౫. చున్దసుత్తం

౮౩. ‘‘పుచ్ఛామి మునిం పహూతపఞ్ఞం, (ఇతి చున్దో కమ్మారపుత్తో)

బుద్ధం ధమ్మస్సామిం వీతతణ్హం;

ద్విపదుత్తమం [దిపదుత్తమం (సీ. స్యా. కం. పీ.)] సారథీనం పవరం, కతి లోకే సమణా తదిఙ్ఘ బ్రూహి’’.

౮౪. ‘‘చతురో సమణా న పఞ్చమత్థి, (చున్దాతి భగవా)

తే తే ఆవికరోమి సక్ఖిపుట్ఠో;

మగ్గజినో మగ్గదేసకో చ, మగ్గే జీవతి యో చ మగ్గదూసీ’’.

౮౫. ‘‘కం మగ్గజినం వదన్తి బుద్ధా, (ఇతి చున్దో కమ్మారపుత్తో)

మగ్గక్ఖాయీ కథం అతుల్యో హోతి;

మగ్గే జీవతి మే బ్రూహి పుట్ఠో, అథ మే ఆవికరోహి మగ్గదూసిం’’ [మగ్గదూసీ (క.)].

౮౬. ‘‘యో తిణ్ణకథంకథో విసల్లో, నిబ్బానాభిరతో అనానుగిద్ధో;

లోకస్స సదేవకస్స నేతా, తాదిం మగ్గజినం వదన్తి బుద్ధా.

౮౭. ‘‘పరమం పరమన్తి యోధ ఞత్వా, అక్ఖాతి విభజతే ఇధేవ ధమ్మం;

తం కఙ్ఖఛిదం మునిం అనేజం, దుతియం భిక్ఖునమాహు మగ్గదేసిం.

౮౮. ‘‘యో ధమ్మపదే సుదేసితే, మగ్గే జీవతి సఞ్ఞతో సతీమా;

అనవజ్జపదాని సేవమానో, తతియం భిక్ఖునమాహు మగ్గజీవిం.

౮౯. ‘‘ఛదనం కత్వాన సుబ్బతానం, పక్ఖన్దీ కులదూసకో పగబ్భో;

మాయావీ అసఞ్ఞతో పలాపో, పతిరూపేన చరం స మగ్గదూసీ.

౯౦. ‘‘ఏతే చ పటివిజ్ఝి యో గహట్ఠో, సుతవా అరియసావకో సపఞ్ఞో;

సబ్బే నేతాదిసాతి [సబ్బే నే తాదిసాతి (సీ. స్యా. పీ.)] ఞత్వా, ఇతి దిస్వా న హాపేతి తస్స సద్ధా;

కథం హి దుట్ఠేన అసమ్పదుట్ఠం, సుద్ధం అసుద్ధేన సమం కరేయ్యా’’తి.

చున్దసుత్తం పఞ్చమం నిట్ఠితం.