౮. గోణపేతవత్థు

౪౬. ‘‘కిం ను ఉమ్మత్తరూపోవ, లాయిత్వా హరితం తిణం;

ఖాద ఖాదాతి లపసి, గతసత్తం జరగ్గవం.

౪౭. ‘‘న హి అన్నేన పానేన, మతో గోణో సముట్ఠహే;

త్వంసి బాలో చ [బాలోవ (క.)] దుమ్మేధో, యథా తఞ్ఞోవ దుమ్మతీ’’తి.

౪౮. ‘‘ఇమే పాదా ఇదం సీసం, అయం కాయో సవాలధి;

నేత్తా తథేవ తిట్ఠన్తి, అయం గోణో సముట్ఠహే.

౪౯. ‘‘నాయ్యకస్స హత్థపాదా, కాయో సీసఞ్చ దిస్సతి;

రుదం మత్తికథూపస్మిం, నను త్వఞ్ఞేవ దుమ్మతీ’’తి.

౫౦. ‘‘ఆదిత్తం వత మం సన్తం, ఘతసిత్తంవ పావకం;

వారినా వియ ఓసిఞ్చం, సబ్బం నిబ్బాపయే దరం.

౫౧. ‘‘అబ్బహీ [అబ్బూళ్హం (బహూసు)] వత మే సల్లం, సోకం హదయనిస్సితం;

యో మే సోకపరేతస్స, పితుసోకం అపానుది.

౫౨. ‘‘స్వాహం అబ్బూళ్హసల్లోస్మి, సీతిభూతోస్మి నిబ్బుతో;

న సోచామి న రోదామి, తవ సుత్వాన మాణవ’.

౫౩. ఏవం కరోన్తి సప్పఞ్ఞా, యే హోన్తి అనుకమ్పకా;

వినివత్తయన్తి సోకమ్హా, సుజాతో పితరం యథాతి.

గోణపేతవత్థు అట్ఠమం.