౨. దుతియవగ్గో

౧౧. ‘‘పామోజ్జబహులో భిక్ఖు, ధమ్మే బుద్ధప్పవేదితే;

అధిగచ్ఛే పదం సన్తం, సఙ్ఖారూపసమం సుఖ’’న్తి.

… చూళవచ్ఛో [చూలగవచ్ఛో (సీ.)] థేరో….

౧౨. ‘‘పఞ్ఞాబలీ సీలవతూపపన్నో, సమాహితో ఝానరతో సతీమా;

యదత్థియం భోజనం భుఞ్జమానో, కఙ్ఖేథ కాలం ఇధ వీతరాగో’’తి.

… మహావచ్ఛో [మహాగవచ్ఛో (సీ.)] థేరో….

౧౩. ‘‘నీలబ్భవణ్ణా రుచిరా, సీతవారీ సుచిన్ధరా;

ఇన్దగోపకసఞ్ఛన్నా, తే సేలా రమయన్తి మ’’న్తి.

… వనవచ్ఛో థేరో….

౧౪. ‘‘ఉపజ్ఝాయో మం అవచ, ఇతో గచ్ఛామ సీవక;

గామే మే వసతి కాయో, అరఞ్ఞం మే గతో మనో;

సేమానకోపి గచ్ఛామి, నత్థి సఙ్గో విజానత’’న్తి.

… సివకో సామణేరో….

౧౫. ‘‘పఞ్చ ఛిన్దే పఞ్చ జహే, పఞ్చ చుత్తరి భావయే;

పఞ్చసఙ్గాతిగో భిక్ఖు, ఓఘతిణ్ణోతి వుచ్చతీ’’తి.

… కుణ్డధానో థేరో….

౧౬. ‘‘యథాపి భద్దో ఆజఞ్ఞో, నఙ్గలావత్తనీ సిఖీ;

గచ్ఛతి అప్పకసిరేన, ఏవం రత్తిన్దివా మమ;

గచ్ఛన్తి అప్పకసిరేన, సుఖే లద్ధే నిరామిసే’’తి.

… బేలట్ఠసీసో థేరో….

౧౭. ‘‘మిద్ధీ యదా హోతి మహగ్ఘసో చ, నిద్దాయితా సమ్పరివత్తసాయీ;

మహావరాహోవ నివాపపుట్ఠో, పునప్పునం గబ్భముపేతి మన్దో’’తి.

… దాసకో థేరో….

౧౮. ‘‘అహు బుద్ధస్స దాయాదో, భిక్ఖు భేసకళావనే;

కేవలం అట్ఠిసఞ్ఞాయ, అఫరీ పథవిం [పఠవిం (సీ. స్యా.)] ఇమం;

మఞ్ఞేహం కామరాగం సో, ఖిప్పమేవ పహిస్సతీ’’తి [పహీయభి (సబ్బత్థ పాళియం)].

… సిఙ్గాలపితా [సీగాలపితా (సీ.)] థేరో….

౧౯. [ధ. ప. ౮౦, ౧౪౫ ధమ్మపదేపి] ‘‘ఉదకం హి నయన్తి నేత్తికా, ఉసుకారా నమయన్తి [దమయన్తి (క.)] తేజనం;

దారుం నమయన్తి తచ్ఛకా, అత్తానం దమయన్తి సుబ్బతా’’తి.

… కులో [కుణ్డలో (సీ.), కుళో (స్యా. క.)] థేరో….

౨౦. ‘‘మరణే మే భయం నత్థి, నికన్తి నత్థి జీవితే;

సన్దేహం నిక్ఖిపిస్సామి, సమ్పజానో పటిస్సతో’’తి [పతిస్సతోతి (సీ. స్యా.)].

… అజితో థేరో ….

వగ్గో దుతియో నిట్ఠితో.

తస్సుద్దానం –

చూళవచ్ఛో మహావచ్ఛో, వనవచ్ఛో చ సీవకో;

కుణ్డధానో చ బేలట్ఠి, దాసకో చ తతోపరి;

సిఙ్గాలపితికో థేరో, కులో చ అజితో దసాతి.