౭. రాజపుత్తపేతవత్థు

౭౫౩. పుబ్బే కతానం కమ్మానం, విపాకో మథయే మనం;

రూపే సద్దే రసే గన్ధే, ఫోట్ఠబ్బే చ మనోరమే.

౭౫౪. నచ్చం గీతం రతిం ఖిడ్డం, అనుభుత్వా అనప్పకం;

ఉయ్యానే పరిచరిత్వా, పవిసన్తో గిరిబ్బజం.

౭౫౫. ఇసిం సునేత్త [సునిత (క.)] మద్దక్ఖి, అత్తదన్తం సమాహితం;

అప్పిచ్ఛం హిరిసమ్పన్నం, ఉఞ్ఛే పత్తగతే రతం.

౭౫౬. హత్థిక్ఖన్ధతో ఓరుయ్హ, లద్ధా భన్తేతి చాబ్రవి;

తస్స పత్తం గహేత్వాన, ఉచ్చం పగ్గయ్హ ఖత్తియో.

౭౫౭. థణ్డిలే పత్తం భిన్దిత్వా, హసమానో అపక్కమి;

‘‘రఞ్ఞో కితవస్సాహం పుత్తో, కిం మం భిక్ఖు కరిస్ససి’’.

౭౫౮. తస్స కమ్మస్స ఫరుసస్స, విపాకో కటుకో అహు;

యం రాజపుత్తో వేదేసి, నిరయమ్హి సమప్పితో.

౭౫౯. ఛళేవ చతురాసీతి, వస్సాని నవుతాని చ;

భుసం దుక్ఖం నిగచ్ఛిత్థో, నిరయే కతకిబ్బిసో.

౭౬౦. ఉత్తానోపి చ పచ్చిత్థ, నికుజ్జో వామదక్ఖిణో;

ఉద్ధంపాదో ఠితో చేవ, చిరం బాలో అపచ్చథ.

౭౬౧. బహూని వస్ససహస్సాని, పూగాని నహుతాని చ;

భుసం దుక్ఖం నిగచ్ఛిత్థో, నిరయే కతకిబ్బిసో.

౭౬౨. ఏతాదిసం ఖో కటుకం, అప్పదుట్ఠప్పదోసినం;

పచ్చన్తి పాపకమ్మన్తా, ఇసిమాసజ్జ సుబ్బతం.

౭౬౩. సో తత్థ బహువస్సాని, వేదయిత్వా బహుం దుఖం;

ఖుప్పిపాసహతో నామ [ఖుప్పిపాసాహతో నామ (సీ. పీ)], పేతో ఆసి తతో చుతో.

౭౬౪. ఏతమాదీనవం ఞత్వా [దిస్వా (సీ.)], ఇస్సరమదసమ్భవం;

పహాయ ఇస్సరమదం, నివాతమనువత్తయే.

౭౬౫. దిట్ఠేవ ధమ్మే పాసంసో, యో బుద్ధేసు సగారవో;

కాయస్స భేదా సప్పఞ్ఞో, సగ్గం సో ఉపపజ్జతీతి.

రాజపుత్తపేతవత్థు సత్తమం.