౨. ఆమగన్ధసుత్తం

౨౪౨. ‘‘సామాకచిఙ్గూలకచీనకాని చ, పత్తప్ఫలం మూలఫలం గవిప్ఫలం;

ధమ్మేన లద్ధం సతమస్నమానా [సతమసమానా (సీ. పీ.), సతమస్సమానా (స్యా. కం.)], న కామకామా అలికం భణన్తి.

౨౪౩. ‘‘యదస్నమానో సుకతం సునిట్ఠితం, పరేహి దిన్నం పయతం పణీతం;

సాలీనమన్నం పరిభుఞ్జమానో, సో భుఞ్జసీ కస్సప ఆమగన్ధం.

౨౪౪. ‘‘న ఆమగన్ధో మమ కప్పతీతి, ఇచ్చేవ త్వం భాససి బ్రహ్మబన్ధు;

సాలీనమన్నం పరిభుఞ్జమానో, సకున్తమంసేహి సుసఙ్ఖతేహి;

పుచ్ఛామి తం కస్సప ఏతమత్థం, కథం పకారో తవ ఆమగన్ధో’’.

౨౪౫. ‘‘పాణాతిపాతో వధఛేదబన్ధనం, థేయ్యం ముసావాదో నికతివఞ్చనాని చ;

అజ్ఝేనకుత్తం [అజ్ఝేన కుజ్జం (సీ. పీ.)] పరదారసేవనా, ఏసామగన్ధో న హి మంసభోజనం.

౨౪౬. ‘‘యే ఇధ కామేసు అసఞ్ఞతా జనా, రసేసు గిద్ధా అసుచిభావమస్సితా [అసుచీకమిస్సితా (సీ. స్యా. కం. పీ.)];

నత్థికదిట్ఠీ విసమా దురన్నయా, ఏసామగన్ధో న హి మంసభోజనం.

౨౪౭. ‘‘యే లూఖసా దారుణా పిట్ఠిమంసికా [యే లూఖరసా దారుణా పరపిట్ఠిమంసికా (క.)], మిత్తద్దునో నిక్కరుణాతిమానినో;

అదానసీలా న చ దేన్తి కస్సచి, ఏసామగన్ధో న హి మంసభోజనం.

౨౪౮. ‘‘కోధో మదో థమ్భో పచ్చుపట్ఠాపనా [పచ్చుట్ఠాపనా చ (సీ. స్యా.), పచ్చుట్ఠాపనా (పీ.)], మాయా ఉసూయా భస్ససముస్సయో చ;

మానాతిమానో చ అసబ్భి సన్థవో, ఏసామగన్ధో న హి మంసభోజనం.

౨౪౯. ‘‘యే పాపసీలా ఇణఘాతసూచకా, వోహారకూటా ఇధ పాటిరూపికా [పాతిరూపికా (?)];

నరాధమా యేధ కరోన్తి కిబ్బిసం, ఏసామగన్ధో న హి మంసభోజనం.

౨౫౦. ‘‘యే ఇధ పాణేసు అసఞ్ఞతా జనా, పరేసమాదాయ విహేసముయ్యుతా;

దుస్సీలలుద్దా ఫరుసా అనాదరా, ఏసామగన్ధో న హి మంసభోజనం.

౨౫౧. ‘‘ఏతేసు గిద్ధా విరుద్ధాతిపాతినో, నిచ్చుయ్యుతా పేచ్చ తమం వజన్తి యే;

పతన్తి సత్తా నిరయం అవంసిరా, ఏసామగన్ధో న హి మంసభోజనం.

౨౫౨. ‘‘న మచ్ఛమంసానమనాసకత్తం [న మచ్ఛమంసం న అనాసకత్తం (సీ. అట్ఠ మూలపాఠో), న మంచ్ఛమంసానానాసకత్తం (స్యా. క.)], న నగ్గియం న ముణ్డియం జటాజల్లం;

ఖరాజినాని నాగ్గిహుత్తస్సుపసేవనా, యే వాపి లోకే అమరా బహూ తపా;

మన్తాహుతీ యఞ్ఞముతూపసేవనా, సోధేన్తి మచ్చం అవితిణ్ణకఙ్ఖం.

౨౫౩. ‘‘యో తేసు [సోతేసు (సీ. పీ.)] గుత్తో విదితిన్ద్రియో చరే, ధమ్మే ఠితో అజ్జవమద్దవే రతో;

సఙ్గాతిగో సబ్బదుక్ఖప్పహీనో, న లిప్పతి [న లిమ్పతి (స్యా. కం క.)] దిట్ఠసుతేసు ధీరో’’.

౨౫౪. ఇచ్చేతమత్థం భగవా పునప్పునం, అక్ఖాసి నం [తం (సీ. పీ.)] వేదయి మన్తపారగూ;

చిత్రాహి గాథాహి మునీ పకాసయి, నిరామగన్ధో అసితో దురన్నయో.

౨౫౫. సుత్వాన బుద్ధస్స సుభాసితం పదం, నిరామగన్ధం సబ్బదుక్ఖప్పనూదనం;

నీచమనో వన్ది తథాగతస్స, తత్థేవ పబ్బజ్జమరోచయిత్థాతి.

ఆమగన్ధసుత్తం దుతియం నిట్ఠితం.