౯. హేమవతసుత్తం

౧౫౩. ‘‘అజ్జ పన్నరసో ఉపోసథో, (ఇతి సాతాగిరో యక్ఖో)

దిబ్బా [దిబ్యా (సీ. స్యా. కం. పీ.)] రత్తి ఉపట్ఠితా;

అనోమనామం సత్థారం, హన్ద పస్సామ గోతమం’’.

౧౫౪. ‘‘కచ్చి మనో సుపణిహితో, (ఇతి హేమవతో యక్ఖో)

సబ్బభూతేసు తాదినో;

కచ్చి ఇట్ఠే అనిట్ఠే చ, సఙ్కప్పస్స వసీకతా’’.

౧౫౫. ‘‘మనో చస్స సుపణిహితో, (ఇతి సాతాగిరో యక్ఖో)

సబ్బభూతేసు తాదినో;

అథో ఇట్ఠే అనిట్ఠే చ, సఙ్కప్పస్స వసీకతా’’.

౧౫౬. ‘‘కచ్చి అదిన్నం నాదియతి, (ఇతి హేమవతో యక్ఖో)

కచ్చి పాణేసు సఞ్ఞతో;

కచ్చి ఆరా పమాదమ్హా, కచ్చి ఝానం న రిఞ్చతి’’.

౧౫౭. ‘‘న సో అదిన్నం ఆదియతి, (ఇతి సాతాగిరో యక్ఖో)

అథో పాణేసు సఞ్ఞతో;

అథో ఆరా పమాదమ్హా, బుద్ధో ఝానం న రిఞ్చతి’’.

౧౫౮. ‘‘కచ్చి ముసా న భణతి, (ఇతి హేమవతో యక్ఖో)

కచ్చి న ఖీణబ్యప్పథో;

కచ్చి వేభూతియం నాహ, కచ్చి సమ్ఫం న భాసతి’’.

౧౫౯. ‘‘ముసా చ సో న భణతి, (ఇతి సాతాగిరో యక్ఖో)

అథో న ఖీణబ్యప్పథో;

అథో వేభూతియం నాహ, మన్తా అత్థం చ [అత్థం సో (సీ. పీ. క.)] భాసతి’’.

౧౬౦. ‘‘కచ్చి న రజ్జతి కామేసు, (ఇతి హేమవతో యక్ఖో)

కచ్చి చిత్తం అనావిలం;

కచ్చి మోహం అతిక్కన్తో, కచ్చి ధమ్మేసు చక్ఖుమా’’.

౧౬౧. ‘‘న సో రజ్జతి కామేసు, (ఇతి సాతాగిరో యక్ఖో)

అథో చిత్తం అనావిలం;

సబ్బమోహం అతిక్కన్తో, బుద్ధో ధమ్మేసు చక్ఖుమా’’.

౧౬౨. ‘‘కచ్చి విజ్జాయ సమ్పన్నో, (ఇతి హేమవతో యక్ఖో )

కచ్చి సంసుద్ధచారణో;

కచ్చిస్స ఆసవా ఖీణా, కచ్చి నత్థి పునబ్భవో’’.

౧౬౩. ‘‘విజ్జాయ చేవ సమ్పన్నో, (ఇతి సాతాగిరో యక్ఖో)

అథో సంసుద్ధచారణో;

సబ్బస్స ఆసవా ఖీణా, నత్థి తస్స పునబ్భవో’’.

౧౬౪. ‘‘సమ్పన్నం మునినో చిత్తం, కమ్మునా బ్యప్పథేన చ;

విజ్జాచరణసమ్పన్నం, ధమ్మతో నం పసంసతి’’.

౧౬౫. ‘‘సమ్పన్నం మునినో చిత్తం, కమ్మునా బ్యప్పథేన చ;

విజ్జాచరణసమ్పన్నం, ధమ్మతో అనుమోదసి’’.

౧౬౬. ‘‘సమ్పన్నం మునినో చిత్తం, కమ్మునా బ్యప్పథేన చ;

విజ్జాచరణసమ్పన్నం, హన్ద పస్సామ గోతమం.

౧౬౭. ‘‘ఏణిజఙ్ఘం కిసం వీరం [ధీరం (స్యా.)], అప్పాహారం అలోలుపం;

మునిం వనస్మిం ఝాయన్తం, ఏహి పస్సామ గోతమం.

౧౬౮. ‘‘సీహంవేకచరం నాగం, కామేసు అనపేక్ఖినం;

ఉపసఙ్కమ్మ పుచ్ఛామ, మచ్చుపాసప్పమోచనం.

౧౬౯. ‘‘అక్ఖాతారం పవత్తారం, సబ్బధమ్మాన పారగుం;

బుద్ధం వేరభయాతీతం, మయం పుచ్ఛామ గోతమం’’.

౧౭౦. ‘‘కిస్మిం లోకో సముప్పన్నో, (ఇతి హేమవతో యక్ఖో)

కిస్మిం కుబ్బతి సన్థవం [సన్ధవం (క.)];

కిస్స లోకో ఉపాదాయ, కిస్మిం లోకో విహఞ్ఞతి’’.

౧౭౧. ‘‘ఛసు [ఛస్సు (సీ. పీ.)] లోకో సముప్పన్నో, (హేమవతాతి భగవా)

ఛసు కుబ్బతి సన్థవం;

ఛన్నమేవ ఉపాదాయ, ఛసు లోకో విహఞ్ఞతి’’.

౧౭౨. ‘‘కతమం తం ఉపాదానం, యత్థ లోకో విహఞ్ఞతి;

నియ్యానం పుచ్ఛితో బ్రూహి, కథం దుక్ఖా పముచ్చతి’’ [పముఞ్చతి (స్యా.)].

౧౭౩. ‘‘పఞ్చ కామగుణా లోకే, మనోఛట్ఠా పవేదితా;

ఏత్థ ఛన్దం విరాజేత్వా, ఏవం దుక్ఖా పముచ్చతి.

౧౭౪. ‘‘ఏతం లోకస్స నియ్యానం, అక్ఖాతం వో యథాతథం;

ఏతం వో అహమక్ఖామి, ఏవం దుక్ఖా పముచ్చతి’’.

౧౭౫. ‘‘కో సూధ తరతి ఓఘం, కోధ తరతి అణ్ణవం;

అప్పతిట్ఠే అనాలమ్బే, కో గమ్భీరే న సీదతి’’.

౧౭౬. ‘‘సబ్బదా సీలసమ్పన్నో, పఞ్ఞవా సుసమాహితో;

అజ్ఝత్తచిన్తీ [అజ్ఝత్తసఞ్ఞీ (స్యా. కం. క.)] సతిమా, ఓఘం తరతి దుత్తరం.

౧౭౭. ‘‘విరతో కామసఞ్ఞాయ, సబ్బసంయోజనాతిగో;

నన్దీభవపరిక్ఖీణో, సో గమ్భీరే న సీదతి’’.

౧౭౮. ‘‘గబ్భీరపఞ్ఞం నిపుణత్థదస్సిం, అకిఞ్చనం కామభవే అసత్తం;

తం పస్సథ సబ్బధి విప్పముత్తం, దిబ్బే పథే కమమానం మహేసిం.

౧౭౯. ‘‘అనోమనామం నిపుణత్థదస్సిం, పఞ్ఞాదదం కామాలయే అసత్తం;

తం పస్సథ సబ్బవిదుం సుమేధం, అరియే పథే కమమానం మహేసిం.

౧౮౦. ‘‘సుదిట్ఠం వత నో అజ్జ, సుప్పభాతం సుహుట్ఠితం;

యం అద్దసామ సమ్బుద్ధం, ఓఘతిణ్ణమనాసవం.

౧౮౧. ‘‘ఇమే దససతా యక్ఖా, ఇద్ధిమన్తో యసస్సినో;

సబ్బే తం సరణం యన్తి, త్వం నో సత్థా అనుత్తరో.

౧౮౨. ‘‘తే మయం విచరిస్సామ, గామా గామం నగా నగం;

నమస్సమానా సమ్బుద్ధం, ధమ్మస్స చ సుధమ్మత’’న్తి.

హేమవతసుత్తం నవమం నిట్ఠితం.