౩. పుణ్ణకమాణవపుచ్ఛా

౧౦౪౯. ‘‘అనేజం మూలదస్సావిం, (ఇచ్చాయస్మా పుణ్ణకో)

అత్థి [అత్థీ (స్యా.)] పఞ్హేన ఆగమం;

కిం నిస్సితా ఇసయో మనుజా, ఖత్తియా బ్రాహ్మణా దేవతానం;

యఞ్ఞమకప్పయింసు పుథూధ లోకే, పుచ్ఛామి తం భగవా బ్రూహి మే తం’’.

౧౦౫౦. ‘‘యే కేచిమే ఇసయో మనుజా, (పుణ్ణకాతి భగవా)

ఖత్తియా బ్రాహ్మణా దేవతానం;

యఞ్ఞమకప్పయింసు పుథూధ లోకే, ఆసీసమానా పుణ్ణక ఇత్థత్తం [ఇత్థభావం (సీ. స్యా.)];

జరం సితా యఞ్ఞమకప్పయింసు’’.

౧౦౫౧. ‘‘యే కేచిమే ఇసయో మనుజా, (ఇచ్చాయస్మా పుణ్ణకో)

ఖత్తియా బ్రాహ్మణా దేవతానం;

యఞ్ఞమకప్పయింసు పుథూధ లోకే, కచ్చిస్సు తే భగవా యఞ్ఞపథే అప్పమత్తా;

అతారుం జాతిఞ్చ జరఞ్చ మారిస, పుచ్ఛామి తం భగవా బ్రూహి మే తం’’.

౧౦౫౨. ‘‘ఆసీసన్తి థోమయన్తి, అభిజప్పన్తి జుహన్తి; (పుణ్ణకాతి భగవా)

కామాభిజప్పన్తి పటిచ్చ లాభం, తే యాజయోగా భవరాగరత్తా;

నాతరింసు జాతిజరన్తి బ్రూమి’’.

౧౦౫౩. ‘‘తే చే నాతరింసు యాజయోగా, (ఇచ్చాయస్మా పుణ్ణకో)

యఞ్ఞేహి జాతిఞ్చ జరఞ్చ మారిస;

అథ కో చరహి దేవమనుస్సలోకే, అతారి జాతిఞ్చ జరఞ్చ మారిస;

పుచ్ఛామి తం భగవా బ్రూహి మే తం’’.

౧౦౫౪. ‘‘సఙ్ఖాయ లోకస్మి పరోపరాని [పరోవరాని (సీ. స్యా.)], (పుణ్ణకాతి భగవా)

యస్సిఞ్జితం నత్థి కుహిఞ్చి లోకే;

సన్తో విధూమో అనీఘో నిరాసో, అతారి సో జాతిజరన్తి బ్రూమీ’’తి.

పుణ్ణకమాణవపుచ్ఛా తతియా నిట్ఠితా.