౩౮. వీరియారమ్భఞాణనిద్దేసో

౮౯. కథం అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం? అనుప్పన్నానం పాపకానం అకుసలానం ధమ్మానం అనుప్పాదాయ అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం. ఉప్పన్నానం పాపకానం అకుసలానం ధమ్మానం పహానాయ అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం. అనుప్పన్నానం కుసలానం ధమ్మానం ఉప్పాదాయ అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం. ఉప్పన్నానం కుసలానం ధమ్మానం ఠితియా అసమ్మోసాయ భియ్యోభావాయ వేపుల్లాయ భావనాయ పారిపూరియా అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం.

అనుప్పన్నస్స కామచ్ఛన్దస్స అనుప్పాదాయ అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం. ఉప్పన్నస్స కామచ్ఛన్దస్స పహానాయ అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం. అనుప్పన్నస్స నేక్ఖమ్మస్స ఉప్పాదాయ అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం. ఉప్పన్నస్స నేక్ఖమ్మస్స ఠితియా అసమ్మోసాయ భియ్యోభావాయ వేపుల్లాయ భావనాయ పారిపూరియా అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం…పే….

అనుప్పన్నానం సబ్బకిలేసానం అనుప్పాదాయ అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం. ఉప్పన్నానం సబ్బకిలేసానం పహానాయ అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం…పే… అనుప్పన్నస్స అరహత్తమగ్గస్స ఉప్పాదాయ అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం. ఉప్పన్నస్స అరహత్తమగ్గస్స ఠితియా అసమ్మోసాయ భియ్యోభావాయ వేపుల్లాయ భావనాయ పారిపూరియా అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం. తం ఞాతట్ఠేన ఞాణం, పజాననట్ఠేన పఞ్ఞా. తేన వుచ్చతి – ‘‘అసల్లీనత్తపహితత్తపగ్గహట్ఠే పఞ్ఞా వీరియారమ్భే ఞాణం’’.

వీరియారమ్భఞాణనిద్దేసో అట్ఠతింసతిమో.