౬. పరాభవసుత్తం

ఏవం మే సుతం – ఏకం సమయం భగవా సావత్థియం విహరతి జేతవనే అనాథపిణ్డికస్స ఆరామే. అథ ఖో అఞ్ఞతరా దేవతా అభిక్కన్తాయ రత్తియా అభిక్కన్తవణ్ణా కేవలకప్పం జేతవనం ఓభాసేత్వా యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం అట్ఠాసి. ఏకమన్తం ఠితా ఖో సా దేవతా భగవన్తం గాథాయ అజ్ఝభాసి –

౯౧. ‘‘పరాభవన్తం పురిసం, మయం పుచ్ఛామ గోతమ [గోతమం (సీ. స్యా.)];

భగవన్తం [భవన్తం (స్యా. క.)] పుట్ఠుమాగమ్మ, కిం పరాభవతో ముఖం’’.

౯౨. ‘‘సువిజానో భవం హోతి, సువిజానో [దువిజానో (స్యా. క.)] పరాభవో;

ధమ్మకామో భవం హోతి, ధమ్మదేస్సీ పరాభవో’’.

౯౩. ‘‘ఇతి హేతం విజానామ, పఠమో సో పరాభవో;

దుతియం భగవా బ్రూహి, కిం పరాభవతో ముఖం’’.

౯౪. ‘‘అసన్తస్స పియా హోన్తి, సన్తే న కురుతే పియం;

అసతం ధమ్మం రోచేతి, తం పరాభవతో ముఖం’’.

౯౫. ‘‘ఇతి హేతం విజానామ, దుతియో సో పరాభవో;

తతియం భగవా బ్రూహి, కిం పరాభవతో ముఖం’’.

౯౬. ‘‘నిద్దాసీలీ సభాసీలీ, అనుట్ఠాతా చ యో నరో;

అలసో కోధపఞ్ఞాణో, తం పరాభవతో ముఖం’’.

౯౭. ‘‘ఇతి హేతం విజానామ, తతియో సో పరాభవో;

చతుత్థం భగవా బ్రూహి, కిం పరాభవతో ముఖం’’.

౯౮. ‘‘యో మాతరం [యో మాతరం వా (సీ. స్యా. కం. పీ.)] పితరం వా, జిణ్ణకం గతయోబ్బనం;

పహు సన్తో న భరతి, తం పరాభవతో ముఖం’’.

౯౯. ‘‘ఇతి హేతం విజానామ, చతుత్థో సో పరాభవో;

పఞ్చమం భగవా బ్రూహి, కిం పరాభవతో ముఖం’’.

౧౦౦. ‘‘యో బ్రాహ్మణం [యో బ్రాహ్మణం వా (సీ. స్యా. కం. పీ.)] సమణం వా, అఞ్ఞం వాపి వనిబ్బకం;

ముసావాదేన వఞ్చేతి, తం పరాభవతో ముఖం’’.

౧౦౧. ‘‘ఇతి హేతం విజానామ, పఞ్చమో సో పరాభవో;

ఛట్ఠమం భగవా బ్రూహి, కిం పరాభవతో ముఖం’’.

౧౦౨. ‘‘పహూతవిత్తో పురిసో, సహిరఞ్ఞో సభోజనో;

ఏకో భుఞ్జతి సాదూని, తం పరాభవతో ముఖం’’.

౧౦౩. ‘‘ఇతి హేతం విజానామ, ఛట్ఠమో సో పరాభవో;

సత్తమం భగవా బ్రూహి, కిం పరాభవతో ముఖం’’.

౧౦౪. ‘‘జాతిత్థద్ధో ధనత్థద్ధో, గోత్తత్థద్ధో చ యో నరో;

సఞ్ఞాతిం అతిమఞ్ఞేతి, తం పరాభవతో ముఖం’’.

౧౦౫. ‘‘ఇతి హేతం విజానామ, సత్తమో సో పరాభవో;

అట్ఠమం భగవా బ్రూహి, కిం పరాభవతో ముఖం’’.

౧౦౬. ‘‘ఇత్థిధుత్తో సురాధుత్తో, అక్ఖధుత్తో చ యో నరో;

లద్ధం లద్ధం వినాసేతి, తం పరాభవతో ముఖం’’.

౧౦౭. ‘‘ఇతి హేతం విజానామ, అట్ఠమో సో పరాభవో;

నవమం భగవా బ్రూహి, కిం పరాభవతో ముఖం’’.

౧౦౮. ‘‘సేహి దారేహి అసన్తుట్ఠో [దారేహ్యసన్తుట్ఠో (క.)], వేసియాసు పదుస్సతి [పదిస్సతి (సీ.)];

దుస్సతి [దిస్సతి (సీ. పీ.)] పరదారేసు, తం పరాభవతో ముఖం’’.

౧౦౯. ‘‘ఇతి హేతం విజానామ, నవమో సో పరాభవో;

దసమం భగవా బ్రూహి, కిం పరాభవతో ముఖం’’.

౧౧౦. ‘‘అతీతయోబ్బనో పోసో, ఆనేతి తిమ్బరుత్థనిం;

తస్సా ఇస్సా న సుపతి, తం పరాభవతో ముఖం’’.

౧౧౧. ‘‘ఇతి హేతం విజానామ, దసమో సో పరాభవో;

ఏకాదసమం భగవా బ్రూహి, కిం పరాభవతో ముఖం’’.

౧౧౨. ‘‘ఇత్థిం సోణ్డిం వికిరణిం, పురిసం వాపి తాదిసం;

ఇస్సరియస్మిం ఠపేతి [ఠాపేతి (సీ. పీ.), థపేతి (క.)], తం పరాభవతో ముఖం’’.

౧౧౩. ‘‘ఇతి హేతం విజానామ, ఏకాదసమో సో పరాభవో;

ద్వాదసమం భగవా బ్రూహి, కిం పరాభవతో ముఖం’’.

౧౧౪. ‘‘అప్పభోగో మహాతణ్హో, ఖత్తియే జాయతే కులే;

సో చ రజ్జం పత్థయతి, తం పరాభవతో ముఖం’’.

౧౧౫. ‘‘ఏతే పరాభవే లోకే, పణ్డితో సమవేక్ఖియ;

అరియో దస్సనసమ్పన్నో, స లోకం భజతే సివ’’న్తి.

పరాభవసుత్తం ఛట్ఠం నిట్ఠితం.