౮. మేత్తసుత్తం

౧౪౩. కరణీయమత్థకుసలేన, యన్త సన్తం పదం అభిసమేచ్చ;

సక్కో ఉజూ చ సుహుజూ [సూజూ (సీ.)] చ, సూవచో చస్స ముదు అనతిమానీ.

౧౪౪. సన్తుస్సకో చ సుభరో చ, అప్పకిచ్చో చ సల్లహుకవుత్తి;

సన్తిన్ద్రియో చ నిపకో చ, అప్పగబ్భో కులేస్వననుగిద్ధో.

౧౪౫. న చ ఖుద్దమాచరే కిఞ్చి, యేన విఞ్ఞూ పరే ఉపవదేయ్యుం;

సుఖినో వ ఖేమినో హోన్తు, సబ్బసత్తా [సబ్బే సత్తా (సీ. స్యా.)] భవన్తు సుఖితత్తా.

౧౪౬. యే కేచి పాణభూతత్థి, తసా వా థావరా వనవసేసా;

దీఘా వా యే వ మహన్తా [మహన్త (?)], మజ్ఝిమా రస్సకా అణుకథూలా.

౧౪౭. దిట్ఠా వా యే వ అదిట్ఠా [అదిట్ఠ (?)], యే వ [యే చ (సీ. స్యా. కం. పీ.)] దూరే వసన్తి అవిదూరే;

భూతా వ సమ్భవేసీ వ [భూతా వా సమ్భవేసీ వా (స్యా. కం. పీ. క.)], సబ్బసత్తా భవన్తు సుఖితత్తా.

౧౪౮. న పరో పరం నికుబ్బేథ, నాతిమఞ్ఞేథ కత్థచి న కఞ్చి [నం కఞ్చి (సీ. పీ.), నం కిఞ్చి (స్యా.), న కిఞ్చి (క.)];

బ్యారోసనా పటిఘసఞ్ఞా, నాఞ్ఞమఞ్ఞస్స దుక్ఖమిచ్ఛేయ్య.

౧౪౯. మాతా యథా నియం పుత్తమాయుసా ఏకపుత్తమనురక్ఖే;

ఏవమ్పి సబ్బభూతేసు, మానసం భావయే అపరిమాణం.

౧౫౦. మేత్తఞ్చ సబ్బలోకస్మి, మానసం భావయే అపరిమాణం;

ఉద్ధం అధో చ తిరియఞ్చ, అసమ్బాధం అవేరమసపత్తం.

౧౫౧. తిట్ఠం చరం నిసిన్నో వ [వా (సీ. స్యా. కం. పీ.)], సయానో యావతాస్స వితమిద్ధో [విగతమిద్ధో (బహూసు)];

ఏతం సతిం అధిట్ఠేయ్య, బ్రహ్మమేతం విహారమిధమాహు.

౧౫౨. దిట్ఠిఞ్చ అనుపగ్గమ్మ, సీలవా దస్సనేన సమ్పన్నో;

కామేసు వినయ [వినేయ్య (సీ. స్యా. పీ.)] గేధం, న హి జాతుగ్గబ్భసేయ్య పునరేతీతి.

మేత్తసుత్తం అట్ఠమం నిట్ఠితం.