౧. పఠమవగ్గో

౧. ‘‘ఛన్నా మే కుటికా సుఖా నివాతా, వస్స దేవ యథాసుఖం;

చిత్తం మే సుసమాహితం విముత్తం, ఆతాపీ విహరామి వస్స దేవా’’తి.

ఇత్థం సుదం [ఇత్థం సుమం (క. అట్ఠ.)] ఆయస్మా సుభూతిత్థేరో గాథం అభాసిత్థాతి.

౨. ‘‘ఉపసన్తో ఉపరతో, మన్తభాణీ అనుద్ధతో;

ధునాతి పాపకే ధమ్మే, దుమపత్తంవ మాలుతో’’తి.

ఇత్థం సుదం ఆయస్మా మహాకోట్ఠికో [మహాకోట్ఠితో (సీ. స్యా.)] థేరో గాథం అభాసిత్థాతి.

౩. ‘‘పఞ్ఞం ఇమం పస్స తథాగతానం, అగ్గి యథా పజ్జలితో నిసీథే;

ఆలోకదా చక్ఖుదదా భవన్తి, యే ఆగతానం వినయన్తి కఙ్ఖ’’న్తి.

ఇత్థం సుదం ఆయస్మా కఙ్ఖారేవతో థేరో గాథం అభాసిత్థాతి.

౪. ‘‘సమ్భిరేవ సమాసేథ, పణ్డితేహత్థదస్సిభి;

అత్థం మహన్తం గమ్భీరం, దుద్దసం నిపుణం అణుం;

ధీరా సమధిగచ్ఛన్తి, అప్పమత్తా విచక్ఖణా’’తి.

ఇత్థం సుదం ఆయస్మా పుణ్ణో మన్తాణిపుత్తో [మన్తానిపుత్తో (స్యా. క.)] థేరో గాథం అభాసిత్థాతి.

౫. ‘‘యో దుద్దమియో దమేన దన్తో, దబ్బో సన్తుసితో వితిణ్ణకఙ్ఖో;

విజితావీ అపేతభేరవో హి, దబ్బో సో పరినిబ్బుతో ఠితత్తో’’తి.

ఇత్థం సుదం ఆయస్మా దబ్బో థేరో గాథం అభాసిత్థాతి.

౬. ‘‘యో సీతవనం ఉపగా భిక్ఖు, ఏకో సన్తుసితో సమాహితత్తో;

విజితావీ అపేతలోమహంసో, రక్ఖం కాయగతాసతిం ధితిమా’’తి.

ఇత్థం సుదం ఆయస్మా సీతవనియో థేరో గాథం అభాసిత్థాతి.

౭. ‘‘యోపానుదీ మచ్చురాజస్స సేనం, నళసేతుంవ సుదుబ్బలం మహోఘో;

విజితావీ అపేతభేరవో హి, దన్తో సో పరినిబ్బుతో ఠితత్తో’’తి.

ఇత్థం సుదం ఆయస్మా భల్లియో థేరో గాథం అభాసిత్థాతి.

౮. ‘‘యో దుద్దమియో దమేన దన్తో, వీరో సన్తుసితో వితిణ్ణకఙ్ఖో;

విజితావీ అపేతలోమహంసో, వీరో సో పరినిబ్బుతో ఠితత్తో’’తి.

ఇత్థం సుదం ఆయస్మా వీరో థేరో గాథం అభాసిత్థాతి.

౯. ‘‘స్వాగతం న దురాగతం [నాపగతం (సీ. స్యా.)], నయిదం దుమన్తితం మమ;

సంవిభత్తేసు ధమ్మేసు, యం సేట్ఠం తదుపాగమి’’న్తి.

ఇత్థం సుదం ఆయస్మా పిలిన్దవచ్ఛో [పిలిన్దివచ్ఛో (సీ.)] థేరో గాథం అభాసిత్థాతి.

౧౦. ‘‘విహరి అపేక్ఖం ఇధ వా హురం వా, యో వేదగూ సమితో యతత్తో;

సబ్బేసు ధమ్మేసు అనూపలిత్తో, లోకస్స జఞ్ఞా ఉదయబ్బయఞ్చా’’తి.

ఇత్థం సుదం ఆయస్మా పుణ్ణమాసో థేరో గాథం అభాసిత్థాతి.

వగ్గో పఠమో నిట్ఠితో.

తస్సుద్దానం –

సుభూతి కోట్ఠికో థేరో, కఙ్ఖారేవతసమ్మతో;

మన్తాణిపుత్తో దబ్బో చ, సీతవనియో చ భల్లియో;

వీరో పిలిన్దవచ్ఛో చ, పుణ్ణమాసో తమోనుదోతి.