౧. ఉద్దేసో

౨౦౯. పురిమనిదానం. ‘‘తయోమే, భిక్ఖవే, విమోక్ఖా. కతమే తయో? సుఞ్ఞతో విమోక్ఖో, అనిమిత్తో విమోక్ఖో, అప్పణిహితో విమోక్ఖో – ఇమే ఖో, భిక్ఖవే, తయో విమోక్ఖా.

‘‘అపి చ, అట్ఠసట్ఠి విమోక్ఖా – సుఞ్ఞతో విమోక్ఖో, అనిమిత్తో విమోక్ఖో, అప్పణిహితో విమోక్ఖో; అజ్ఝత్తవుట్ఠానో విమోక్ఖో, బహిద్ధావుట్ఠానో విమోక్ఖో, దుభతో వుట్ఠానో విమోక్ఖో; అజ్ఝత్తవుట్ఠానా చత్తారో విమోక్ఖా, బహిద్ధావుట్ఠానా చత్తారో విమోక్ఖా, దుభతో వుట్ఠానా చత్తారో విమోక్ఖా; అజ్ఝత్తవుట్ఠానానం అనులోమా చత్తారో విమోక్ఖా, బహిద్ధావుట్ఠానానం అనులోమా చత్తారో విమోక్ఖా, దుభతో వుట్ఠానానం అనులోమా చత్తారో విమోక్ఖా; అజ్ఝత్తవుట్ఠానపటిప్పస్సద్ధీ [అజ్ఝత్తవుట్ఠానా పటిప్పస్సద్ధీ (స్యా.)] చత్తారో విమోక్ఖా, బహిద్ధావుట్ఠానపటిప్పస్సద్ధీ చత్తారో విమోక్ఖా, దుభతో వుట్ఠానపటిప్పస్సద్ధీ చత్తారో విమోక్ఖా; రూపీ రూపాని పస్సతీతి విమోక్ఖో, అజ్ఝత్తం అరూపసఞ్ఞీ బహిద్ధా రూపాని పస్సతీతి విమోక్ఖో, సుభం తేవ అధిముత్తో హోతీతి విమోక్ఖో; ఆకాసానఞ్చాయతనసమాపత్తి విమోక్ఖో, విఞ్ఞాణఞ్చాయతనసమాపత్తి విమోక్ఖో, ఆకిఞ్చఞ్ఞాయతనసమాపత్తి విమోక్ఖో; నేవసఞ్ఞానాసఞ్ఞాయతనసమాపత్తి విమోక్ఖో, సఞ్ఞావేదయితనిరోధసమాపత్తి విమోక్ఖో; సమయవిమోక్ఖో, అసమయవిమోక్ఖో; సామయికో విమోక్ఖో, అసామయికో విమోక్ఖో; కుప్పో విమోక్ఖో, అకుప్పో విమోక్ఖో; లోకియో విమోక్ఖో, లోకుత్తరో విమోక్ఖో; సాసవో విమోక్ఖో, అనాసవో విమోక్ఖో; సామిసో విమోక్ఖో, నిరామిసో విమోక్ఖో; నిరామిసానిరామిసతరో విమోక్ఖో, పణిహితో విమోక్ఖో, అప్పణిహితో విమోక్ఖో, పణిహితప్పటిప్పస్సద్ధి విమోక్ఖో; సఞ్ఞుత్తో విమోక్ఖో, విసఞ్ఞుత్తో విమోక్ఖో; ఏకత్తవిమోక్ఖో, నానత్తవిమోక్ఖో, సఞ్ఞావిమోక్ఖో, ఞాణవిమోక్ఖో; సీతిసియావిమోక్ఖో [సీతీసియావిమోక్ఖో (సీ. అట్ఠ.)], ఝానవిమోక్ఖో, అనుపాదాచిత్తస్స విమోక్ఖో’’.