౧౨. మునిసుత్తం

౨౦౯. సన్థవాతో [సన్ధవతో (క.)] భయం జాతం, నికేతా జాయతే రజో;

అనికేతమసన్థవం, ఏతం వే మునిదస్సనం.

౨౧౦. యో జాతముచ్ఛిజ్జ న రోపయేయ్య, జాయన్తమస్స నానుప్పవేచ్ఛే;

తమాహు ఏకం మునినం చరన్తం, అద్దక్ఖి సో సన్తిపదం మహేసి.

౨౧౧. సఙ్ఖాయ వత్థూని పమాయ [పహాయ (క. సీ. క.), సమాయ (క.) ప + మీ + త్వా = పమాయ, యథా నిస్సాయాతిపదం] బీజం, సినేహమస్స నానుప్పవేచ్ఛే;

స వే మునీ జాతిఖయన్తదస్సీ, తక్కం పహాయ న ఉపేతి సఙ్ఖం.

౨౧౨. అఞ్ఞాయ సబ్బాని నివేసనాని, అనికామయం అఞ్ఞతరమ్పి తేసం;

స వే మునీ వీతగేధో అగిద్ధో, నాయూహతీ పారగతో హి హోతి.

౨౧౩. సబ్బాభిభుం సబ్బవిదుం సుమేధం, సబ్బేసు ధమ్మేసు అనూపలిత్తం;

సబ్బఞ్జహం తణ్హక్ఖయే విముత్తం, తం వాపి ధీరా ముని [మునిం (సీ. పీ.)] వేదయన్తి.

౨౧౪. పఞ్ఞాబలం సీలవతూపపన్నం, సమాహితం ఝానరతం సతీమం;

సఙ్గా పముత్తం అఖిలం అనాసవం, తం వాపి ధీరా ముని వేదయన్తి.

౨౧౫. ఏకం చరన్తం మునిమప్పమత్తం, నిన్దాపసంసాసు అవేధమానం;

సీహంవ సద్దేసు అసన్తసన్తం, వాతంవ జాలమ్హి అసజ్జమానం;

పద్మంవ [పదుమంవ (సీ. స్యా. పీ.)] తోయేన అలిప్పమానం [అలిమ్పమానం (స్యా. క.)], నేతారమఞ్ఞేసమనఞ్ఞనేయ్యం;

తం వాపి ధీరా ముని వేదయన్తి.

౨౧౬. యో ఓగహణే థమ్భోరివాభిజాయతి, యస్మిం పరే వాచాపరియన్తం [వాచం పరియన్తం (క.)] వదన్తి;

తం వీతరాగం సుసమాహితిన్ద్రియం, తం వాపి ధీరా ముని వేదయన్తి.

౨౧౭. యో వే ఠితత్తో తసరంవ ఉజ్జు, జిగుచ్ఛతి కమ్మేహి పాపకేహి;

వీమంసమానో విసమం సమఞ్చ, తం వాపి ధీరా ముని వేదయన్తి.

౨౧౮. యో సఞ్ఞతత్తో న కరోతి పాపం, దహరో మజ్ఝిమో చ ముని [దహరో చ మజ్ఝో చ మునీ (సీ. స్యా. కం. పీ.)] యతత్తో;

అరోసనేయ్యో న సో రోసేతి కఞ్చి [న రోసేతి (స్యా.)], తం వాపి ధీరా ముని వేదయన్తి.

౨౧౯. యదగ్గతో మజ్ఝతో సేసతో వా, పిణ్డం లభేథ పరదత్తూపజీవీ;

నాలం థుతుం నోపి నిపచ్చవాదీ, తం వాపి ధీరా ముని వేదయన్తి.

౨౨౦. మునిం చరన్తం విరతం మేథునస్మా, యో యోబ్బనే నోపనిబజ్ఝతే క్వచి;

మదప్పమాదా విరతం విప్పముత్తం, తం వాపి ధీరా ముని వేదయన్తి.

౨౨౧. అఞ్ఞాయ లోకం పరమత్థదస్సిం, ఓఘం సముద్దం అతితరియ తాదిం;

తం ఛిన్నగన్థం అసితం అనాసవం, తం వాపి ధీరా ముని వేదయన్తి.

౨౨౨. అసమా ఉభో దూరవిహారవుత్తినో, గిహీ [గిహి (క.)] దారపోసీ అమమో చ సుబ్బతో;

పరపాణరోధాయ గిహీ అసఞ్ఞతో, నిచ్చం మునీ రక్ఖతి పాణినే [పాణినో (సీ.)] యతో.

౨౨౩. సిఖీ యథా నీలగీవో [నీలగివో (స్యా.)] విహఙ్గమో, హంసస్స నోపేతి జవం కుదాచనం;

ఏవం గిహీ నానుకరోతి భిక్ఖునో, మునినో వివిత్తస్స వనమ్హి ఝాయతోతి.

మునిసుత్తం ద్వాదసమం నిట్ఠితం.

ఉరగవగ్గో పఠమో నిట్ఠితో.