౨. ధనియసుత్తం

౧౮. ‘‘పక్కోదనో దుద్ధఖీరోహమస్మి, (ఇతి ధనియో గోపో)

అనుతీరే మహియా సమానవాసో;

ఛన్నా కుటి ఆహితో గిని, అథ చే పత్థయసీ పవస్స దేవ’’.

౧౯. ‘‘అక్కోధనో విగతఖిలోహమస్మి [విగతఖీలోహమస్మి (సీ. పీ.)], (ఇతి భగవా)

అనుతీరే మహియేకరత్తివాసో;

వివటా కుటి నిబ్బుతో గిని, అథ చే పత్థయసీ పవస్స దేవ’’.

౨౦. ‘‘అన్ధకమకసా న విజ్జరే, (ఇతి ధనియో గోపో)

కచ్ఛే రూళ్హతిణే చరన్తి గావో;

వుట్ఠిమ్పి సహేయ్యుమాగతం, అథ చే పత్థయసీ పవస్స దేవ’’.

౨౧. ‘‘బద్ధాసి భిసీ సుసఙ్ఖతా, (ఇతి భగవా)

తిణ్ణో పారగతో వినేయ్య ఓఘం;

అత్థో భిసియా న విజ్జతి, అథ చే పత్థయసీ పవస్స దేవ’’.

౨౨. ‘‘గోపీ మమ అస్సవా అలోలా, (ఇతి ధనియో గోపో)

దీఘరత్తం [దీఘరత్త (క.)] సంవాసియా మనాపా;

తస్సా న సుణామి కిఞ్చి పాపం, అథ చే పత్థయసీ పవస్స దేవ’’.

౨౩. ‘‘చిత్తం మమ అస్సవం విముత్తం, (ఇతి భగవా)

దీఘరత్తం పరిభావితం సుదన్తం;

పాపం పన మే న విజ్జతి, అథ చే పత్థయసీ పవస్స దేవ’’.

౨౪. ‘‘అత్తవేతనభతోహమస్మి, (ఇతి ధనియో గోపో)

పుత్తా చ మే సమానియా అరోగా;

తేసం న సుణామి కిఞ్చి పాపం, అథ చే పత్థయసీ పవస్స దేవ’’.

౨౫. ‘‘నాహం భతకోస్మి కస్సచి, (ఇతి భగవా)

నిబ్బిట్ఠేన చరామి సబ్బలోకే;

అత్థో భతియా న విజ్జతి, అథ చే పత్థయసీ పవస్స దేవ’’.

౨౬. ‘‘అత్థి వసా అత్థి ధేనుపా, (ఇతి ధనియో గోపో)

గోధరణియో పవేణియోపి అత్థి;

ఉసభోపి గవమ్పతీధ అత్థి, అథ చే పత్థయసీ పవస్స దేవ’’.

౨౭. ‘‘నత్థి వసా నత్థి ధేనుపా, (ఇతి భగవా)

గోధరణియో పవేణియోపి నత్థి;

ఉసభోపి గవమ్పతీధ నత్థి, అథ చే పత్థయసీ పవస్స దేవ’’.

౨౮. ‘‘ఖిలా నిఖాతా అసమ్పవేధీ, (ఇతి ధనియో గోపో)

దామా ముఞ్జమయా నవా సుసణ్ఠానా;

న హి సక్ఖిన్తి ధేనుపాపి ఛేత్తుం [ఛేతుం (క.)], అథ చే పత్థయసీ పవస్స దేవ’’.

౨౯. ‘‘ఉసభోరివ ఛేత్వ [ఛేత్వా (స్యా. క.)] బన్ధనాని, (ఇతి భగవా)

నాగో పూతిలతంవ దాలయిత్వా [పూతిలతం పదాలయిత్వా (స్యా. క.)];

నాహం పునుపేస్సం [పున ఉపేస్సం (సీ. స్యా. కం. పీ.), పునుపేయ్య (క.)] గబ్భసేయ్యం, అథ చే పత్థయసీ పవస్స దేవ’’.

౩౦. ‘‘నిన్నఞ్చ థలఞ్చ పూరయన్తో, మహామేఘో పవస్సి తావదేవ;

సుత్వా దేవస్స వస్సతో, ఇమమత్థం ధనియో అభాసథ.

౩౧. ‘‘లాభా వత నో అనప్పకా, యే మయం భగవన్తం అద్దసామ;

సరణం తం ఉపేమ చక్ఖుమ, సత్థా నో హోహి తువం మహాముని.

౩౨. ‘‘గోపీ చ అహఞ్చ అస్సవా, బ్రహ్మచరియం [బ్రహ్మచరియ (క.)] సుగతే చరామసే;

జాతిమరణస్స పారగూ [పారగా (సీ. స్యా. కం. పీ.)], దుక్ఖస్సన్తకరా భవామసే’’.

౩౩. ‘‘నన్దతి పుత్తేహి పుత్తిమా, (ఇతి మారో పాపిమా)

గోమా [గోమికో (సీ. పీ.), గోపికో (స్యా. కం.), గోపియో (క.)] గోహి తథేవ నన్దతి;

ఉపధీ హి నరస్స నన్దనా, న హి సో నన్దతి యో నిరూపధి’’.

౩౪. ‘‘సోచతి పుత్తేహి పుత్తిమా, (ఇతి భగవా)

గోపియో గోహి తథేవ సోచతి;

ఉపధీ హి నరస్స సోచనా, న హి సో సోచతి యో నిరూపధీ’’తి.

ధనియసుత్తం దుతియం నిట్ఠితం.