౩. తతియసుత్తన్తనిద్దేసో

౧౯౪. సావత్థినిదానం [సం. ని. ౫.౪౭౮-౪౭౯ పస్సితబ్బా]. ‘‘పఞ్చిమాని, భిక్ఖవే, ఇన్ద్రియాని. కతమాని పఞ్చ? సద్ధిన్ద్రియం, వీరియిన్ద్రియం, సతిన్ద్రియం, సమాధిన్ద్రియం, పఞ్ఞిన్ద్రియం. కత్థ చ, భిక్ఖవే, సద్ధిన్ద్రియం దట్ఠబ్బం? చతూసు సోతాపత్తియఙ్గేసు – ఏత్థ సద్ధిన్ద్రియం దట్ఠబ్బం. కత్థ చ, భిక్ఖవే, వీరియిన్ద్రియం దట్ఠబ్బం? చతూసు సమ్మప్పధానేసు – ఏత్థ వీరియిన్ద్రియం దట్ఠబ్బం. కత్థ చ, భిక్ఖవే, సతిన్ద్రియం దట్ఠబ్బం? చతూసు సతిపట్ఠానేసు – ఏత్థ సతిన్ద్రియం దట్ఠబ్బం. కత్థ చ, భిక్ఖవే, సమాధిన్ద్రియం దట్ఠబ్బం? చతూసు ఝానేసు – ఏత్థ సమాధిన్ద్రియం దట్ఠబ్బం. కత్థ చ, భిక్ఖవే, పఞ్ఞిన్ద్రియం దట్ఠబ్బం? చతూసు అరియసచ్చేసు – ఏత్థ పఞ్ఞిన్ద్రియం దట్ఠబ్బం’’.

చతూసు సోతాపత్తియఙ్గేసు సద్ధిన్ద్రియస్స వసేన కతిహాకారేహి పఞ్చిన్ద్రియాని దట్ఠబ్బాని? చతూసు సమ్మప్పధానేసు వీరియిన్ద్రియస్స వసేన కతిహాకారేహి పఞ్చిన్ద్రియాని దట్ఠబ్బాని? చతూసు సతిపట్ఠానేసు సతిన్ద్రియస్స వసేన కతిహాకారేహి పఞ్చిన్ద్రియాని దట్ఠబ్బాని? చతూసు ఝానేసు సమాధిన్ద్రియస్స వసేన కతిహాకారేహి పఞ్చిన్ద్రియాని దట్ఠబ్బాని? చతూసు అరియసచ్చేసు పఞ్ఞిన్ద్రియస్స వసేన కతిహాకారేహి పఞ్చిన్ద్రియాని దట్ఠబ్బాని?

చతూసు సోతాపత్తియఙ్గేసు సద్ధిన్ద్రియస్స వసేన వీసతియా ఆకారేహి పఞ్చిన్ద్రియాని దట్ఠబ్బాని. చతూసు సమ్మప్పధానేసు వీరియిన్ద్రియస్స వసేన వీసతియా ఆకారేహి పఞ్చిన్ద్రియాని దట్ఠబ్బాని. చతూసు సతిపట్ఠానేసు సతిన్ద్రియస్స వసేన వీసతియా ఆకారేహి పఞ్చిన్ద్రియాని దట్ఠబ్బాని. చతూసు ఝానేసు సమాధిన్ద్రియస్స వసేన వీసతియా ఆకారేహి పఞ్చిన్ద్రియాని దట్ఠబ్బాని. చతూసు అరియసచ్చేసు పఞ్ఞిన్ద్రియస్స వసేన వీసతియా ఆకారేహి పఞ్చిన్ద్రియాని దట్ఠబ్బాని.

క. పభేదగణననిద్దేసో

౧౯౫. చతూసు సోతాపత్తియఙ్గేసు సద్ధిన్ద్రియస్స వసేన కతమేహి వీసతియా ఆకారేహి పఞ్చిన్ద్రియాని దట్ఠబ్బాని? సప్పురిససంసేవే సోతాపత్తియఙ్గే అధిమోక్ఖాధిపతేయ్యట్ఠేన సద్ధిన్ద్రియం దట్ఠబ్బం, సద్ధిన్ద్రియస్స వసేన పగ్గహట్ఠేన వీరియిన్ద్రియం దట్ఠబ్బం, ఉపట్ఠానట్ఠేన సతిన్ద్రియం దట్ఠబ్బం, అవిక్ఖేపట్ఠేన సమాధిన్ద్రియం దట్ఠబ్బం, దస్సనట్ఠేన పఞ్ఞిన్ద్రియం దట్ఠబ్బం; సద్ధమ్మసవనే సోతాపత్తియఙ్గే… యోనిసోమనసికారే సోతాపత్తియఙ్గే… ధమ్మానుధమ్మపటిపత్తియా సోతాపత్తియఙ్గే అధిమోక్ఖాధిపతేయ్యట్ఠేన సద్ధిన్ద్రియం దట్ఠబ్బం, సద్ధిన్ద్రియస్స వసేన పగ్గహట్ఠేన వీరియిన్ద్రియం దట్ఠబ్బం, ఉపట్ఠానట్ఠేన సతిన్ద్రియం దట్ఠబ్బం, అవిక్ఖేపట్ఠేన సమాధిన్ద్రియం దట్ఠబ్బం, దస్సనట్ఠేన పఞ్ఞిన్ద్రియం దట్ఠబ్బం. చతూసు సోతాపత్తియఙ్గేసు సద్ధిన్ద్రియస్స వసేన ఇమేహి వీసతియా ఆకారేహి పఞ్చిన్ద్రియాని దట్ఠబ్బాని.

చతూసు సమ్మప్పధానేసు వీరియిన్ద్రియస్స వసేన కతమేహి వీసతియా ఆకారేహి పఞ్చిన్ద్రియాని దట్ఠబ్బాని? అనుప్పన్నానం పాపకానం అకుసలానం ధమ్మానం అనుప్పాదాయ సమ్మప్పధానే పగ్గహాధిపతేయ్యట్ఠేన వీరియిన్ద్రియం దట్ఠబ్బం, వీరియిన్ద్రియస్స వసేన ఉపట్ఠానట్ఠేన సతిన్ద్రియం దట్ఠబ్బం, అవిక్ఖేపట్ఠేన సమాధిన్ద్రియం దట్ఠబ్బం, దస్సనట్ఠేన పఞ్ఞిన్ద్రియం దట్ఠబ్బం, అధిమోక్ఖట్ఠేన సద్ధిన్ద్రియం దట్ఠబ్బం. ఉప్పన్నానం పాపకానం అకుసలానం ధమ్మానం పహానాయ సమ్మప్పధానే…పే… అనుప్పన్నానం కుసలానం ధమ్మానం ఉప్పాదాయ సమ్మప్పధానే…పే… ఉప్పన్నానం కుసలానం ధమ్మానం ఠితియా అసమ్మోసాయ భియ్యోభావాయ వేపుల్లాయ భావనాయ పారిపూరియా సమ్మప్పధానే పగ్గహాధిపతేయ్యట్ఠేన వీరియిన్ద్రియం దట్ఠబ్బం, వీరియిన్ద్రియస్స వసేన ఉపట్ఠానట్ఠేన సతిన్ద్రియం దట్ఠబ్బం, అవిక్ఖేపట్ఠేన సమాధిన్ద్రియం దట్ఠబ్బం, దస్సనట్ఠేన పఞ్ఞిన్ద్రియం దట్ఠబ్బం, అధిమోక్ఖట్ఠేన సద్ధిన్ద్రియం దట్ఠబ్బం. చతూసు సమ్మప్పధానేసు వీరియిన్ద్రియస్స వసేన ఇమేహి వీసతియా ఆకారేహి పఞ్చిన్ద్రియాని దట్ఠబ్బాని.

చతూసు సతిపట్ఠానేసు సతిన్ద్రియస్స వసేన కతమేహి వీసతియా ఆకారేహి పఞ్చిన్ద్రియాని దట్ఠబ్బాని? కాయే కాయానుపస్సనాసతిపట్ఠానే ఉపట్ఠానాధిపతేయ్యట్ఠేన సతిన్ద్రియం దట్ఠబ్బం, సతిన్ద్రియస్స వసేన అవిక్ఖేపట్ఠేన సమాధిన్ద్రియం దట్ఠబ్బం, దస్సనట్ఠేన పఞ్ఞిన్ద్రియం దట్ఠబ్బం, అధిమోక్ఖట్ఠేన సద్ధిన్ద్రియం దట్ఠబ్బం, పగ్గహట్ఠేన వీరియిన్ద్రియం దట్ఠబ్బం. వేదనాసు వేదనానుపస్సనాసతిపట్ఠానే…పే… చిత్తే చిత్తానుపస్సనాసతిపట్ఠానే… ధమ్మేసు ధమ్మానుపస్సనాసతిపట్ఠానే ఉపట్ఠానాధిపతేయ్యట్ఠేన సతిన్ద్రియం దట్ఠబ్బం, సతిన్ద్రియస్స వసేన అవిక్ఖేపట్ఠేన సమాధిన్ద్రియం దట్ఠబ్బం, దస్సనట్ఠేన పఞ్ఞిన్ద్రియం దట్ఠబ్బం, అధిమోక్ఖట్ఠేన సద్ధిన్ద్రియం దట్ఠబ్బం, పగ్గహట్ఠేన వీరియిన్ద్రియం దట్ఠబ్బం. చతూసు సతిపట్ఠానేసు సతిన్ద్రియస్స వసేన ఇమేహి వీసతియా ఆకారేహి పఞ్చిన్ద్రియాని దట్ఠబ్బాని.

చతూసు ఝానేసు సమాధిన్ద్రియస్స వసేన కతమేహి వీసతియా ఆకారేహి పఞ్చిన్ద్రియాని దట్ఠబ్బాని? పఠమే ఝానే అవిక్ఖేపాధిపతేయ్యట్ఠేన సమాధిన్ద్రియం దట్ఠబ్బం, సమాధిన్ద్రియస్స వసేన దస్సనట్ఠేన పఞ్ఞిన్ద్రియం దట్ఠబ్బం, అధిమోక్ఖట్ఠేన సద్ధిన్ద్రియం దట్ఠబ్బం, పగ్గహట్ఠేన వీరియిన్ద్రియం దట్ఠబ్బం, ఉపట్ఠానట్ఠేన సతిన్ద్రియం దట్ఠబ్బం. దుతియే ఝానే…పే… తతియే ఝానే… చతుత్థే ఝానే అవిక్ఖేపాధిపతేయ్యట్ఠేన సమాధిన్ద్రియం దట్ఠబ్బం, సమాధిన్ద్రియస్స వసేన దస్సనట్ఠేన పఞ్ఞిన్ద్రియం దట్ఠబ్బం, అధిమోక్ఖట్ఠేన సద్ధిన్ద్రియం దట్ఠబ్బం, పగ్గహట్ఠేన వీరియిన్ద్రియం దట్ఠబ్బం, ఉపట్ఠానట్ఠేన సతిన్ద్రియం దట్ఠబ్బం. చతూసు ఝానేసు సమాధిన్ద్రియస్స వసేన ఇమేహి వీసతియా ఆకారేహి పఞ్చిన్ద్రియాని దట్ఠబ్బాని.

చతూసు అరియసచ్చేసు పఞ్ఞిన్ద్రియస్స వసేన కతమేహి వీసతియా ఆకారేహి పఞ్చిన్ద్రియాని దట్ఠబ్బాని? దుక్ఖే అరియసచ్చే దస్సనాధిపతేయ్యట్ఠేన పఞ్ఞిన్ద్రియం దట్ఠబ్బం, పఞ్ఞిన్ద్రియస్స వసేన అధిమోక్ఖట్ఠేన సద్ధిన్ద్రియం దట్ఠబ్బం, పగ్గహట్ఠేన వీరియిన్ద్రియం దట్ఠబ్బం, ఉపట్ఠానట్ఠేన సతిన్ద్రియం దట్ఠబ్బం, అవిక్ఖేపట్ఠేన సమాధిన్ద్రియం దట్ఠబ్బం. దుక్ఖసముదయే అరియసచ్చే…పే… దుక్ఖనిరోధే అరియసచ్చే… దుక్ఖనిరోధగామినియా పటిపదాయ అరియసచ్చే దస్సనాధిపతేయ్యట్ఠేన పఞ్ఞిన్ద్రియం దట్ఠబ్బం, పఞ్ఞిన్ద్రియస్స వసేన అధిమోక్ఖట్ఠేన సద్ధిన్ద్రియం దట్ఠబ్బం, పగ్గహట్ఠేన వీరియిన్ద్రియం దట్ఠబ్బం, ఉపట్ఠానట్ఠేన సతిన్ద్రియం దట్ఠబ్బం, అవిక్ఖేపట్ఠేన సమాధిన్ద్రియం దట్ఠబ్బం. చతూసు అరియసచ్చేసు పఞ్ఞిన్ద్రియస్స వసేన ఇమేహి వీసతియా ఆకారేహి పఞ్చిన్ద్రియాని దట్ఠబ్బాని.

ఖ. చరియవారో

౧౯౬. చతూసు సోతాపత్తియఙ్గేసు సద్ధిన్ద్రియస్స వసేన కతిహాకారేహి పఞ్చన్నం ఇన్ద్రియానం చరియా దట్ఠబ్బా?

చతూసు సమ్మప్పధానేసు…పే… చతూసు సతిపట్ఠానేసు… చతూసు ఝానేసు… చతూసు అరియసచ్చేసు పఞ్ఞిన్ద్రియస్స వసేన కతిహాకారేహి పఞ్చన్నం ఇన్ద్రియానం చరియా దట్ఠబ్బా? చతూసు సోతాపత్తియఙ్గేసు సద్ధిన్ద్రియస్స వసేన వీసతియా ఆకారేహి పఞ్చన్నం ఇన్ద్రియానం చరియా దట్ఠబ్బా. చతూసు సమ్మప్పధానేసు…పే… చతూసు సతిపట్ఠానేసు… చతూసు ఝానేసు… చతూసు అరియసచ్చేసు పఞ్ఞిన్ద్రియస్స వసేన వీసతియా ఆకారేహి పఞ్చన్నం ఇన్ద్రియానం చరియా దట్ఠబ్బా.

చతూసు సోతాపత్తియఙ్గేసు సద్ధిన్ద్రియస్స వసేన కతమేహి వీసతియా ఆకారేహి పఞ్చన్నం ఇన్ద్రియానం చరియా దట్ఠబ్బా? సప్పురిససంసేవే సోతాపత్తియఙ్గే అధిమోక్ఖాధిపతేయ్యట్ఠేన సద్ధిన్ద్రియస్స చరియా దట్ఠబ్బా, సద్ధిన్ద్రియస్స వసేన పగ్గహట్ఠేన వీరియిన్ద్రియస్స చరియా దట్ఠబ్బా, ఉపట్ఠానట్ఠేన సతిన్ద్రియస్స చరియా దట్ఠబ్బా, అవిక్ఖేపట్ఠేన సమాధిన్ద్రియస్స చరియా దట్ఠబ్బా, దస్సనట్ఠేన పఞ్ఞిన్ద్రియస్స చరియా దట్ఠబ్బా. సద్ధమ్మసవనే సోతాపత్తియఙ్గే…పే… యోనిసో మనసికారే సోతాపత్తియఙ్గే… ధమ్మానుధమ్మపటిపత్తియా సోతాపత్తియఙ్గే అధిమోక్ఖాధిపతేయ్యట్ఠేన సద్ధిన్ద్రియస్స చరియా దట్ఠబ్బా, సద్ధిన్ద్రియస్స వసేన పగ్గహట్ఠేన వీరియిన్ద్రియస్స చరియా దట్ఠబ్బా, ఉపట్ఠానట్ఠేన సతిన్ద్రియస్స చరియా దట్ఠబ్బా, అవిక్ఖేపట్ఠేన సమాధిన్ద్రియస్స చరియా దట్ఠబ్బా, దస్సనట్ఠేన పఞ్ఞిన్ద్రియస్స చరియా దట్ఠబ్బా. చతూసు సోతాపత్తియఙ్గేసు సద్ధిన్ద్రియస్స వసేన ఇమేహి వీసతియా ఆకారేహి పఞ్చన్నం ఇన్ద్రియానం చరియా దట్ఠబ్బా.

చతూసు సమ్మప్పధానేసు వీరియిన్ద్రియస్స వసేన కతమేహి వీసతియా ఆకారేహి పఞ్చన్నం ఇన్ద్రియానం చరియా దట్ఠబ్బా? అనుప్పన్నానం పాపకానం అకుసలానం ధమ్మానం అనుప్పాదాయ సమ్మప్పధానే పగ్గహాధిపతేయ్యట్ఠేన వీరియిన్ద్రియస్స చరియా దట్ఠబ్బా, వీరియిన్ద్రియస్స వసేన ఉపట్ఠానట్ఠేన సతిన్ద్రియస్స చరియా దట్ఠబ్బా, అవిక్ఖేపట్ఠేన సమాధిన్ద్రియస్స చరియా దట్ఠబ్బా, దస్సనట్ఠేన పఞ్ఞిన్ద్రియస్స చరియా దట్ఠబ్బా, అధిమోక్ఖట్ఠేన సద్ధిన్ద్రియస్స చరియా దట్ఠబ్బా. ఉప్పన్నానం పాపకానం అకుసలానం ధమ్మానం పహానాయ సమ్మప్పధానే…పే… అనుప్పన్నానం కుసలానం ధమ్మానం ఉప్పాదాయ సమ్మప్పధానే…పే… ఉప్పన్నానం కుసలానం ధమ్మానం ఠితియా అసమ్మోసాయ భియ్యోభావాయ వేపుల్లాయ భావనాయ పారిపూరియా సమ్మప్పధానే పగ్గహాధిపతేయ్యట్ఠేన వీరియిన్ద్రియస్స చరియా దట్ఠబ్బా…పే… చతూసు సమ్మప్పధానేసు వీరియిన్ద్రియస్స వసేన ఇమేహి వీసతియా ఆకారేహి పఞ్చన్నం ఇన్ద్రియానం చరియా దట్ఠబ్బా.

చతూసు సతిపట్ఠానేసు సతిన్ద్రియస్స వసేన కతమేహి వీసతియా ఆకారేహి పఞ్చన్నం ఇన్ద్రియానం చరియా దట్ఠబ్బా? కాయే కాయానుపస్సనాసతిపట్ఠానే ఉపట్ఠానాధిపతేయ్యట్ఠేన సతిన్ద్రియస్స చరియా దట్ఠబ్బా, సతిన్ద్రియస్స వసేన అవిక్ఖేపట్ఠేన సమాధిన్ద్రియస్స చరియా దట్ఠబ్బా, దస్సనట్ఠేన పఞ్ఞిన్ద్రియస్స చరియా దట్ఠబ్బా, అధిమోక్ఖట్ఠేన సద్ధిన్ద్రియస్స చరియా దట్ఠబ్బా, పగ్గహట్ఠేన వీరియిన్ద్రియస్స చరియా దట్ఠబ్బా. వేదనాసు వేదనానుపస్సనాసతిపట్ఠానే…పే… చిత్తే చిత్తానుపస్సనాసతిపట్ఠానే…పే… ధమ్మేసు ధమ్మానుపస్సనాసతిపట్ఠానే ఉపట్ఠానాధిపతేయ్యట్ఠేన సతిన్ద్రియస్స చరియా దట్ఠబ్బా…పే… చతూసు సతిపట్ఠానేసు సతిన్ద్రియస్స వసేన ఇమేహి వీసతియా ఆకారేహి పఞ్చన్నం ఇన్ద్రియానం చరియా దట్ఠబ్బా.

చతూసు ఝానేసు సమాధిన్ద్రియస్స వసేన కతమేహి వీసతియా ఆకారేహి పఞ్చన్నం ఇన్ద్రియానం చరియా దట్ఠబ్బా? పఠమే ఝానే అవిక్ఖేపాధిపతేయ్యట్ఠేన సమాధిన్ద్రియస్స చరియా దట్ఠబ్బా, సమాధిన్ద్రియస్స వసేన దస్సనట్ఠేన పఞ్ఞిన్ద్రియస్స చరియా దట్ఠబ్బా, అధిమోక్ఖట్ఠేన సద్ధిన్ద్రియస్స చరియా దట్ఠబ్బా, పగ్గహట్ఠేన వీరియిన్ద్రియస్స చరియా దట్ఠబ్బా, ఉపట్ఠానట్ఠేన సతిన్ద్రియస్స చరియా దట్ఠబ్బా. దుతియే ఝానే…పే… తతియే ఝానే…పే… చతుత్థే ఝానే అవిక్ఖేపాధిపతేయ్యట్ఠేన సమాధిన్ద్రియస్స చరియా దట్ఠబ్బా…పే… చతూసు ఝానేసు సమాధిన్ద్రియస్స వసేన ఇమేహి వీసతియా ఆకారేహి పఞ్చన్నం ఇన్ద్రియానం చరియా దట్ఠబ్బా.

చతూసు అరియసచ్చేసు పఞ్ఞిన్ద్రియస్స వసేన కతమేహి వీసతియా ఆకారేహి పఞ్చన్నం ఇన్ద్రియానం చరియా దట్ఠబ్బా? దుక్ఖే అరియసచ్చే దస్సనాధిపతేయ్యట్ఠేన పఞ్ఞిన్ద్రియస్స చరియా దట్ఠబ్బా, పఞ్ఞిన్ద్రియస్స వసేన అధిమోక్ఖట్ఠేన సద్ధిన్ద్రియస్స చరియా దట్ఠబ్బా, పగ్గహట్ఠేన వీరియిన్ద్రియస్స చరియా దట్ఠబ్బా, ఉపట్ఠానట్ఠేన సతిన్ద్రియస్స చరియా దట్ఠబ్బా, అవిక్ఖేపట్ఠేన సమాధిన్ద్రియస్స చరియా దట్ఠబ్బా. దుక్ఖసముదయే అరియసచ్చే…పే… దుక్ఖనిరోధే అరియసచ్చే… దుక్ఖనిరోధగామినియా పటిపదాయ అరియసచ్చే దస్సనాధిపతేయ్యట్ఠేన పఞ్ఞిన్ద్రియస్స చరియా దట్ఠబ్బా, పఞ్ఞిన్ద్రియస్స వసేన అధిమోక్ఖట్ఠేన సద్ధిన్ద్రియస్స చరియా దట్ఠబ్బా, పగ్గహట్ఠేన వీరియిన్ద్రియస్స చరియా దట్ఠబ్బా, ఉపట్ఠానట్ఠేన సతిన్ద్రియస్స చరియా దట్ఠబ్బా, అవిక్ఖేపట్ఠేన సమాధిన్ద్రియస్స చరియా దట్ఠబ్బా. చతూసు అరియసచ్చేసు పఞ్ఞిన్ద్రియస్స వసేన ఇమేహి వీసతియా ఆకారేహి పఞ్చన్నం ఇన్ద్రియానం చరియా దట్ఠబ్బా.

గ. చారవిహారనిద్దేసో

౧౯౭. చారో చ విహారో చ అనుబుద్ధో హోతి పటివిద్ధో, యథాచరన్తం యథావిహరన్తం విఞ్ఞూ సబ్రహ్మచారీ గమ్భీరేసు ఠానేసు ఓకప్పేయ్యుం – ‘‘అద్ధా, అయమాయస్మా పత్తో వా పాపుణిస్సతి వా’’.

చరియాతి అట్ఠ చరియాయో – ఇరియాపథచరియా, ఆయతనచరియా, సతిచరియా, సమాధిచరియా, ఞాణచరియా, మగ్గచరియా, పత్తిచరియా, లోకత్థచరియాతి. ఇరియాపథచరియాతి చతూసు ఇరియాపథేసు. ఆయతనచరియాతి ఛసు అజ్ఝత్తికబాహిరేసు ఆయతనేసు. సతిచరియాతి చతూసు సతిపట్ఠానేసు. సమాధిచరియాతి చతూసు ఝానేసు. ఞాణచరియాతి చతూసు అరియసచ్చేసు. మగ్గచరియాతి చతూసు అరియమగ్గేసు. పత్తిచరియాతి చతూసు సామఞ్ఞఫలేసు. లోకత్థచరియాతి తథాగతేసు అరహన్తేసు సమ్మాసమ్బుద్ధేసు, పదేసే పచ్చేకబుద్ధేసు, పదేసే సావకేసు. ఇరియాపథచరియా చ పణిధిసమ్పన్నానం, ఆయతనచరియా చ ఇన్ద్రియేసు గుత్తద్వారానం, సతిచరియా చ అప్పమాదవిహారీనం, సమాధిచరియా చ అధిచిత్తమనుయుత్తానం, ఞాణచరియా చ బుద్ధిసమ్పన్నానం, మగ్గచరియా చ సమ్మాపటిపన్నానం, పత్తిచరియా చ అధిగతఫలానం, లోకత్థచరియా చ తథాగతానం అరహన్తానం సమ్మాసమ్బుద్ధానం, పదేసే పచ్చేకబుద్ధానం, పదేసే సావకానం. ఇమా అట్ఠ చరియాయో.

అపరాపి అట్ఠ చరియాయో. అధిముచ్చన్తో సద్ధాయ చరతి, పగ్గణ్హన్తో వీరియేన చరతి, ఉపట్ఠాపేన్తో సతియా చరతి, అవిక్ఖేపం కరోన్తో సమాధినా చరతి, పజానన్తో పఞ్ఞాయ చరతి, విజానన్తో విఞ్ఞాణచరియాయ చరతి, ఏవం పటిపన్నస్స కుసలా ధమ్మా ఆయాపేన్తీతి ఆయతనచరియాయ చరతి, ఏవం పటిపన్నో విసేసమధిగచ్ఛతీతి విసేసచరియాయ చరతి – ఇమా అట్ఠ చరియాయో.

అపరాపి అట్ఠ చరియాయో. దస్సనచరియా చ సమ్మాదిట్ఠియా, అభినిరోపనచరియా చ సమ్మాసఙ్కప్పస్స, పరిగ్గహచరియా చ సమ్మావాచాయ, సముట్ఠానచరియా చ సమ్మాకమ్మన్తస్స, వోదానచరియా చ సమ్మాఆజీవస్స, పగ్గహచరియా చ సమ్మావాయామస్స, ఉపట్ఠానచరియా చ సమ్మాసతియా, అవిక్ఖేపచరియా చ సమ్మాసమాధిస్స – ఇమా అట్ఠ చరియాయో.

విహారోతి అధిముచ్చన్తో సద్ధాయ విహరతి, పగ్గణ్హన్తో వీరియేన విహరతి, ఉపట్ఠాపేన్తో సతియా విహరతి, అవిక్ఖేపం కరోన్తో సమాధినా విహరతి, పజానన్తో పఞ్ఞాయ విహరతి.

అనుబుద్ధోతి సద్ధిన్ద్రియస్స అధిమోక్ఖట్ఠో అనుబుద్ధో హోతి, వీరియిన్ద్రియస్స పగ్గహట్ఠో అనుబుద్ధో హోతి, సతిన్ద్రియస్స ఉపట్ఠానట్ఠో అనుబుద్ధో హోతి, సమాధిన్ద్రియస్స అవిక్ఖేపట్ఠో అనుబుద్ధో హోతి, పఞ్ఞిన్ద్రియస్స దస్సనట్ఠో అనుబుద్ధో హోతి.

పటివిద్ధోతి సద్ధిన్ద్రియస్స అధిమోక్ఖట్ఠో పటివిద్ధో హోతి, వీరియిన్ద్రియస్స పగ్గహట్ఠో పటివిద్ధో హోతి, సతిన్ద్రియస్స ఉపట్ఠానట్ఠో పటివిద్ధో హోతి, సమాధిన్ద్రియస్స అవిక్ఖేపట్ఠో పటివిద్ధో హోతి, పఞ్ఞిన్ద్రియస్స దస్సనట్ఠో పటివిద్ధో హోతి. యథాచరన్తన్తి ఏవం సద్ధాయ చరన్తం, ఏవం వీరియేన చరన్తం, ఏవం సతియా చరన్తం, ఏవం సమాధినా చరన్తం, ఏవం పఞ్ఞాయ చరన్తం. యథావిహరన్తన్తి ఏవం సద్ధాయ విహరన్తం, ఏవం వీరియేన విహరన్తం, ఏవం సతియా విహరన్తం, ఏవం సమాధినా విహరన్తం, ఏవం పఞ్ఞాయ విహరన్తం. విఞ్ఞూతి విఞ్ఞూ విభావీ మేధావీ పణ్డితా బుద్ధిసమ్పన్నా. సబ్రహ్మచారీతి ఏకకమ్మం ఏకుద్దేసో సమసిక్ఖతా. గమ్భీరేసు ఠానేసూతి గమ్భీరాని ఠానాని వుచ్చన్తి ఝానా చ విమోక్ఖా చ సమాధీ చ సమాపత్తియో చ మగ్గా చ ఫలాని చ అభిఞ్ఞాయో చ పటిసమ్భిదా చ. ఓకప్పేయ్యున్తి సద్దహేయ్యుం అధిముచ్చేయ్యుం. అద్ధాతి ఏకంసవచనమేతం నిస్సంసయవచనమేతం నిక్కఙ్ఖవచనమేతం అద్వేజ్ఝవచనమేతం అద్వేళ్హకవచనమేతం నియోగవచనమేతం అపణ్ణకవచనమేతం అవత్థాపనవచనమేతం – అద్ధాతి. ఆయస్మాతి పియవచనమేతం గరువచనమేతం సగారవసప్పతిస్సాధివచనమేతం – ఆయస్మాతి. పత్తో వాతి అధిగతో వా. పాపుణిస్సతి వాతి అధిగమిస్సతి వా.

సుత్తన్తనిద్దేసో తతియో.