తియో ఇసీతి.