౧. ఉరగసుత్తం

౧. యో [యో వే (స్యా.)] ఉప్పతితం వినేతి కోధం, విసటం సప్పవిసంవ ఓసధేహి [ఓసధేభి (క.)];

సో భిక్ఖు జహాతి ఓరపారం, ఉరగో జిణ్ణమివత్తచం [జిణ్ణమివ తచం (సీ. స్యా. కం. పీ.), జిణ్ణమివా తచం (?)] పురాణం.

౨. యో రాగముదచ్ఛిదా అసేసం, భిసపుప్ఫంవ సరోరుహం [సరేరుహం (క.)] విగయ్హ;

సో భిక్ఖు జహాతి ఓరపారం, ఉరగో జిణ్ణమివత్తచం, పురాణం.

౩. యో తణ్హముదచ్ఛిదా అసేసం, సరితం సీఘసరం విసోసయిత్వా;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౪. యో మానముదబ్బధీ అసేసం, నళసేతుంవ సుదుబ్బలం మహోఘో;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౫. యో నాజ్ఝగమా భవేసు సారం, విచినం పుప్ఫమివ [పుప్ఫమివ (బహూసు)] ఉదుమ్బరేసు;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౬. యస్సన్తరతో న సన్తి కోపా, ఇతిభవాభవతఞ్చ [ఇతిబ్భవాభవతఞ్చ (క.)] వీతివత్తో;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౭. యస్స వితక్కా విధూపితా, అజ్ఝత్తం సువికప్పితా అసేసా;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౮. యో నాచ్చసారీ న పచ్చసారీ, సబ్బం అచ్చగమా ఇమం పపఞ్చం;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౯. యో నాచ్చసారీ న పచ్చసారీ, సబ్బం వితథమిదన్తి ఞత్వా [ఉత్వా (స్యా. పీ. క.)] లోకే;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౧౦. యో నాచ్చసారీ న పచ్చసారీ, సబ్బం వితథమిదన్తి వీతలోభో;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౧౧. యో నాచ్చసారీ న పచ్చసారీ, సబ్బం వితథమిదన్తి వీతరాగో;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౧౨. యో నాచ్చసారీ న పచ్చసారీ, సబ్బం వితథమిదన్తి వీతదోసో;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౧౩. యో నాచ్చసారీ న పచ్చసారీ, సబ్బం వితథమిదన్తి వీతమోహో;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౧౪. యస్సానుసయా న సన్తి కేచి, మూలా చ అకుసలా సమూహతాసే;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౧౫. యస్స దరథజా న సన్తి కేచి, ఓరం ఆగమనాయ పచ్చయాసే;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౧౬. యస్స వనథజా న సన్తి కేచి, వినిబన్ధాయ భవాయ హేతుకప్పా;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

౧౭. యో నీవరణే పహాయ పఞ్చ, అనిఘో తిణ్ణకథంకథో విసల్లో;

సో భిక్ఖు జహాతి ఓరపారం, ఉరగో జిణ్ణమివత్తచం పురాణం.

ఉరగసుత్తం పఠమం నిట్ఠితం.